ياصاحب المليون

[ابو عبدالله.]

صبحكم الله بالخير


معماري انت تحفه ههههه

ذكرتني بالي راحوا العسكريه عشان الراتب الصيفي


انا بعلق لكن اتمنى تتسع صدوركم

اولا احنا بدوله صغيره و مؤكد يحدث تضخم و غلاء. شوفوا دوله مجاوره صغيره. الاراضي عندهم اغلى من عندنا وحتى باقي الدول المجاوره نفس الشي. كله مقارن للرواتب تعتبر غاليه جدا

كل دول العالم. الشخص العادي لازم يتعب كثير عشان يشتري مسكن. ومنها امريكا. يقسط 25 سنه لبيت ارضي بمساعده الدوله

ثانيا

في حد تعرفونه ما جاته فرص كثيره انه ينفع نفسه و يرفع وضعه المعيشي ؟

الله اعطى الكل فرص و عقل و وقت

الي حاصل اننا سمحنا بأن الحياه تغسل المخ و نجري ورى امور غير اساسيه على حساب الامور الاهم

في 2008 طرحت موضوع اسمه قطار 2015. عن توقعات التضخم و الغلاء و تغير الوضع المعيشي بقطر و انحسار الطفره و ضروره الادخار و الاستثمار

سنه الحياه هي التطور و التغير لكن الاساس هو نفسه

ادخار استثمار التهيء للمستقبل

ثالثا

لازم نجهز للافضل و ندرب النفس على امور مهمه

الثقافه الاستهلاكيه
الادخار
خطط تعديل الوضع بمدد زمنيه

لا زال الوقت يسمح و الطفره لم تنتهي. صحيح في نهايتها لكن موجوده

بنحط امثله

ثقافه الاستهلاك
لا تشتري شي منت في حاجته و استغل نقاط الولاء للبنك و المحلات في ارجاع جزء من فلوسك. حتى بعض المحلات تعطي خصم 10 % الى 25% فقط لانك تعمل بجهه رسميه

منها وكالات سيارات و فنادق و حتى محلات بيع لعب الاطفال.

شراء الجمله و العروض بالميره و غيرها لاغراض معينه حق سنه كامله توفر علي اكثر من 10 الاف ريال سنويا. غير نقاط الميره و البنك تطلع تذاكر سفر مجانا


لا تقلد

مب لازم مواتر جديده اذا تعرف انك بتبني بيت العمر
مب لازم جوالات جديده كل سنه ما تفرق معاك اصلا

التزم ماليا بدل ما تجدول السلف كل فتره و خطط للاهم


الرواتب الحاليه عن نفسي اشوفها ممتازه و ممكن للشخص يخطط لكن قله الصبر و عدم الرغبه في الالتزام طويل الامد هي المشكله

جاري ساكن ببيت ايجار وجدام بيته خمس مواتر. رنج و جمس جديد و سيارتين صالون جداد. و صارف تعديلات بالبيت ما تحتاج كلش. شلال و جلسه و امور اخرى ما تنحط الا ببيت العمر

والله لو مكانه ان قيمه موترين تعتبر مقدم لشراء فيلا نفس حجم بيته المستأجر

جار ثاني مسوي مجلس اكل الحوش كله حط خيمه ترى بيت ايجار و وراك بيت اسكان بتبنيه و سبع مواتر جدام بيته كل ولد بموتر غالي

شتعلم عيالك. كشخه على الفاضي. بدل ما تعلمهم الادخار

كفايه ما ابي اكتب عن اوضاع الناس لكن بذكر نقطه اخيره و هي الاهم و رد لسؤالك الاول


نعم اي واحد يقدر يصير غني

يقولون الاولين. اسع يا عبدي و اعينك. او اجلس يا عبدي و اهينك

الي بيجلس و يتذمر بيضل يتذمر للابد

و الي بيسعى الله بيوفقه

كل الفرص متاحه لتعديل الوضع

البيع و الشراء متوفر بأي شيء يشتغل فيها و يربح لين يتعلم اكثر و يرفع الربح مع الوقت

في العمل من المنزل

و في فرص تغيير جهه العمل لجهه افضل و راتب و امتيازات اعلى

في الاجتهاد بالعمل للترقي

و في بورصه و شغلات مثل وساطه عقاريه و اعمل حرفيه. مش شرط بنفسه. يجيب عامل و يسوي شغلات تنباع

وايد امور متوفره لكن هل الشخص بيتنازل عن برجه العاجي و يتعب شوي

ما في غنى من غير تعب. او تفكير جيد

اتمنى محد يزعل من تعليقي لاني شفت وايد مروا على الفرص مرور الكرام بعضهم ضيعوا مستقبلهم بسبب سوء التخطيط او عدم الاستفاده من خبرات الاكبر منهم سن

[ابو عبدالله.]

