اقتراحات بشأن تطوير النسخة الثالثة من برنامج سوق الدوحة

[bodaay]

السلام عليكم
تقريبا خلصت من النسخة الثالثة من ناحية برمجة ..
بس باقي اقتراحاتكم طبعا قبل مانزلها.. مابي انزلها الا وهي كاملة.. ومابي حتى اعرض اي شي منها الا وهي كاملة.. بس بحط شلون بتكون طريقة العرض
ذكرت من قبل انه مميزات النسخة الثالثة.. انها تعرض كل الشركات في وقت واحد
- مع التحديث التلقائي.. يتغير لون الشركة(نفس فكرت الموقع الرئيسي)
- وميزة جديدة ولو اني لين الحين مابديت اشتغل عليها.. الي هي عرض السوق حسب البيع والشراء(الفكرة الجديدة في موقع سوق الدوحة الرئيسي)
- طبعا نفس النسخة الي قبلها.. تكلفة التحديث او العرض 3 كيلوابايت فقط
صورة لطريقة العرض..لين الحين ماكملتها طبعا.. بس حاب اعرف اقتراحاتكم.. وهل الجدول لازم يعرض كل البيانات ولا جزء منها..

واذا جزء منها .. شنو البيانات الأساسية الي لازم تكون معروضة
واتمنى من الجميع المشاركة حتى لو ماكنت بتستخدم البرنامج

اخوكم بودعي

[بولينجر]

أخوي بودعي...

مشكور على المجهود الواضح الذي تبذله...

بالنسبة للاقتراحات:

يفضل أن تعرض جميع الشركات في صفحة واحدة...

ثم تجعل هناك إمكانية لتشكيل لوحة مراقبة مثل اللي موجود بالتكشارت...

يعني الواحد يحط الشركات اللي حاب يراقبها في قائمة لوحدها...

وتكون customized يعني كل مستخدم يحط الشركات اللي يبيها

وباقي الأعمدة بالمثل..

يعني الصفحة الرئيسية كاملة....

ويمكن للمستخدم تحديد مايريد منها في لائحة المراقبة الخاصة التي يكونها...

ولك جزيل الشكر....

[KhalidQ]

عطنا نسخة القديمة

[bodaay]

موجودة على هالموقع.. البرنامج ترى بس حق البوكت بي سي
ومشكور اخوي بولينجر على الاقتراحات

[سهم طايح]

بودعيي

يعطيك العافية على المجهود الجبار اللي قاعد تسويه

بس في نقطة مهمه في اعتقادي

الواضح من الصورة انك حاط جدول اسعار الاسهم بالكامل

يعني لازم اللي يبي يعرف النتائج يسحب الصفحة يمين ويسار واعتقد ان هذا الشي مزعج

وللعلم النسخة القديمة مافي احسن منها لكن الغريب انك ذكرت ان حجم التحديث الواحد 3 كيلو بايت وانا جايتني فاتورة جي بي ار اس خيالية مع اني ماشتغل الا على البرنامج فهل زاد حجم التحديث ؟

واذا ناوي تحدث البرنامج

اقترح عليك انك ماتدرج جميع البيانات علشان ماتكبر شاشة العرض واللي يبغي يشوف البيانات يضغط على اسم الشركة وتطلع له بياناتها كاملة

المهم انك تضيف
1- افضل عرض
2- افضل طلب
3- اخر صفقة

وان شاء الله يكون حجم الصفحة صغير

مجرد اقتراح

[bodaay]

الشيخ انا متأكد من حجم الملف.. مب مصدق.. هاي الملف الي آخذه من الموقع الرئيسي.. وارتب البيانات منه
www.qatarsoul.net/lq.asp
وتسلم اخوي على الاقتراحات

بودعي

[BO KHLIFA]

انا من رائيي أخوي أن اتخلي البرنامج مثل ما هو وتضيف اشياء جديده عليه مثل الادوات الحسابية حساب اللمت آب واللمت داون لليوم وغدا آليا .. حساب الدعم والمقاومه .. امكانية فتح محفظه صغيرة للمستخدم من أكثر من كمية أو اكثر من شركة وحساب متوسط الشراء ..

البرنامج اخي الفاضل يفي بالقرض ويفي بالمطلوب مئه بالمئه .. لكن ماذكرته سابقا هو ماينقص البرنامج ..

ثانيا قبل طرح البرنامج لازم اتشوف حل حق مشكلة الحقوق كل هالتعب واخرتها ينسرق شيء يحطم الصراحة ..

[bodaay]

دام كذا شخص كان مع فكرة اني ماغير النسخة الثانية بس اضيف عليها.. انشالله بشوي هالشي
بالعكس صار الشغل اسهل
واخوي بوفهد على سالفة الحقوق.. ربك فوق
مادري عندي فكرة يمكن تضايق ناس وايد اذا قلتها لكم.. بس مادري اشوف انه شي جيد لو اسويه
النسخة الجاية مابتكون مجانية..كم قيمتها .. هالشي والله انا مابحدده.. الي يمكن اسويه..
اني اعطي البرنامج حق جمعية قطر الخيرية.. والي يبي يحصل البرنامج ياخذه من عندهم بمبلغ هم يحددونه.. وطبعا كل الي يندفع يروح حق اعمال الخير.. منه الأجر لي ولكم انشالله..
وبصراحة ادري انه في ناس يمكن يتضايقون من هالفكرة.. بس مادري.. انشالله الأغلب يكون معاي..
وانشالله لين رجعت الدوحة على آخر شهر 12.. بحاول اتفق مع جمعية قطر الخيرية.. وبتكون الحقوق لهم هم مب لي انا ..
بحاول قد ماقدر اني امنع اي حد من انه يكسر حماية البرنامج.. لو استخدمت 512 بت انكربشن..ومادري.. الي بيكسر حماية البرنامج قاعد يخرب عمل خير.. يريت لو اسمع رايكم في هالفكرة.. وطبعا بتم انا شخص مجهول غير معروف الا باسم بودعي
اخوكم بودعي