الان الجزء الاخير من رحلتي الشيقه الى ماليزيا (( حصريا))

[مجرد مساهم]

عجبني موضوعك وايد ..... وقرأت كل الحلقات ........ تسلم على الموضوع .......... والحمد لله على سلامتكم


ما خبرتنا كم التكلفة ومع أي سفريات رحت .... ووش السلبيات اللي تنصح الواحد يتجنبها ؟؟

[المخلب]

تسلم على المرور الجميل هذا يا خوي مجرد سهم

طبعا التكلفه سبق وذكرتها ان الشخص الكبير بـ 4850 ريال قطر اما الاطفال مادون الـ 12 سنه يختلف اسعارهم بحسب العمر والسكن ! << لان السعر يشمل سكن في غرفه مزدوجه وبكذا ماتحتاج لكل شخص غرفه فوفر على نفسك المبلغ وسكن كل 2 في غرفه بسعر واحد

بالنسبه للسفريات فهي حمله بحرينيه تنطلق من البحرين لكن اخر خبر سمعته بسبب ازدياد القطريين في الرحله الثانيه تاريخ : 1-8-2005 خلوا رحله خاصه لهم من قطر علشان التعب (( لان احنا تبهدلنا لما رحنا للبحرين ومن البحرين تنقعنا في المطار لين ماتوصل طيارتهم ويعني بهدله مالها داعي من الاول ! ))

السلبيات ياطويل العمر !

1- لا تشتري من كل مجمع تروحله (( مجمع تسوق )) لانك تاخذ الشئ اليوم بسعر بكره تحصله اقل ! او العكس
2- بالنسبه للارشاد (( التجوال السياحي )) للي ناوي يروح هناك انصحه نصيحه لله اترك عنك نظام الخملات ! روح هناك انت وهلك او انت وزوجتك ! ((خاصه للي رايحين شهر عسل)) روح لحالك وبتحصلك مرشد في الفندق اجاره تقريبا 70 ريال في اليوم بياخذك في باص صغير ( ميني باص ) وبلفلفك الاماكن السياحيه الي عندهم وبكذا افتكيت من الانتظار والبهدله ويه العوايل الاخرى الي بتكون وياك في الحمله ! ( وهم اختصرت من التكلفه )
3-لما تدخل اي شاطئ علشان السكوتر والبرشوت ! ( خاصه في بينيغ ) خذ رايي لا تاخذ اول ماليزي يقولك تعال ابي اركبك ويانا او ابي اعطيك السكوتر بسعر كذا ! رح على السيف بتشوف الف واحد غيره ويكاسرونك هم في السعر علشان تاخذ من عندهم (( يعني كل واحد ارخص من الثاني )) .
4- تحت برج الاتصالات في كوالا لمبور في صينين خبثاء <<<< عربي فصيح يعني حراميه بيقولك تعال برسمك ( رسم مثل الي في الستي سنتر ايام المهرجانات السابقه ) بس لما يجيك بقولك بـ 1.6 رنجت ولما يقولك ادفع ! بقولك جيب 160 رنجت يعني رسم زباله ولا تشبهك في اي شئ وزياده على كذا باقك فمن الاول قله مابي ارسم وخلص نفسك .
5- ابتعد عن الاسواق الغاليه لان اشياهم نفس الي عندنا واحنا ارخص ! لايغرك كلام الناس .

هذي نصايحي بالنسبه للسلبيات .

بس حبيت اذكر كذا مركز تسوق للي يحب انه يدل هناك (( افضل مراكز التسوق وارخصهم ))

1- كوالا لمبور : " مركز بيبي بلازا , مركز مايدين ((مثل الرامز بس بضايعه تنفع )) , السوق الصيني ( بس غالي بالنسبه لغيره بس لو تبي تشتري من هناك لا تشتري من اول يوم لانهم يتاكدون اذا انت جديد وله زبون قديم اذا قديم بيعطونك سعر اقل واذا جديد بيرفعونلك السعر دبل كيه ) .
2-بيينغ :" السوق الليلي ( افضل سوق وارخص سوق في ماليزيا ( سوق شعبي طبعا ) تقدر تشتري منه الي تبيه وبافضل الاسعار ( نصيحه خله المكان الاساسي للتسوق بالنسبه لك ولحريمك )

3-لنجاوي :" سوق شعبي في وسط البلد بس ماعرف اسمه بالضبط بس تقدر تسال اي واحد ويقولك اسمه وهو تحت الفندق الي بالصوره الي سكنا فيه تحته مباشره ".

4- جنتيك هايلاند :" ههههه مكان للعب مافيه شي تتسوق فيه بس ريح بالك " .

بالنسبه للمبلغ الي توديه وياك ( ابعد عن الفيزا ولا تستخدمها هناك ! ) المبلغ للشخصين 6 الاق تكفي !

خمس اشخاص 8 الاف تكفي ! مازاد عن كذا خذ 10 الاف بس صدقني بتزيد يعني خذها بس احتياط ! (( وخذها بالرنجت افضل او بالريال ومايغرك الدولار هناك !! ترى بتخسر فيه ))

هذا كل الي عندي انشاء الله فدتكم تحياتي لكم اخوكم المخلب ..

[مجرد مساهم]

شكرا شكرا شكرا




ممكن توضح لي ، ليش الأفضل عدم استخدام الفيزا ؟؟

[البرنس]

يسلموووووووووووو اخوي المخلب ..

[المخلب]

اشكركم يا برنس ويا مجرد سهم على المرور

طبعا لان الله يسلمك ماليزيا مشهوره بانها اكبر هكرز للفيزا يعني اذا في فيزتك 50.000 ريال ترجع قطر وانت مفلس ! ولا ريال داخلها يعني بالعربي حراميه فيزا !

انشاء الله يكون التوضيح انفهم وشكرا لك على الاستفسار

تحياتي لكم واي خدمه حاظرين

[ROSE]

ممتاز اخوي المخلب بصراحه شجعتني اني احط رحلتي بعد وان شاء الله راح احطها لما ارجع


لك الف شكر وجزاك ربي الف خير

[المخلب]

يالله كلنا بانتظارك تحياتي لمرورك