السلام عليكم
يا شباب حبيت اقدم لكم نصيحه عن شركه
تستهدف السواح في البحرين وخاصه المتزوجين
والشركه اسمها .. الأجازات العالميه
انا اسوي تشهير بشركه لانها فعلا تحتاج الى الحذر منها
واليكم قصتي ..
كنت مسافر مع زوجتي للبحرين
وكنا في مجمع الدانه
واذا بشخص .من جنسيه عربيه يقول لي لو سمحت ممكن دقيقه
قلت له تفظل ..
قال: احنا راح نطرح عليك سؤال وبمجرد اجابتك عليه سوف تفوز بهديه قيمه تليق بمقامك
قلت : تفظل
قال: ماهي اقدم عاصمه عربيه
قلت : دمشق ..لاني سامع هذي المعلومه من فتره
فقال : فعلاً ما شالله عليك
المهم قال لي جازتك اهي اقامه في اي دوله مدة اسبوع وفي اي وقت تحبه
وعطاني كرت وقال بس لازم
انك تحظر معنا احنا نقدم عرض وراح نعرض عليك برنامج مدته ساعتان في مكان يليق فيك
انت والمدام فقلت له اوكي
وانا بصراحه صار لي 3 ايام في البحرين لفيتها كلها وكنت اصلا مب عارف وين اروح
واستشرت المدام وقالت خلنا نروح ونشوف.
وكان مكانهم في اعلى برج في البحرين برج المؤيد
المهم دخلنا وستقبلونا افظل استقبال ولقيت عدد كبير من العائلات
كل عائله على طوله ومعاهم واحد يشرح لهم
والمهم جانا واحد وقام يكلمنا عن الشركه
وبعدين قام يكلمنا عن نظام الشيرنق تايم
وانا مره شفت برنامج عن الشيرق تايم ومميزاته ... واهو فعلا برنامج ممتاز ولكن
كنت متخوف من الشركه
وفي نص الشرح سمعت الكل يصفق والسبب شخص وقع عقد معاهم
وبعد مده نفس الشي
في فترة وجودي وقع تقريبا ثلاث اشخاص من الامارات والسعوديه
اهم قالوا لي سعتين وانا قعدت 4 ساعات
في الاخير عرض علي القد وكان عرض خاص .. اذا وقعت في نفس الوقت
طلبوا مني مقدم عشرين الف
عاد انا حبيت اصرف نفسي فقلت بطاقتي ماتعطي 20 الف كحد اقصى فقط 10 الاف ريال
قالي زين تعال جرب ..
وانا متاكد وعارف انها ما تعطي
المهم رحت معاه وانا متاكد ..
قالي جرب البطاقه جربتها ما سحبت
قال اااه صحيح ليش كذا
المهم رحت ورجعت على طولتي
رجع لي وقال باقي عشره الاف ؟
قالت له شنهوووو
ليش انا ما عطيتك شي قال لا انا حاولت بعدك وقدرت اسحب
مع ان البطاقه معاي
قلت له ليش وشلون وعصبت
وطلبت منه يكنسل ..وهو يحاول يهديني قلت لا خلاص كنسل
ومابيني وبينكم عقد شلون تسحب
قال خلاص بكنسل وكنسل وعطاني اورقة التكنسل
بس قالي المبلغ مايرجع في نفس الوقت يحتاج ثلاث ايام قلت له مو مشكله
المهم اول مارجعت قطر بلغت البنك ( مصرف قطر الاسلامي)
وقالوا لي كلامهم سليم يحتاج وقت راجعنا بعد اسبوع
كلمتهم بعد اسبوع وكانت الصدمه الكبيره..
تم سحب مبلغ 5800 من الحساب ..من نفس المكان
من يومين ... يعني انسحب وانا موجود في قطر
وقلت للموضف شلون قال مادري
تبينا نعمل مطالبه ؟ قلت له المبلغ راح يرد
قال نعم لازم يرد
هذي السالفه من شهر واحد والحين احنا شهر 5 والفلوس ماردت