حزني كبير ولا لقى من يواسيه
كن الخلايق مابهم روح رجال
حتى ف خيالي عاجزة لا الاقيه
الشهم ابن القرم والطيب الفال
ملت حروفي دايم الدوم تدعيه
ليتك تجي يا شاغل الفكر والبال
ابغيه شاعر يرسم الحسن والتيه
يكتب بي الاشعار من قلب مختال
وابغيه عاشق لا حكى قال لبيه
لبيه عمري جيتك الساع بالحال
وابغيه فارس يهزم الحزن واعطيه
نيشان قلبي يفتخر بين الابطال
وابغيه ياخذني في حضنه ويديه
لا شاف دمعي فوق هالخد همال
وابغيه يفديني بروحه وانا افديه
ونرجع ورى نلعب مثل لعب الاطفال
وابغيه يسمعني اذا جيت احاكيه
وارمي همومي فوق صدره والاحمال
وابغيه لا صاحت عروقي تناديه
القاه موقف يلوي الضيق بافعال
وابغيه ما يصاحب بنات واكفيه
ميشوف غيري بالنسا عشق ووصال
ما ابغيه طايش وابتلش في بلاويه
ما يجيب راسي كل من يلبس عقال
وما ابغيه ماشي بين الاسواق يرميه
رقمن مميز حتى لو شاف تمثال
وما ابغيه كل كلمة تجيبه توديه
يا ويل حالي لا غدى مضرب امثال
وما ابغيه يكسر خاطري دوم وابكيه
كسر الخواطر يبعد الحب لاميال
وما ابغيه يلعب في شعوري واسميه
كذاب خاين ناقض العهد محتال
وما ابغيه جاحد منكر الحب ما ابغيه
الحب سامي رغم تبديل الاحوال
وما ابغيه تافه يحسب العمر مافيه
غير التكشخ بين موتر وجوال
هذي صفات اللي بغيته واناجيه
ان كان فيكم يبعث الحين مرسال
وقلبي كبير وحزني اليوم يرثيه
دام الخلايق ما بهم روح رجال
كلمات شاعرة الاحزان
|
المشاركة الأصلية كتبت بواسطة فارس الكلمة
