ايهما أفضل للحوش ( البلاط ) أو ( الأنترلوك ) ؟؟

[القناص]

سعره 21 ريال للمتر .

والتريله يوفرها لك صاحب المحل واسعارهم 1200 تقريبا .

والبلاط سميك جدا . وزن البلاطه -- 5 او 7 كيلو .ناسي كم بالضبط .

21 ريال بدون التركيب صح

[KhalidQ]

انا مسوي الحوش ب23 الف ريال انترلك

17 الف ريال قيمة الانترلك و 6 الف ريال شغل التركيب

الوالد مركب انترلك من 10 سنين و الصراحه الانترلك لو

مو تمام ما كان الرصيف انترلك

البلاط للغرف و الانترك للحوش

اذا ركبت بلاط ما تقدر تركب بيب ارضي اذا سويت ملحق

خارجي مع خزان ماي

اذا ركبت انترلك تقدر تشيله و تركبه مره ثانيه واذا صار

للحوش انخفاض او تضاريس تقدر تعيد ترتيبه من جديد

وهكذا تستمر الحياه (اش دخل)

[ريان]

21 ريال بدون التركيب صح

اكيد اخوي بدون تركيب

[حالي الذوق]

ليش توبه تركب بلاط ؟؟

تقصد الأنترلوك


الأنترلوك يجمع تراب
مكان يعيش فيه النمل
صعب تنظيفه

[فلان]

شوف اذا عندكم بزران يلعبون في الحوش خشيشه و رين ترى الطيحه على الانترلوك شينه والله يوفقك

[Khalid222]

في تقنيات جديدة قديمة غير البلاط والانترلوك العادي... Stamped concrete
صبية من الاسمنت والكنكريت او الجابرو مع الرمل تصب ومن ثم تشكل على حسب انواع الاشكال الموجودة عند الشركة الي اتعامل بمثل ها الحلول... مهم جدا النوعية .. انا ركبت الانترلوك وشكله خيالي.. والحين افكر في البلاط المعتق الي يعطيك الوك الاوربي... غالي بس يستاهل.... وانصحك انك اتكبر اماكن الزراعة وتخلى الانترلوك بس ممرات وتهتم بتتمديدات الماء والكهرباء قبل اي شي على الاقل تمدد البيبات الي تقدر تمرر فيهم الكهرباء والماء .. والافضل انك تعزل الاثنين... ...

[قطري عصامي]

نصيحه اخويه ، لا بلاط ولا انترلوك ، اضرب الحوش بصبية اسمنت احسن، هذا اذا بغيت شي يعمر ، اما البلاط واللانترلوك فمساوئهما معروف واذكروه الشباب فوق

[قناص قطر]

السلام عليكم

اخوي انا مركب بالاحواش بلاط سعودي ممتاز ويستحمل الشيول والسيارات الثقيله

اما المدخل الرئيسي للمجمع مركب انترلوك بس بشرط تحط تحت الانترلوك ديزل عن النمل والحشرات

والله الانترلوك زين ويستحمل وسهل تقدر تشيله باي وقت

[اّل ثاني 77]

وانا أفضل الأنترلوك

اذا تعرف مكان يبيع انترلوك خبرني ولا تهون !

ابشر

[khaldoon]

هلا والله بوحارب

لاحظت من ناس وايد انهم يفضلون يركبون بلاط كسر رخام على انهم يركبون انترلوك

الانترلوك لو ما دكيت الارضيه تحته و جابت نسبة دك لا تقل عن 95% mdd

و لو ما رشيت الارض من الحشرات من شركة مختصه و عطوك شهاده

و لو ما سويت صبية خرسانه مع شبك حديد 10*10 ملم كل 15-20 سم علشان اوزان السيارات بسماكه لا تقل عن 12-15 سم

و لو ما كان سمك الرمل المغسول (غالي بس افضل علشان النمل و هو نوعيته احسن طبعا) اكثر من 7 سم كحد اقصى (البودره قويه بس ممكن تنفخ فممكن تخلطها مع الرمل لو مسترخص)


و لو ما كان الانترلوك من النوع السميك اصلا (7سم+) (وما راح اقول الخلطه تحتوي على جرانيت لانه مجرد بيت)

و لو ما غطيت الانترلوك بالرمل بعد التركيب و مشيت عليه دكاكه متوسطة الحجم

لو ما سويت هذه الاشياء فالنتيجه التهبيط بالانترلوك و ظهور الحشرات

بس اعتقد انه بجميع الاحوال ما راح ترتاح من النمل الاسود

الانترلوك تقدر تفكه وتعيد تركيبه...و يبيله معلم

البلاط ربما اجمل بس زود ال expansion joints علشان ما ينفخ و يقب لفوق

تحياتي