علميني ليه احبك وانتي ما تدرين عني!!
مدري ما عندك مشاعر ولا انا طبعي غريب
المصيبه لو تكون المشكله في كبر سني!!
لعنبو دارك ترى الشايب يطيع ويستجيب
لو تبين الشمس في كفك تجي لك بس تمني
شوف عيني كنها ما بين يدينك تغيب
كثر ما بشيبي وقار وكثر ما بصدك تجني
اعشقك وامني نفسي " وصلك المقفي قريب"
دام بك روح الأنوثه لا أبد ما يخيب ظني
محسن الظن بخفوقٍ يتبعه قلبٍ صويب
اسعد ايامي اشوفك جالسه بالقرب مني
واسمعك من كل قلبك تهمسين " انت الحبيب"
وقتها والله لضمك واحذف عقالي واغني
" كيف نخفي حبنا والشوق فاضح" ما يعيب
يا جنون الشعر فيني قلها ذا الحب فني
والليالي علمتني ما اتبع الحب المريب
وقلها ليش اختياري يشهدونه الف جني
لانها وبكل بساطه جتني من كوكب عجيب
كوكبٍ ما قول سره للعذارى لو عطني
خاتم سليمان وملكٍ شيد الصرح الرهيب
ما بقى بالعمر باقي والسنين اللي جفني
منهن للي خلقهن يكفي اني عشت ذيب
والندم من خلقة أدم ما يجيب الا التدني
لجل ذلك ما تبعت الغم والهم والنحيب
ركعتين بجوف ليلي تذهب الشيطان عني
حتى لو كلي مشاعر او كذا طبعي غريب
كتبها : الشايب كش ملك
|
المشاركة الأصلية كتبت بواسطة كويتي فهمان
