نواصل رحلتنا .. قبل لا نكمل .. تفضلوا أستكانة تشاي تركي يعدل الراس
-----
بعد ما أرتحنا في الفندق و نتيجة لحنة العصابة اللي معي أجبرت على الذهاب الى Luna Park و هي عبارة عن مدينة العاب (حليوة) تقع في حديقة كبيرة جميلة أسمها Kültür Park ..
في الطريق و بناء على توجيهات سامية تم أصدار المرسوم الملكي رقم 145/س بزيارة سريعة الى مجمع Zafer للتسوق
المجمع تقريبا 3 طوابق تحت الأرض و اللي باين الهرم في الوسط .. بالنسبة للأسعار أقدر اقول أنها من معقولة الى غالية بعض الشي ..
-------
أشارة تبين المسافة بين بعض الدول عن مدينة بورصا .. مادري اذا لاحظتوا أسرائيل من بينها
-------
بعد ما تسوقنا .. رحنا لصالة المطاعم و تغدينا و من بعدها رحنا الى مدينة الألعاب
مدخل الحديقة .. والصورة في الحقيقة لا توفي جمال الحديقه حقها
-------
منطقة الألعاب
-------
في اليوم الثاني كان جدولنا عبارة عن زيارة قمة جبل أولدغ و بالمره نتغدى في احد المطاعم هناك .. بالمناسبة أولدغ بالتركي معناها العظيم . و يبلغ أرتفاعه 2,543 متر ..المنطقة اللي احنا رايحين لها تقع على ارتفاع 1000 متر و عادة الصعود لها يكون بواسطة التلفريك
باص مب تلفريك! .. و الطريقة الثانية للصعود هي بالسيارة و هذا اللي سويناه
---------
المناظر كانت حلوه .. و بدا الجو يبرد كل ما صعدنا فوق
---------
و أحنا في الطريق .. تذكرت توصية بزيارة معلم مهم جدا و هي الشجرة المعمرة .. هذي عبارة عن شجرة مب راضية تموت .. عمرها فوق ال 600 سنة .. و أهالي المنطقة يعتبرونها جدتهم العودة ..
في الصورة باين الأسم و اللفه اللي تودي لها .. ما انتبهت لها اول مره و حط رجلك يمكن اكثر من كيلو .. بعد ما سألت راعي سيكل بغيت ادعمه ع الخط قالي اللفه ورى .. و نرجع لها ..
------
قبل لا نروح للشجرة المعمرة .. وقفنا عند مجموعة من النسوة كانوا يسوون خبز ع الصاج .. و كان لذيذ جداااااااا
-------
و أخيرا وصلنا الى هدفنا .. الشجرة المعمرة
-------
معلومات عامة عن الشجرة .. عمرها 600 سنة .. طولها 35 متر .. قطرها 3 أمتار .. محيطها 920 متر
يعني المنطقة اللي تغطيها بأغصانها .. تخيل لو هذي مواصفات فتاة أحلامك .. أحراج
-------
جلسنا في المقهى تحت الشجرة و تناولنا بعض الخفايف و تقهوينا و عينا من الله خير و عقب مشينا نكمل صعودنا الى قمة الجبل
--------
في نص الطريق .. درجة الحرارة نزلت لين 24 .. في بورصا تحت كانت تقريبا 32
.. و لما صعدنا فوق على أرتفاع تقريبا 1000 متر .. كان الجو خيالي .. تقريبا 20 درجة
------
المنظر من أعلى الجبل ( Photo by Jean & Nathalie )
-------
المنطقة فوق عبارة عن مطاعم و محلات لبيع التحف و المشغولات اليدوية التركية .. قضينا بقية اليوم في الشوي و اللعب مع الصغار في الحدائق و كان الجو بارد و منعش
و الان مع فاصل أعلاني و نكمل بعد قليل عن رحلة العودة الى أسطنبول و قضاء اخر الأيام هناك .. تابعونا
-------