[][][][][ انطباعي عن موتري الجديد vxr 2008 بعد استخدام اسبوع ][][][][] تفضلوا

[ALRAYYAN]

السلام عليكم

شلونكم يا اعضاء هالمنتدى الطيب .. ياربكم طيبين

بخصوص الكروزر 2008

انا الحين صار لي اسبوع من طلعت الموتر .. بصراحه الموتر في عيوب اذكرها لكم بعد شوي

نقول المميزات اول

من مميزات الموتر ومن اهم مميزاته ان الموتر ريف ريافه غير طبيعيه
يعني انا استعمل الكروزر من زمان جربت مو 89 و 92 و 95 و 98 اول مانزل و2004 والحين 2008
ماشفت ريافه مثل ريافه الجديد .. هذا طبعا بعد ماقبضت في خط ونزلت في بر

الموتر من داخل وسيع .. اوسع من القديم بوايد وخصوصا السيت الخلفي وحتى سيت السايق والعبري

ومن مميزات الموتر بعد الشاشه الأوبشن مالها عالي جدا .. يعني الشاشه اكبر واوضح
والكاميرا الخلفيه غطت على المرسدس والرنج من ناحيه الوضوح .. وتقدرون تقولون ان
الموتر كله في الشاشه .. تقدر تتحكم في كل شي من الشاشه لو تعلمت عليها وعرفت تستغلها عدل .. وهذه ميزه الشاشه في الـ vxr
وتشغل من خلالها كل شي في الموتر تقريبا .. اضافه انها تشغل السي دي والدي في دي وام بي3 وكل الانظمه اللي تحتاجها
بس مجرد ماتزل الهند بريك وانت مشغل فلم الصورة تختفي ويطلع لك النفجيشن كسيفتي مثل الالماني .. لأن المفهيين وايد اللي يندمجون وينسون الشارع وانا واحد منهم

طريقه طي الكراسي الخلفيه اقصد الاخيره طريقه عمليه جدا ومريحه للغايه ..
لافيها ربط ولا اسحب ولا شي .. اللهم لوك في كل سيت ترفعه والكرسي بروحه يرتفع مع دزه خفيفه جداً ويقفل والسلام

درايش الموتر مخلينها تدخل بين الربلات اكثر من نص انش يعني اكثر من القديم
عشان يكتم الموتر من داخل وماتسمع الاصوات الخارجيه وهذه بعد ميزه حلوه من مميزاته

وانت داخل الموتر بتلاحظ ان اليابانيين ارفعو الابواب من داخل اكثر من القديم ..
وانا اعتبرها ميزه لأنها تحافظ على الخصوصيه في الموتر من المواتر اللي اعلى من موترك
لين وقفت في دوار او اشاره .. يعني نفس نظام الهمر بس مو مثل الهمر لأن الهمر وايد
كرسيه نازل بعكس الكروزر الجديد مركبه وايد احلى من القديم

خلاص ماعاد في طقه في الجير مثل الديم يعني تبديل الجير من وضعيه لوضعيه ثانية في حالة
الوقوف ولا تحس بها .. ونفس الشي وانت ماشي ماتحس بتبديلات الموتر وهذا شي طيب

الـ vxr القديم اقصد من مو 2003 لين 2007 المكينه 4700 سي سي
الـ vxr الجديد مو 2008 بعد مكينته 4700 لكنها وايد اقوى وهالشي تحس فيه وانت تسوق الموتر
وهذا شي مكانيكي انا بصراحه مافهم فيه لذلك مابي اتفلسف عليكم

من مميزات الموتر الداخليه المكيف .. موزعينه بشكل رهيب في الموتر
واحسن من القديم بوايد سواء قدام او المكيف اللي للركاب اللي في الوسط او في الخلف

وميزه جديده في الكروزر الجديد وهي ان مستحيل يقدر اي احد يسرق لسبير
واقصد اللي تحت لأن ماتقدر تنزل لسبير الا لما تفتح الباب الخلفي لأن فتحة
العفريته من داخل الموتر مو من برا مثل القديم

نجي لعيوب الموتر

من عيوبه واللي للحين ماسمعت حد يتكلم عنها .. ان الموتر لفته كبيره
مو مثل القديم وهذا عيب كبير .. يعني لازم توسع للموتر عدل ولا لابد من الريوس

من عيوبه السكان شوي اثقل من القديم

في طقه في الطبلون وتأكدت انها في كل المواتر الجديده لأنها موجوده عند الربع اللي اسبقوني وخذو الموتر

نوعية التيك اللي في الموتر روعه كنوعيه وكلون .. ولكن ملمسها ناعم جداً ..
يعني زياده عن اللزوم لذلك السكان اذا ماتمسكه عدل في حالة الدوران عادي يفلت منك او مالك الا تمسكه من ناحيه الجلد

الثلاجه ماتشتغل الا مع المكيف مثل ماسمعتوا قبل .. ولكن هالمشكله مؤقته
لأن الشركه ناطره الدفعه الجديده مو الجايه اللي بعدها بيكونون مفصولين وعلى اساسها بيضبطون مواترنا من هالناحيه

هذه كل عيوبه للحين

اما الموتر كفخامه فهو فخم جدا من داخل وسواقته رهيبه ..
يعني بمجرد تسوقه تعاف القديم اكيد وخصوصا على الطرق الوعره والخطوط

وسلامتكم

وبالتوفيق للجميع

[y.o.y.o]

بالمبارك اخوي

تسلم على المعلومات الطيبه . . .

