الان الجزء الاخير من رحلتي الشيقه الى ماليزيا (( حصريا))

[المخلب]

السلام عليكم

نكمل رحلتنا كنا الله يحفظكم توقفنا عند بينغ وبعدها قمنا الصبح وتوجهنا الى السيف (( البحر )) لاخذ اماكنا وتذاكرنا لسفر الى لانكاوي احلى جزر الكناري <<<< شدخل احلى جزر ماليزيا

المهم يعني تبي تريح بالك تبي الجو الحلو تبي تبعد عن الزحمه والازعاج مالك الا لنجاوي


تبعد لنكاوي عن العاصمه مسافه يوم كامل بحر وتبعد عن بينغ مسافه 4 ساعات تقريبا بحر طبعا !

وهذي صوره السفينه الي ضنينا انها لنا



ماشوف الا الاخ <<< المرشد يقول لاء لاتحلمون هذي مركبكم



اسمها انجل اكسبريس <<< طل

انا عبالي انها مو شئ بس لما تدخل داخلها تحبها المهم نصيحه الي يجيه دوار بحر ومايقدر لازم يتصرف بحاله يجيبله كيس كامل علشان يزوع <<<<< والله يا كثر الي زاعو هناك

المهم وصلنا بالسلامه بعد ماغثنا زواع الشباب

ولما توصل هناك راح يطالبونك الماليزيين بفلوس على القاري >>> العربه

الي تشيل فيها الشنط انت هنا لاتعبرهم تراهم ملاعين حراميه ولاهم مسؤلين عن القواري ولا بطيخ

المهم الحمامات هناك بفلوس للنسوان تدفع نص رنجت اعتقد لدخول الحمرمه الحمام <<< كل شئ بفلوس ترى

المهم هذا النصب الي تشوفه هناك اول ماتوصل نصب الصقر

يقولون انه يحمي الجزيره <<<< والله الحامي الله والصلاه على النبي





يتبع ...

[ضايق الصدر]

يسلموا يا مخلب على المجهود

[المخلب]

ويعد المركب خذنا باص الى الشاليهات الخشبيه الي جلسنا فيها

وطبعا هذا منتجع احلى منتجع في لنجاوي وهو منتجع يعني راح تستانس منه كل شئ طبيعي والبوت خشبيه ومكيفه لاتخافون بس صج يعني منتجع يبرد على القلب وطبعا الانقليز يعرفون وين يسكنون فما تلاقيهم في كل ماليزيا بكثره الا في هذا المنتجع !

المهم هذي صورته





طبعا المنتجع يبعد عن المطار الرئيسي نص ساعه تقريبا وعن المراكب ساعتين ونص



هذي بركته ماسبحت فيها للاسف

زين وفي الصبح قعدنا من النوم ورحنا الى حديقه (( Under water world ))

عالم ماتحت الماء

هذي تقدر تقول عنها اكبر مدينه للحيوانات المائيه في ماليزيا جميع انواع الاسماك والطيور المائيه فيها

خوش حديقه والله طبعا هو مبنى مكيف ويعيشك جو البحر باقسامه المرتبه







وهذي تقدر تقول عليها اكبر هاموره شفتها بحياتي <<< مامزح ضخمه بس الصوره المشكله ماتوضح حجمها الحقيقي .

يتبع ...

[المخلب]

بعدها رحنا حديقه التماسيح !

وهي حديقه تبعد مسافه ليست ببسيطه عن الحديقه المائيه

لكن مشكله حديقه التماسيح انها مو حلوه يعني خساير فلوس على الفاضي لكن الي يحب يشوف احفاد الدينصور التماسيح يروح هناك ويشوف احجامهم كلهم حقيقيين وكبار وفي الصوره توضيح لحجم التمساح وهم ياكلونه طبعا ياكلون التمساح دجاج ني كل 5 ساعات في اليوم الواحد يعني تقدر تقول 3 مرات في اليوم ! هو عرض هو غدى في نفس الوقت



بعدها رحنا لشلا لات الموت !

يعني اسمها يخرع لكنها احلى شلالات تشوفها بماليزيا شلالات من النوع المغري للسباحه للي رايح لحاله ولابس شورت يقدر يطب هناك ويسبح !











يتبع ...

[المخلب]

ورجعنا بعدها للمنتجع ولكن لان الواحد يومه طويل ومابيخلص فقلنا ناجر لنا مواطير <<<< موتر سيكل

مو ننجا لا شئ اقل بس حلو مع اني اول مره اسوقه بس ابدعت اجرنا الواحد بـ 30 رنجت لمده نص يوم كامل تدور فيه داخل لنجاوي على راحتك بدون ماحد يكلمك !

واليوم الكامل بـ 50 رنجت يعني يازين الرخص

جدولنا ثاني يوم ! الصبح رحنا لجبل لنكاوي اطول جاعلى جبل بعد جبل جنتيك يعني ارتفاعه رقم 2 في ماليزيا تقريبا 710 قدم فوق البحر !



في الصوره في جزيره على اليمين هذي الجزيره تبع المنتجع حقنا تقدر تروحها مشي وبدون فلوس يا حلاتها !



ثاني يوم كان يوم مفتوح يعني وين ماتبي تروح روح !

فقررنا نروح الى الجزيره الحامل وجزيره القرود وبحر الصقور ....

بس كان عليها رسوم رسوم التنقل بس الواحد كم مره بيروح هناك !

