واللـه يعتمــد على حسـب الأيـــام . .
مثـلا لو قلنـــا انكم بتـروحون 5 أيــــام . .!!
طبعـا السكــن . . انـا انصـــحكم بشـــقق Coral Boutiqe . . شقق نظيفــه وتعتبر جديده وعلى شارع الشيـــخ زايـــد وكل شئ حــولـك . . والليـله تقريبا لشقــه غرفتين + صاله + حمامين بسعــر 1000 درهــم تقريبــــا . . وانــا اصنــف هـ الشـــقق بالــــ 5 نجـوم لنظافتهـا . .
المواصــلات . . اذا تبي تأجـر سيـــاره بســـائق او بدون سائــق براحتــك . .
سيــاره بدون سائــق اذا تبـي اعطيـك رقــم مكتــب راقـي بالتعامـل والسيارات كلهــا 2008 طبعـا العمليـــه منهـا مثـــل (( كامــري , ألتيـــمـا )) وسعــرهـا تقريبـــا 170 ريـــال . .
الجـدول كـ التـالي :
اليـوم الأول :
تحجزون رحلــه العصــر وتوصـلون ان شاء الله ع المغـرب . . واول ماتوصلون تروحون الشــقق وعقب ماتوصلون فيه سوبر ماركت كبيـر جنب الشــقق تاخذون الأغراض اللي تحتاجونهـا منـــه مثـلا " عصائـر + كوافي + سناكــس + شاي + قهـوه + سكـر الــــخ . .
لان الشقه فيها ادوات المطبــخ كاملـــه . .
وأول ما تريحــون شـوي تروحون لمــول الأمارات اللـي يبعـد 5 دقايـق مشــي عن الشــقق وطبعا بيكون الوقــت " ليـــل " ومايمديكم تســون شــئ . . تروحون هنـاك وتاخذون لفــه في المجمع اللي يعتبر من أرقى المجمعات في الخليــج . . وعقبهـا تتعشــون بأحد مطاعمـه وبعدهـا اذا لكم خاطــر تحضــرون سينمـــا . .
اليـوم الثاني :
تقــومون على راحتكم مثـلا خلنـا نقـول الساعه 10 صباحـا . . وعقبهـا تروحون تتغدون أو تاخذون يخــت او تتغدون عقــبهــا في منطقــه (( روعـه )) اسمهــا " مرسـى دبـي " من هنـاك تقدرون تاخذون يخــت بأحـد المكاتـب وعقب اليخــت اللـي بياخذكم جــوله ليــن خليــج برج العــرب وجميــرا بيتـــش لمده ساعتين تقريبا تقدرون تروحون للمطاعم اللـي هنـاك فيـه منهــا الايطالي + الهنـدي + العربي + الصيني . . الــخ
والمقاهي العالميـه كـ ستاربكس وغيره من القعــدات الحلــوه المطله ع البحـــر . .
" مرسـى دبـي " بتقعدون فيـــه نقــول لين حـزه المغــرب . . وعقبهــا تقدرون ترجعـون للشقــه تبدلون ملابسكم وتريحــون شوي وعقبهــا تروحون مثــلا تتعشــون في مجمــع ابن بطوطـــه واذا ماحضـرتوا سينمــا باليوم الأول تقدرون تحضــرون لليــوم الثانــي و تتسوقون مره وحـــده . .
اليـوم الثالــث :
تقـومون الصبــح كـ العاده وتتريقــون وعقبهــا تروحون لقريــه مدهـش اللـي جنب المطـار . .
قريه مدهش فيها العاب حلوه للصغار وبيستانسون فيها صراحه وبتقضون فيها وقت حلو لحـزه الظهر . . تفتح تقريبا الساعه 10 صباحــا . .
وعقبهــا تقدرون تروحون مثــلا ع الساعه 2 الظهــر لجميـــرا بيتـــش وتدخلون مرافـق الفندق هنـــاك . . مسبــح + شاطــئ مطــل على برج العــرب ولــو مثــلا تتغدون أول لأن مطاعمه حلـــوه والساعه 3ونص تروحون هنــاك لأن أغلــب برك سباحتــه مغطــاه عن الشمـــس . .
اذا " أوراق " ام وتبي تروح تستانس مع عيالهــا بوالـــد وادي " مدينه مائيــه " مقابلــه لجميــرا بيتــش . . فيــه اوقات مخصصه للنســاء والأطفال دون الســن الــ 8 . .
تقدرون تروحون لهــا بالليــــل مثـــلا . .
اليـوم الرابـع :
أول اليــوم طبعـا تروحون مثــلا " مول الامارات " وتدخلون " سكي دبي " . . مدينه دبي الثلجيـه . . مدينه روعـه وكلهـا ثلــج والعاب ثلجيـه وبداخلها سينمـا مجانيه للأطفال كـ افلام كرتون عن الجليـد وغيره . . وعقب سكي دبي اللي راح تقضون فيه اقل شئ 3 او 4 ساعات تتغدون بأحد المطاعم المنتشره بالمـول وعقبهــا الصغــار بيروحون لماجيــك لانــد وهي مدينه العاب الكترونيه فيها العاب حتى للكبار . . وهــذه بيقعدون فيها طول اليوم وماراح يطلعون
وعقــب هـ الفتره مثــلا بتكون تقريبا وصلتوا لحـزه المغــرب تقدرون مثــلا تروحون لفيستيفال سيتي أو سيتي سنتـر أو برجمــان للتســــوق مثـــلا . . وعقبهــا العشـــاء بأحد المطاعـم اللـي على شارع الشيخ زايــد واذا تبون مطعم ايراني انصحج بمطعم صـــدف ولــه فرعين فرع في شارع الشيخ زايد وفرع جنب فندق ميتروبوليتان بالاس في ديــره . . والأنظــف اللـي على شارع الشيخ زايــد . .
اليـوم الخامــس :
التجهيـز للعــوده وتقدرون مثــلا اذا الرحله مسائيه تقومون الصبــح للتســـوق بأحـد المجمعات ومنهـا " ماركاتــو + ابن بطوطـــه + مول الامارات + فيستيفال سيتي " وانا ذكرت هـ المجمعات لانهـا قريبه من مكان الشـــقق المذكوره أعلاه . .
دبـي حلــوه وبيستانســون اليهــال و تعتبر افضل اختيار لقربهـا والأهم طبعا تغيير الجــو لهم . .
اتمنى افدتـك . .
واذا لـك خـاطر بعناوين الشـــقق و عناوين مكتب الايجـار ياليـت تقــولي ولا تستحي واى ســؤال انــا حاضــر . .