السلام عليكم ورحمة الله

أخوي أولاً بسبب علاقتي بهالجامعات أقدر أقولك أنهم يطلبون نسب مرتفعة بس مايشترطون شي معين

لكن عليك تجيب التوفل فوق 550 وامتحان السات SAT بعد بدرجة معينة نستها
وفيه عقبها مقابلة وامتحانات قبول خاصة فيهم ولازم تكتب مقال Essay

أنت أهم شي أنك تروح وتزورهم وتشوف متى اخر موعد الطلبات وبعدين تشوف شنهي طلباتهم وعقب فكر في جهة الابتعاث
لان أي جهة ابتعاث بتقولك اول شي جيب القبول من الجامعة واحنا بنطرشك بعدين

على حد معلوماتي وايل كورنيل محد يبتعثك فيها إلا المجلس الأعلى إذا كنت قطري أو ابن قطرية وجبت القبول من الجامعة
ويمشونلك راتب , نسيت المبلغ كم بس اتوقع مب اقل من 5000 شهرياً

أما إذا ماكنت قوي في الانجليزي والرياضيات ومب متأكد لين ألحين فالجسر الأكاديمي هو خطوتك الأولى

الجسر عبارة عن سنة يأهلونك فيها من كل النواحي للدراسة في أي جامعة من الجامعات ( يعني مايدرسونك عشان تخصص معين)

يعني حتى عقب الجسر تقدر تقرر أي مجال تقدر تروحه

والدراسة في كورنيل ياخوي شوي صعبة ( مب قصدي أخوفك بس أبي أحفزك ) ويبيلها تفرغ كامل

وهي عبارة عن سنتين pre-medical وعقبها يعطونك امتحان مدته تقريباً 8 ساعات
لوجبت النسبة اللي يبونها بتكمل باقي الأربع سنين اللي هي medical years

أما لاقدرالله لو ماجبت النسبة عقب السنتين تطلع من الجامعة

وهاذي صارت لناس وايد أعرفهم شخصياً وحولوا عقب جامعة تكساس أو قطر هندسة

وفي الختام ياخوي لو أنك مصمم على الطب توكل على الله والله يوفقك وان شاءالله انك قدها

لكن انصحك تفكر في تخصص الهندسة لانه تخصص وااايد حلو ويفتحلك مجال واسع في الشغل

ونص شركات الدوحة اذا مب كلها تدور على المهندسين القطريين دواره

وحتى وضع المهندس المادي في هذه الفترة أفضل بكثير من وضع الطبيب العام والفرق في الراتب يوصل أحيانا إلى 20000 ريال

وأي معلومات ثانية أنا حاضر

وسامحنا على القصور

والله يوفقك