سؤال مبدأ الحيطة والحذر

[جمال النعيمي]

اخوتي ارجوكم المشاركة جميعا لانني ساطرح هذا السؤال على استاذنا بشير الكحلوت

ولماذا هذا السؤال من البديهي اترك فراغ عرض يتبعة طلب متزايد

واما استشارة بطرح اسئلة على اشخاص غير مرخصين للاستشارة في استثمارات الناس هذا لايجوز ان اختزال جموع المستثمرين في شخص واحد ، اليس لنا عقول نحن ليس قاصرين وليس محتاجين الى مستشارين او حتى تحكم السوق في تحديد الصعود والنزول هذا تسويق وهم اننا ليس لدينا القوة لاتخاذ القرارتنا في حرية استثماراتنا

اقول شكرا على هذا الترويج للخبير الغير مرخص وكفى

[ابوعلي اليافعي]

صراحه انا بالامس دخلت على موقع الكحلوت واكتشفت بان هذا الانسان لا يمت للخبره بصله ربما يكون خبير في اشياء اخرى غير البورصه القطريه بل على العكس فان معظم ردوده تهبط المعنويات ..وفيها استرخاص للاسهم القطريه مثل قوله بان الصناعات ستعود الى ال180والناقلات لا تسوى اكثر من70..ونصحه للناس بعدم الشراء اول يوم تداول فناقلات الغاز...صراحه كلام غريب وفيه اشياء كثيره مبطنه لا داعي لذكرها...

[الرمز]

والله ثم والله ماخسرني في السوق الا ذيك الايام لي كنت اتبع فيها كتابات الكحلوت والحمد لله الحين لا اقراء سطر يكتبه لاني بصراحه اشك في نواياه
واذا انتي يا ختي موزه ناويه على الخساره الله يعين
يحاول يحبط من همم القطريين
ولا انسى موضوعه كتبه عن التستر وكان معارض له ويقول بان التجاره والعمل الاقتصادي قائم كله على الاجانب وان القطريين مجرد ديكور بالاسم .

[ابوعلي اليافعي]

الاخ شرياص كلامك 100% صحييييييييييييييييييييييييييييح...

[lol]

الكحلوووووووت

[سلطان]

السلام عليكم

شباب انا استغرب كلام البعض اللي يقول ان الاسعار بتنهار بعد الاجانب

صدقوني لو يوم 3 ابريل ولا اجنبي دخل السوق الاسعار راح ترتفع

لسبب بسيط ان الجو العام ونفسية المستثمرين راح ترفع السوق

كذلك هناك نقطه هامه ايضا ان اللي راح يتحكمون بالسوق هم القطريين

حتى بعد دخول الاجانب لان الاجانب النسبه الفعليه لهم بسيطه وفي احسن الاحوال 25 بالمئه

بالنسبه للشركات الغير حكوميه , وشفنا ايش صار بالسوق الشهرين اللي فاتوا والى الان لم يدخلوا

الاجانب رسميا , اما بالنسبه للكحلوت فلا شك انه رجل له المام بالاقتصاد بشكل عام ولكنه ليس خبير

في مجال الاسهم ومن خلال ملاحظاتي لكتاباته وردوده لم اجد اي تحليل فني , ولا اذكر انه في يوم

تحدث عن التحليل العلمي للاسهم او انه شرح في يوم من الايام اتجاه سهم شركه معينه من خلال

تحليل منحنى الشركه او في يوم تحدث عن الشموع اليابانيه واهميتها وشموليتها في التحليل

الفني , وقبل كم يوم استشاره احد زوار المنتدى في سهم مطاحن فقال له على الفور لا تشتري

السهم سينزل والسوق في فترة تصحيح ومن ثاني يوم سهم مطاحن في ارتفاع الى يومنا هذا, كذلك

الى هذا اليوم تنصح شركة جلوبال بالاحتفاظ ببعض الاسهم القطريه وتنصح المستثمرين للفترات

المتوسطه بالاحتفاظ فيها .

ولا شك اننا جميعا معرضون للخطأ ولكن من قال لا اعرف فقد افتى وعندما يستشار شخص

يفترض انه خبير في السوق لا بد ان يذكر الاسباب في نصيحته في الشراء او البيع وليس

فقط عناوين عامه ليس لها علاقه باساسيات تجارة الاسهم .

فضلا عن ذلك اتجاهه لسياسة العقاب الجماعي في قفل منتدى الزوار او الاستشارات اكثر من

مره و تضخيمه لاعتراض السوق على نقله شريط الاسعار ومحاولته اقحام وزير الاقتصاد في

الموضوع .

