المشاركة الأصلية كتبت بواسطة حبر سري
اختي مافي داعي نرجع لجار مسلم وجار كافر على قولتج
تبين تقولين الدولة تتبرع للخارج
يبه هاذول ناس ماعندهم بيت اينامون فيه , ينامون في الشارع
ماعندهم كسرة خبزة ياكلونها , والله ماعندهم
رواتبهم ماتندفع
وانتي على قولتج كان سوء تخطيط , طيب هل التسديد بيصلح هالشي؟؟
ماراح يصلح شي تدرين ليش اختي؟
لان العقليات لازم تتغير , طول مان احنا حاطين في باان ان الدولة هي الدجاجة اللي تبيض ذهب , ماراح نتطور كلش
الا بالعكس , الانتاج راح يقل
العقليات لازم تتغير
اوكيه الحمد لله الدولة غنية , واحنا مستفيدين من خيراتها ترى
والله مستفيدين ولله الحمد والمنة , بس مانحمد ربنا
نبي الدولة اتسوي عنا كل شي
وبعدين اختي يعني اشوف الكل يقول القطري عنده عزة نفس وماطيلب من حد (وهالكلام صحيح وابصم عليه بالعشرة ) , لكن ليش هالشي مايتطبق هنيه؟؟
ارجع وقول لج اختي , الواحد يدور له على مصدر دخل ثاني , او يفتح له مشروع صغير , ابرك له الف مرة من الطرارة ليل نهار ( مع احترامي لج اختي ولجميع من ردوا)
هذا رايي
وبعدين اختي يعني ليش نقص على بعض , انتي تقولين صغار الموظفين
طيب صغار الموظفين هاذول كانوا محتاجين
طيب اللي محتاج ليش يتبطر؟
يعني خلنا نقول واحد من صغار الموظفين شرا سيارة او احتاج سيارة
يعني لازم يشتري له لاند كروزر؟؟؟او شبح؟؟؟
طيب ياخي مد ريولك على قد لحافك
هذا اللي وهقنا والله
نتسلف ونقعد نكشخ على الفاضي وبعدين نقعد نصيح ونبيهم يسددون ديوننا
مثل اللي كاشخ بشبح اخر موديل وماعنده فلوس حق البترول!!!
والله نفس الشي
اقول هالكلام اختي وانا والله العظيم مديون ابمبلغ فوق النص مليون , لكن اقول لج اذا الدولة سددت جزاها الله خير
لكن مستحيل اجي واطلب منها تعالي سددي واقعد اطر جدام الله وخلقه
طيب الدولة ماسددت , شاسوي؟؟
اقعد اصيح واندب حظي مثل الحريم
الا باشمر عن ذراعي باذن الله وراح اسعى في طلب الرزق , وااسعى ياعبد وانا معاك
اما بالنسبة للاسطوانة المشروخة اللي ذابحينا فيها :
انا ولد البلد , وانا قطري , والدولة لازم اتسدد لي
فاحب اقول شي :
انا ( واعوذ بالله من كلمة انا) قطري ابا عن جد , واقولها وكلي فخر , ومديون , واقولها بكل اسف طبعا , لكن عمري ماراح اطلب
تدرين ليش؟؟
اوكيه انا ولد البلد , بس بضرب لج مثال:
لما يكون في ابو عنده عيال صغرا , اكيد راح يصرف عليهم صح؟
طيب اكبروا هالعيال وصاروا يشتغلون , وكل واحد منهم تسلف من البنك , لكن واحد منهم راح لابوه بعد فترة وقام يصيح وقال له :
يبه سدد عني , انا ولدك ولازم اتسدد
تفتكرين وشراح اتكون النظرة لهالولد الخدية ( مع احترامي واعتذاري للاعضار وزوار المنتدى على هالكلمة)
وشراح اتكون النظرة له؟
ولد اتكالي ومب كفو
لان الابل الى متى بيتم يسدد
لازم اتجي فترى الواحد يعتمد على نفسه , الدولة اخدمتنا , واحنا الحين لازم نرد جميلها
نعمرها , نرفع راسها , نطورها , مب نقعد انصيح ونقول سددوا ديوننا
والله من وراء القصد