مشاهد استوقفتني ...

[غيمة مطر]

... السلام عليكم..

هذا موضوع كتبته من فتره في احد المنتديات وحبيت اكتبه مره ثانيه بهذا المنتدى ....

---------------------------------------------------



في احد الايام كنت واقفه عند احدى مطاعم الوجبات السريعه .. وتاخرت وانا انتظر الطلب وشفت 3 مواقف في اقل من نص ساعه ..
ومواقف اثرت فيني بصراحه ...

المشهد الاول ..

دخلت بنتين .. شبه متبرجات .. من انواع الميك اب ونص الشعر طالع والعبايه كنها فستان عرس .. دخلو المطعم وطلعو بكيسين فيهم طلباتهم ...
وكان في عامل نظافه نايم جنب المطعم .. جات البنت وقدمت له الكيس ومشروب غازي بارد ...

فرح هالعامل فرحه مب طبيعيه .. وشفت هالشي بعينه .. فتح الكيس بلهفه وقعد ياكل بطريقه المحروم من الاكل فتره طويله ... وعينه مافارقت سيارة هالبنات لين ابتعدت بعيد عنه ...

المشهد الثاني ..

وقفت جنبي سياره فيها شاب في مقتبل العمر .. وجات عجوز ( بائعه متجوله ) تبيع مصاحف .. فتح لها نافذة السياره .. قالت له انا ابيع مصاحف المصحف بخمس ريال ..
اخذ المصحف وعطاها مية ريال ... العجوز وايد استانست راحت وبعد 5 دقايق رجعت له وهي فرحانه ودار بينهم حوار ماعرفت شنو بس ان العجوز راحت وهي في قمة سعادتها ..


المشهد الثالث:
عائله قطريه قاعده تاكل بالمطعم ... الام والاب وعيالهم ومبين عليهم عائله تعرف السنع من لبسهم وطريقة اكلهم ولكن؟؟؟
الخادمه مقعدينها على طاوله ثانيه تشوفهم وماشرو لها اكل ؟؟؟!!! وانا انتظر الطلب لقيتها طالعه معاهم ولاحتى في يدها كيسه كنت اقص على نفسي واقول يمكن ماخذين لها في البيت بس الخادمه مااكلت شي ... وهالشي كان مبين من نظراتها ومن حزنها ..

بصراحه 3 مشاهد اثرت فيني وااااااااااايد
وقلت فعلا الناس مب بالمظاهر ...
وان على نياتكم لترزقون ...
سبحان الله يمكن اللي فرحو هالمحتاجين يدعون لهم دعوه في ظهر الغيب دعوه تبعد عنهم الاذى وتوفقهم

ويمكن هالخادمه تدعي على العائله فيصيدها ابتلاء من رب العالمين

(( تصدقو فان الصدقه تدفع البلاء ))

وصدقوني مافي احلى من انك ترسم ابتسامه على شفاه انسان بائس ...

دمتم بود قراء موضوعي

[almulla]

برأيي ان المقال يشجع على التسول المبطن

للاسف احنا شعب ينكسر خاطرنا بسرعة

صدقوني مافي متسول فقير هالايام

ويعطيج العافية اختي شهد وبخصوص موضوع الخادمة

بالعكس احنا نعطيهم ويه زياده والاكل اللي ياكلونه هني مايحصلون نصه في بلادهم

وبعضهم يتدلعون ماياكلون من المطاعم مثلا بس ياكلون اندومي احسن توفير خخخ

[professonal]

موضوع فعلا مؤثروالله يرزق الجميع على نياتهم والله يوفقج

[غيمة مطر]

اخوي الكريم ..

مو كل الناس متسولين ... ممكن هالمرأه العربيه محتاجه فعلا .. وماقامت تتسول بالعكس تاجرت شرت شي وباعته باغلى شوي من سعره عشان تكسب الرزق الحلال ... وماطلبت اكثر من سعر المصحف ..

والشخص اللي من جنسيه اسويه يتشغل بالبلديه ينظف وماكان يطلب شي ...

يعني اشخاص ماتتسول ...


والخدامه اذا انت تعاملها عدل في واااايد ناس يعاملونهم معامله سيئه ... واسال مكتب الخدم عن كم خادمه تنظرب وينعلن بوخامسها غير المعامله السيئه ...

.........................................

يمكن نكون شعب قلبه طيب بس مافينا سذاجه ....

شكرا لمرورك اخوي الكريم والمداخله

[غيمة مطر]

موضوع فعلا مؤثروالله يرزق الجميع على نياتهم والله يوفقج

شكرا لمرورك الكريم والله يوفقنا جميعا

[almulla]

اترك الاعضاء يردون وبعدين اقول وجهة نظري

لو تشوفين مواضيع التسول السابقة الاعضاء ماخلو شي بخصوص عمال البلدية والبياعين المتجولين

[غيمة مطر]

اترك الاعضاء يردون وبعدين اقول وجهة نظري

لو تشوفين مواضيع التسول السابقة الاعضاء ماخلو شي بخصوص عمال البلدية والبياعين المتجولين

وجهة نظر اقبلها واحترمها ..

وكل شخص يرى الموضوع من زاويه معينه ...

وهذا منتدى نشارك بعض افكارنا ...

دمت بود

[أمة الله]

بالفعل الناس مخابر ماهي مناظر والحمدلله فيهم الخير


- عورني قلبي عالعامل وتخيلت شكله وهو فرحان باللقمه اللي كتبها له ربي من يد البنت والله يجزيها كل الخير يارب...سبحان الله ربي سخرها له.....والله يجزي الشاب كل الخير بعد ويعطيه على قد نيته يارب

[ســـهم]

شكرا أختي شهد

وبالنسبه لي أفضل التصدق على السائل والأجر من عندالله سبحانه وتعالى هو الذي يعلم ماتخفي الصدور

وليس نحن ..

[غيمة مطر]

اختي امة الله

فعلا فرحته ماتوصف والله وماقدرت اعبر عنها اكثر... مشكوره على المرور وتعطير موضوعي

اخوي سهم

الله يجعلك من اصحاب اليمين.. والله يرزقك على قد نيتك .. فعلا السائل يمكن يكون محتاج فعلا .. والله يكتب لنا الاجر ان شاء الله