مسائكم ورد

خلال هالسنه كذا شخص كلمني من المنتدى عن امور تدخل في تعديل الاوضاع و شراء بيت و تجاره و كذا شي ايضا

الي لاحظته ان الاغلبيه عندهم الاساس و الافكار لكن التوجه مش مناسب و ضغوطات الحياه تفقدهم البصيره لرؤيه الاهداف الاساسيه

مر علي وضع من خارج المنتدى ان ثلاث اخوات كل وحده مؤجره سكن منفصل و يدفعون ايجارات اجماليه 25500
كلهم منفصلات و عندهم بالياهل و الاثنين فقط و ضلوا بالايجارات كم سنه

لما ذكرت ان قيمه الايجارات اعلى من قيمه قسط لفيلا جديده او ارض و بنائها خلال سنه
الفيلا مليونين و 400 الف و تقسيطها على 15 سنه بقسط 19500 تقريبا

كان الحل موجود و اوفر لهم لكن البصيره مفقوده و الحمد لله. سمعت انهم يبحثون عن افضل نسبه مرابحه بين البنوك عشان يشترون بيت

مجرد مثال حبيت اطرحه للتوضيح بأن الفرص موجوده لكن تحتاج تفكير و البحث عنها حتى لو كانت نصيحه من افراد او طرق للتوفير


واحد الله يجزاه خير جلس معاي على الجوال بس عشان يسجل كل شي عن الميره و شراء الجمله و اسماء المنتجات الي عليها عروض و توفر الاف بالسنه

و زميل عمل يمر كم يوم و يسأل عن النقاط البنك و اوريدو و تحويلها و التذاكر بدون رسوم القطريه الخ

والله بلادنا فيها خير بس الدنيا و الضغوطات ارهقتنا

[بوعابد7]

المليون قبل عشرين سنه ،، تجيب لك اربع خمس بيوت شعبيه فالدفنه

المليون الحين اذا يابت لك 30% من قيمه بيت واحد في نفس المنطقه تحمد ربك
التضخم الي صار السنين الاخيره مب طبيعي..

لكن الحمدلله للحين الامور طيبه والواحد يحتاج يفكر صح ويخطط عالمدى البعيد

[(الفيصل)]

اووووف 2008 قلبت المواجع فيه أسماء اختفت للأبد الله يرحمهم حيين ام ميتين

طلعت اغبره بالمنتدى هااا
المشكلة اني أفتكرت أن بإثارتي الغبار ممكن يطلعون اللي أختفوا بس طلعت غلطان

[(الفيصل)]

معماري قطر ، بوعبدالله ، بوعابد جزاكم الله خير على المشاركة والإثراء
وأخص بالذات بوعبدالله من غير قصور فيكم

[داااايم السيف]

موضوع طيب بغض النظر عن تاريخ طرحه
بعض المواضيع مهما قرأت لايمل منها خصوصا لما تكون بقلم الفيصل
حقيقة استمتعت بالقرائه وخصوصا ماتفضل به الاخ بوعبدالله ولابه قصور في الباقين
بارك الله فيكم وجزاكم خير الجزاء

[ابو عبدالله.]

صباح الخير

اعتذر ما دخلت المنتدى يومين ثلاثه



تسلمون على طرح الموضوع انا ايضا استمتعت ومثل هالمواضيع مفيده جدا و بشكل ممكن ما تتصورونه

ما تدرون كم شخص يقرأه او يستفيد منه او يخبر احد عنه و عن التعليقات

الله يجعله في ميزان حسناتكم و غيره من المواضيع المفيده

ما عرفت اهميه هالمواضيع الا بعد ما كتبت من سنوات بمنتدى سابق عن امور مثل الانتقال للبنوك الاسلاميه و تطوير المعيشه و امور اخرى

تخيلوا يا جماعه الخير ان موظف ببنك اسلامي اكلمه عن نقل حسابات و سلف بعض الاصدقاء لهم

و متزامن مع طرح موضوع بمنتدى عن الانتقال لبنوك اسلاميه

قال لي شالسالفه. خلال كم يوم جاني 15 عميل بالاسهم يقولون فلان قال لنا نجيك عشان ننقل حساباتنا و سلفنا عندكم

غير بعض الرسائل الي جاتني بالمنتدى السابق تسأل عن افضل الطرق لاغلاق السلف و خفضها ليستطيعوا الانتقال لبنك اسلامي

شي بمليون وشي اكثر

اخوي الفيصل بعض المواضيع تقربك الى الله و تحببه فيك فقط لان غيرك استفاد منه او حل مشكله او وضع كان تايه فيه او طور وضعه او عقله للافضل

ناهيك عن دعوه لك بظهر الغيب من شخص قرأ شيء استفاد منه

و سأثلج صدرك بحادثه حصلت معي

خلال حيويه موضوع الانتقال لبنوك اسلاميه قبل عام 2012 جاتني رساله من اخت فاضله تسأل عشان زوجها الي تعب من البنك الربوي و قلت الي اعرفه من خيارات و امور ممكن تساعد

والله و بالله ان ارسلت رساله بعد فتره و قالت انه انتقل لبنك اسلامي و انهم راحوا العمره و دعت لي عند باب الكعبه

عن نفسي خنقتني العبره ما عرفت ايش ارد

من هالسالفه ايقنت ان الله يسخر من عباده لمنفعه الناس حتى لو بكلمه

ناس ما تعرفهم تتغير حياتهم و كأن الله جابك من بعيد لناس ما تعرفهم عشان الله يغير اقدارهم

موضوعك هذا ممكن يغير ناس كثيره. من اول ما طرحته الى الان. و ممكن ما تدري كم واحد غيرت حياته بحول الله

هذا يخليك تجتهد لما تطرح موضوع او شي و تفكر قبل طرحه و مدى فائدته وقد ما تقدر تخليه نافع

حبيت اشاركك و الاخوان جميعا بهذا الشي و انا على يقين اننا كلنا نبي الخير للجميع