ويلا عاد اول ماتكتشف شي جديد قولنا

[بوحارب]

الله يعطيك خيره ويكفيك شره اخوي الريان:d


تسلم على الموضوع الطيب

[ALRAYYAN]

بالمبارك اخوي

تسلم على المعلومات الطيبه . . .

ويلا عاد اول ماتكتشف شي جديد قولنا

الله يبارك فيك وتآمر اي شي جديد بعلمكم ان شاء الله

وممكن اي حد من الشباب يضيف شي جديد على الموضوع لو اكتشف اي ميزه او عيب

وفالك طيب ان شاء الله

[ALRAYYAN]

الله يعطيك خيره ويكفيك شره اخوي الريان:d


تسلم على الموضوع الطيب

الله لا يهينك يابو حارب وتسلم ع المرور

منور

[الدوحي7]

مبروك الموتر ويعطيك خيره ويكفيك شره،، وعجبني تحليلك للموتر،،وعن السكان صادق ،،وحبيت شوي اضيف لك انا المحرك هذا والعلم عند الله بيتغير كامل بس ليس موديل2009 او 2010يمكن وبيركب عليه محرك 5700 وانا شفت المحرك على البيك اب التويوتا عليه هذه المكينه،،وانا انتظر هذا المحرك،،يعطيك العافيه،

[ALRAYYAN]

مبروك الموتر ويعطيك خيره ويكفيك شره،، وعجبني تحليلك للموتر،،وعن السكان صادق ،،وحبيت شوي اضيف لك انا المحرك هذا والعلم عند الله بيتغير كامل بس ليس موديل2009 او 2010يمكن وبيركب عليه محرك 5700 وانا شفت المحرك على البيك اب التويوتا عليه هذه المكينه،،وانا انتظر هذا المحرك،،يعطيك العافيه،

هلا بك الدوحي7

بخصوص المكينه 5700 على حد علمي ان الموضوع بيكون اختياري
يعني ممكن تاخذ vxr بمكينه 4700 او vxr بمكينه 5700 وكل شي بسعره عند عبدالغني
يعني مستحيل تنزل مكينه قويه على الكروزر الجديد وبيتم بنفس القيمه واعتقد اذا اخترت المكينه اللي قوتها 5700 بيكون سعر الموتر فوق 250 الف تقريبا

ويعطيك العافيه على الاضافه اخوي

[الدوحي7]

هلا بك الدوحي7

بخصوص المكينه 5700 على حد علمي ان الموضوع بيكون اختياري
يعني ممكن تاخذ vxr بمكينه 4700 او vxr بمكينه 5700 وكل شي بسعره عند عبدالغني
يعني مستحيل تنزل مكينه قويه على الكروزر الجديد وبيتم بنفس القيمه واعتقد اذا اخترت المكينه اللي قوتها 5700 بيكون سعر الموتر فوق 250 الف تقريبا

ويعطيك العافيه على الاضافه اخوي

اختلف معاك في هذا الراى المحرك بيغير كامل وصعبه اختياري لن ماصار هذا الشي معا المصنع وليس عبد الغنى،،وبيتم المحرك حق السيارت القديمه ،،وليش مستحيل هذا مصنع ماعنده مستحيل وليس عبد الغنى ،،وقلت لك ممكن موديل 2010 تنزل ،،والناس قالو لا خلاص هذا محرك الفكسار مستحيل يغير الشكل كامل مايتغير المحرك،،حتى السته سلندر سوف تتغير والعلم عند الله،،لان اكتشفنا هذا المحرك ينزل على الابرادوا،، وهذه سياسه تسويقيه حق اليابان،،علشان نشتري المحرك الجديد(الموديل الى بعده)،،لاهنت،،

[ALRAYYAN]

اختلف معاك في هذا الراى المحرك بيغير كامل وصعبه اختياري لن ماصار هذا الشي معا المصنع وليس عبد الغنى،،وبيتم المحرك حق السيارت القديمه ،،وليش مستحيل هذا مصنع ماعنده مستحيل وليس عبد الغنى ،،وقلت لك ممكن موديل 2010 تنزل ،،والناس قالو لا خلاص هذا محرك الفكسار مستحيل يغير الشكل كامل مايتغير المحرك،،حتى السته سلندر سوف تتغير والعلم عند الله،،لان اكتشفنا هذا المحرك ينزل على الابرادوا،، وهذه سياسه تسويقيه حق اليابان،،علشان نشتري المحرك الجديد(الموديل الى بعده)،،لاهنت،،

الله يمدنا وياك بالعمر وكل شي بيبين ان شاء الله يالغالي
وكل شي جايز .. وشاكر لك مداخلتك اخوي

[موظف بالبورصه]

مرحبا اخوي ريان اول جاجه مبروك عالموتر وتستاهل يعطيك خيره ويكفيك شره

ثاني الشي الطقه تراها موجوده في كل المواتر يمكن انت موترك للحين جديد

انطر عليه شوي وبتطلع الطقه .. انا اول ماخذت الموتر مابينت الطقه عندي الا عقب الـ 1000 كيلو

ويوم سألتهم قالوا هذي عاديه احنا مسويينها كسيفتي ..