عجبي عليك يا أبن أدم يا كبير الدار
قومت الدنيا و ما قعدت لما قالوا حمار
هو أسمي شتيمة ولا جنسي ده عار
خلقني ربي و خلقك ولا حدش له خيار
و أنا مهما زاد الحمل فوقي صابر على المشوار
ولا في يوم أقول أشمعنى أخويا و أخد منه تار
ولا يوم أبص لرزق غيري و أطق منه و أغار
ولا أرفع في يوم عيني على جارتي و أصون الجار
ولا مهر أدفع لحمارتي و شبكة و أسوار
ولا فيلا أجمع ثمنها و خرابيط و أجهز دار
ولا حرمي حامل و تتوحم و عايزة كافيار
ولا بنت تخرج عن طوعي و تجيب العار
ولا أبن يدمن و يهلوس و يقع و ينهار
عايش في حالي متهني ولا شفافية ولا أسرار
باكل و بشرب و أنهق بحرية ولا سوبر ستار
و عندي أبن أدم يخدمني ليل و نهار
ان جعت يشتري برسيمي بأغلى الأسعار
خادم أمين من غير راتب ولا حتى أيجار
و الحين عرفت يا بني أدم مين فينا الحمار
|
المشاركة الأصلية كتبت بواسطة بدور