وهذي صور الطريق قبل مانوصل للجزيره



هذي حلبه السابق للننجا من النوع هوندا !

يتبع ...

[المخلب]

وهذي الصوره لمزارع الارز (( العيش )) هنا تحصلون برك ماي فيها حبوب الرز



وهذي صوره للعباره الي بتاخذنا للجزر



هذا فندق الي يملكه الممثل المشهور الامريكي (( توم كروز وداخله مركب ))




هذي هي صوره للجزيره الحامل ! دقق في الشكل وبتشوف وجهه وحده منبطحه ولها بطن كانها حامل



صوره اخرى لنفس الجزيره


احدى الجزر المحيطه بها



داخل الجزيره الحامل في بحيره من محاطه بالجبلان يعني ماي نقي مثل مايقولون لكن انا شفته مليان ذبان وحشرات يعني ماينفع تسبح فيه بس في روايه قالنا عليها المرشد انه في وحده كانت ماتجيب عيال ! فلما سبحت فيها حملت ؟؟؟؟ والله انا مستغرب كل شئ من الله حيياه الله


القوارب ذي اجارها بـ 50 رنجت لشخصيين ! طبعا في واحد يمشي بمكينه وفي نوع بدون مكينه يعني برجولك

طبعا ماننسى القرود هنا وربي اذا مانتبهت على عيالك الصغار او اغراضك اسمحلي اقولك القرد اقربلك لانهم شبه مفترسيين






جزيره من الجزر



هذي بحر الصقور هنا تقط لهم لحم تشوفهم ينزلون وياكلونه مليانه صقور بس لما جينا مافي الاه 3 او 2 بس ! دقق في الصوره وشوفهم










هذي جزيره بالنسبه لي احلى جزيره من ناحيه الرمل ! رملها نقي جدا



شوفوا احم احم >>> علشان نبين انا احنا اول قطريين نزلوا على هذي الجزيره رسمنا لكم قلب وحطينا داخله كلمه قطر ! بس طلع نايس انشاء الله واظح وياكم


يتبع ...

[المخلب]

بعدها رجعنا للمنتجع وكان الوقت المغرب تقريبا !

فالشباب سوو اجتماع عذري او استثنائي ! شيقولون فيه !! يبون يغيرون من جدول الرحله يقولون حجزنا في الطياره لكوالا لمبور ماتم ! فلازم نجلس يوم زياده في لنجاوي ! طبعا هنا الكل زعل وضاقت نفسهم من التغيير ! لانه حلاته تجلس في كل منطقه 3 ايام بس ! لا تكثر لانك بتمل خاصه اذا تغير الجو !

فقرروا انهم يغيرون مكانا من المنتجع الى الفندق ! <<< فندق



هذا هو الفندق لكنه افضل شئ فيه ان تحت سوووق بس شنو سوق مليان خليجيين ورخيص سعره حلو وحصلنا قطريين فيه ! >>> اول مكان احصل فيه قطريين غيرنا !

ماعلينا ثاني يوم رحنا لكوالا لمبور بالطياره وتمينا هناك 3 ايام تقريبا ! طبعا جلسونا في فندق قريب من السوق الصيني ! اعتقد الكل يتكلم عن السوق الصيني وانه ارخص سوق ومادري ايش ! كلام فاضي والله انه اغلى مكان بالنسبه لنوعيه البضايع الصينيه المقلده والتافهه

المهم مقابل فندقنا الي بكوالا لمبور في محل اسمه مايدين ! <<< تذكر هذا الاسم هذا ارخص سوق بكوالا لمبور كلها وبضايعه حليوه تقدر تشببه بالرامز الي في قطر ! بس عنده اغراض تنباع في السوق الصيني وسعره اقل منهم بكثير تقريبا النص

وبعد اسبوعين بالضبط رجعنا الى المطار الساعه 7 الصبح وركبنا الطياره السرلنكيه الي نزلتنا في كولمبو ترانزيت بعدها ابوظبي بعدها البحرين ومن البحرين ريحنا بالنا بالطياره القطريه الى قطر ! ومنها بتكسي نصنا في البرتقالي ونصنا في كروه الى بيتنا ولله الحمد

وبكذا انتهت قصتي الي بديتها من اول اسبوع رجعت فيه الى قطر وانهيتها اليوم اسف للتاخير وذالك بسبب سفر مفاجئ والبارحه رجعتفقلت لازم اخلص الموضوع واريح باللكم والف شكر لانتظار مواضيعي عن رحلتي الى ماليزيا الاسيويه بيت المغامرات وانسب الاماكن للمتزوجين الجدد .

انشاء الله عجبكم الموضوع
تحياتي لكم اخوكم المخلب

[abo rashid]

يعطيك العافية
شي جميل

[كويتي فهمان]

مشاء الله عليك
خلاص السنه الجايه تروح معانا مرشد لا تقول ما عندي اجازه ولا مشغول

مو بكيفك امر من الاداره العليا للقوات الماليزيه
خخخخخخخخخخخخخخخخخخخخخخخخخخخخخخ

[المخلب]

بوراشد تسلم على المرور الجميل هذا
ههههههههه تشكر يا كويتي باذن الله اذا الله قدرنا وديناكم ليش لاء بس اسعارنا رمزيه وخاصه <<<< اماه الي يسمع يقول صج عاد .

اهم شئ عجبكم الموضوع ! والله يسلمكم قولوا امين