[سهم طايش]

يوم الاحد اللي فات كان لقاء مع الكحلوت في التلفزيون

اتصل فيه واحد قال يا اخي انت تحليلاتك كلها عكسيه و لا مره شفت لك تحليل عدل مثل الناس كل تحليلاتك عكسيه

اقول لكم انصفق وجهه ههههه

يبه سوقنا لا يخضع لأي تحليل او منطق المحللين هم نفسهم المضاربين و الهوامير

انا من شفت المساهمين يبيعون اسهمهم في الصناعات قبل انعقاد الجمعيه بيوم بالمت داون عرفت ان السوق لا يخضع لاي تحليل و المشكله بعد توزيع الارباح بيوم صار ينباع سهم الصناعات باللمت اب !!!

شي غريب و محير و هذا يدل على ان اكثر المضاربين معا الخيل يا شقراا

لا ينفع معاهم تحليل و لا اشعة

[امواج]

السلام عليكم ورحمة الله تعالى وبركاته

صار لي فترة تقريبا وانا اتابع منتداكم ... بس هالموضوع شدني وحفزني للمشاركة فيه لأول مرة ... صحيح ان خبرتي في الأسهم قليلة او الأسهم القطرية بالذات لأني عادة أضارب في البورصة الأمريكية ..( لا تغترون فيني بس دخولي البورصة الأمريكية للأستفادة والتعلم بالدرجة الأولى والربح بالدرجة الثانية) ...
اللي ابي اقوله لكم يا جماعة الخير أن البورصة القطرية تختلف عن البورصات الدولية اللي السهم فيها خاضع للعرض والطلب مش من خلال نسبة مئوية يتحرك خلالها أرتفاعاً وهبوطاً ... وطبعاً هالشي زين شين .. لكن حاليا أكيييد أنه شي زين وممتاز للشعب القطري لأنه فيه حماية لصغار المساهمين وعموما سالفة الأسهم جديدة على اهل قطر فالنسبة المئوية تحميهم من انهم يروحون فيها ويصير فيهم مثل ما صار في سوق المناخ في الكويت .
نرجع لموضوعنا .... لازم تتأكدون من شي واحد وهو ان جميع الشركات المساهمة سواء الكبيرة أو الصغيرة ناجحة ولها مستقبل ... ليش ؟؟؟
لأن دولتنا في مرحلة نمو وتطور وجدامها بأذن الله مستقبل كبير ونهضة في جميع المجالات ... يعني بالعربي إذا أسهمكم ما جابت لكم ربح بعد شهر أربعة تأكدوا وأخذوها مني كلمة أنكم أذا أحتفظتوا بها ما راح تخسرون على المدى الطويل ... بالعكس بتربحون اكثر ( أسهم مجانية - أرباح - زيادة راس مال... الخ) ...
أحتفظوا بأسهمكم وخصوصاً شركات الحكومة وهي الصناعات والناقلات لأن هالشركتين اعتبروها ضمان واستثمار طويل الأجل ولا تفرطون فيها ... اللي يفرط فيها كأنه يفرط في قطعة من بلاده ولا تنسون أنها أقتصاد دولة واستثمار للأجيال القادمة..
نصيحة ... لا تستعجلون وناخذون قرار البيع بعد دخول الأجانب ألا بعد ما تشوفون أوضاع السوق وتحركاته ... اذا انتوا في الأسهم من سنتين او ثلاث او عشر ... الأجانب صار لهم عقود وسنين في الأسهم ولهم خبرة طويلة ويعرفون اشلون ياخذون السهم بالسعر اللي يبونه لأن الأسهم لعبتهم المفضلة..

وأسمحوا لي على الأطالة

أختكم

أمواج

[البروكر]

اتمنى المشاركه في الموضوع علشان ابدي رايي .... لكن مااحب اصير ملقوف .. وادخل في خصوصيات جلوبل اوووه قصدي بشير الكحلوت ....لذالك

لاتعليق .....

ولا رد .......


وتحياتي لك ياموزه السويدي

[البروكر]

تعليقا على كلام الاخ السهم الطايش احب اقول انه صار لي موقف مع خبير ومحلل مالي جاي عندنا في قطر علشان يعطي دورات في فندق الماريوت عن اساسيات الاستثمار في الاسهم والسندات...الاخ يقول انه عندما اطلع على نشره الاصدار الخاصه بالصناعات القطريه بأنه لم يكن مصدق او مقتنع بأنها تباع في السوق على 55 ريال لانه قول انها لاتسوى الا ثلاثين ريال على حسب قوله اذا طرحت في السوق كما اشار بأنه باع اسهم الصناعات لناس كان يدير لهم محافظهم في السوق السوداء على سعر 50 لانه لم يكن متشائم منها ....وفي اليوم التالي كان يقول بأن افضل سهم في السوق هو الصناعات وانا السعر العادل له هو 150 وان الشخص اللي يبيعه خسران ...وهنا حصل التناقض ...وذكرته بكلامه امس ....تصدقون تغير وجهه وقام يضحك .... وهو يقول لي بعدين اقول لك بعدين اقولك ..... وصار لي الحين ست اشهور للحين ماقال لي شي ولا ادري وينه بعد .... بس عطونا هالشهاده اللي والله ماستفدنا منها شي .....