اخ فواز
اتمنى افيدك بمشاركتي عن الودائع....تسمع وتقرا دعايات البنوك في الجرايد ومن الناس واكيد قريت هالموضوع...انا اوضح لك. البنك يعلن عن نسبة المرابحة اللي يعطيك اياها فقط اذا اودعت (حطيت فلوس في حساب خاص فيك عندهم من دون ما تسحب المبلغ) يعني رحت بنك من البنوك اللي توفر لك نسبة مرابحة (فائدة في البنوك الربوية, واسمها مرابحة في البنوك الأسلامية) وحطيت مبلغ مالي (بعض البنوك تشترط عليك مبلغ معين لكن الأغلبية من 25000 ريال وتعطيك نسبة الفايدة اللي تستحقها من ايداعك هالمبلغ في البنك)
نفترض عندك مليون ريال قطري ورحت مع رفيجك لبنك قطري عرض نسبة 5% فايدة لكل 3 شهور, يعني يطلع لك 5000 ريال لكل 3 اشهر وكثر مايكبر راس المال وتزيد المدة ترتفع الفايدة....بس بشرط ماتكسر الوديعه( اقصد بالكسر انك تسحب المبلغ من البنك وانت ما كملت المدة اللي متفق مع البنك عليها) هنا يرجع لك فلوسك دون ارباح
اود ان اذكرك, الفرق بين الأسلامي والربوي هي طريقة تشغيل فلوسك (الربوي يعطيك فلوس مقابل فلوس وهذا حرام في الأسلام, اما البنك الأسلامي فعلا يشتغل بالفلوس اللي اودعتا ويعطيك حصتك لأنك صاحب راس المال, وهنا حبيت اوضح لك ان مشايخ في كل مكان اقروا بحلال هذا المبلغ دون تطهير للمبلغ وفلوسك اعتقد تعمل بطريقة حلال)
هنا طريقة ثانية يستخدمها البعض لكسب مبلغ من المال بطريقة حلال في (بنك اسلامي) والفرق ما بين استثمارك في البورصة والوديعه (البورصة تستثمر انت فيها وراس المال علية خطر وانت موب متأكد من المبلغ اللي يطلع لك وبيكون على حسب حالة السوق, اما الوديع اتفاق مابينك وبين البنك, تعطيه مبلغ وتأخذ فايدة او مرابحة وراس مالك ثابت وتقدر تاخذه في اي وقت يعني ماعلية خطر)
اتمنى شرحت لك دون ملل واذا عند سؤال اكون سعيد بالأجابة
تحياتي