رحلتى من الفقر الى الغنى

[سوق واقف]

ولي عوده إن شاء الله

[لمسات..]

وعليكم السلام ورحمة الله وبركآته ,,

موضوع جداً رائع بروعة إختياركَ له

ومن يتوكل على الله فهو حسبه أبتدأ كلامي َ

الثقه بالله تعالى أنه يرزقكم من حيثُ لاتعْلمونْ

وإخلاص النية له وحدهـَ

والصدقةَ :
الصدقة مطهرة للمال .. تصدقوا لو بريال واحد بنيه إن الله يفتح لكم أبواب الرزق

تجربتي :

بدآيه بمسوقه وإنتهاءً بإستقلاليتي أنا وزميلتي

هذا بفضل الله سبحآنه تعالى ..

باالصبر والجهد والكفآح تنالون مبتغاكم َ

والتجارهـ ربح وخساره والشآطر اللي يكافح ويثبت نجاحه مهما
حاولو الآخرين تشويه سمعته هذيل أعداء النجآحَ
الله يكفينا شرهم

لكل نآجح مُحارب

وأهم شيء الصدق في كل شيء وعدم الغش َ

دليل أن الاستغفار يجلب الرزق :
"" من لزم الاستغفار جعل الله له من كل هما فرجا و رزقه من حيث لا يحتسب "
ما زلت اكثر الاستغفار و اطلب الله الرازق و الوكيل انه يفتح لي ولكم ابواب الرزق الحلال
و يقفل ابواب الحرام

للافادة مع الشكر الجزيل

أختكم
لمسآت

[مشتاقة لقطر]

مراحب ..

انا لاحظت قلبتووو الموضوع لمواعظ ؟؟

ماغير تجربة الجوري .. وبيرل .. محد ذكر شي


الحين باحط لكم تجربتي الطويلة بالاتجارة والتوفير والاستثمار .. كنت كاتبتها بمنتدى ثاني ..



نبي تجارب ..

[عاشق الشهادة]

مراحب ..

انا لاحظت قلبتووو الموضوع لمواعظ ؟؟

ماغير تجربة الجوري .. وبيرل .. محد ذكر شي


الحين باحط لكم تجربتي الطويلة بالاتجارة والتوفير والاستثمار .. كنت كاتبتها بمنتدى ثاني ..



نبي تجارب ..

[مررايم]

نتظر تجاربكم ياتجار وتاجرات .............

[shahd]

موضوع رائع الله يوفقك الجميع

[غيور الدوحة]

انا ماعندي تجارب بس اتمنى اشوف تجاربكم واقراها
عسى استفيد منها ويستفيدون الاعضاء الاخرين

[classic2004]

انا ماعندي مصدر ثاني غير الراتب
ومسرفة جدا جدا جدا
ولكن عندي مشروع في بالي حاليا اتمنى ينجح ..

[ملك البضائع]

انا بصراحه بقول لكم قصتي وبكل صراحه

قبل 3 سنين لحد شهر 3 اللي راح كانت اموري طيبه والحمد لله كنت املك راس مال حلو قريب ال 6 مليون ولكن ماكلنت ف ايدي كانت شغاله مع واحد عن طريق شركه وانا كنت ماخذ قرض من البنك المهم صبرت ع نفسي 3 سنين لا سياره ولا شي كله سياره ايجار وبعدها كنت انتظر شهر اربع حتاا انتهاء العقد المهم او ما دخل علينا شهر ثلاثه مات الرجال اللي كنت حاط فلوسي عنده !!! صدمه وعقب الله يرحمه مارف عطااا الفلوس من وعند من جيت الشركة بعدها بفتره قالوا ماندري وين الفلوس فلوسك وفلوس ناس بعد المهم فقدت الامل وقلت الحمد لله ع كل حال قعدت افكر الراتب مايصفااا منه الا 1500 ريال !! والقرض ماراح يخلص الا سنة 2030 !!! يعني شلون بتصرف!!! المهم فكرت وفكرت وفكرت والحمد لله قلت لو اشتغل زبال والبس الون الاصفر ولا امد يدي لاحد لان بعد هالموقف بينوا اللي بيوقف معاك واللي مب واقف معاك المهم قلت الحمد لله ع الصحه هذا اهم شي ورضااا الوالدين والحمد نايم ماكل ف بيت اهلي مب قاعد ع رصيف .
قلت بشوف لي شي ابتدي فيه من الصفر لو براس مال 1000 او 2000 ريال بس بدون محد يعرف من ربعي ان او من الناس الي يعرفوني عشن محد يبطني ويقول انت ياللي كنت وااااو ترع تبيع بهالطرقه والشغل مب عيب المهم قعدت ادور ف النت ادور مصدر رزق وع قد راس المال المذكور والحمد لله بديت من شهرين وشفت ان الله ما يضيع حق عبده اذا صبر وحط امله ع الله والحمد لله توفقت وزدت راس مالي وللحين قاعد اجازف واحارب الدنيا ومشاكلها ودائما اقول هالدعاء (( اللهم اجرني في مصيبتي وعوضني بخير منها ))المهم الشغل مب عيب لوف شنو اهم شي حلال ويرضي الله والله بتحصلون خير اسألوا مجرب المهم حبيت انقل لكم قصتي وبصراحه وان شاء الله الواحد يحط حلاله قدام عينه ويراقبه ويعتبر من سالفتي وما يثق في اي احد الا نفسه واهله وبس موفقين يارب ادعوا لي بلتوفيق ومشكور للي نزل الموضوع فكرته حلوه نستفيد من بعض

[مشتاقة لقطر]

هلا رجعت لكم باقتباس تجربتي .. هالكلام من شهرين ونص تقريبا .. كنت مازلت متوقفة عن التجارة .. ولكن عودت بنفس النظام السابق تقريبا .. [/SIZE]
[COLOR="Blue"][quote=********;1925031]



بسم الله الرحمن الرحيم



مساؤكم ورد بنوتات وحلوات ونشيطات ..



وعدتكم بموضوعي السابق بكتابة تجربتي الناجحة في تجارة الانترنت ..



وراح اطرحها على شكل قصة بالبداية ثم اركز على النقاط والعبرة بعدين ..



كان يا مكان في قديم الزمان .. وسالف العصر والاوان فيه سندريلا ينقال لها ( مشتاقة لقطر )



الاسم التجاري المشهور لي .. تجاريا >>> لاني اكتب بنك نيم ثاني كمشرفة في منتدى اخر ..



اول ما طاحت على النت يادوبها ما تعرف تطقطق الحروف عدل .. شفتو زي سندريلا بالضبط فقيرة .. ومسيكينة ... هههههه



امزح .. تراني متخرجة من الجامعة بس ماكان عندي وقت للنت والمنتديات .. كان بالنسبة لنا ان النت بس عالم مسنجروسوال واحنا متشبعين سوالف

وبس ما درينا بالفوايد الكبيرة الا عقب .. فما تدربت الا بعد الفراغة والاستقالة ..



مصختها وايد طلعت عن الموضوع .. خخخخ





الموووهيم

للعلم كنت مدرسة بقطر لمدة سنتين ونص .. ولكن لظرف الزواج .. باماراتي .. اضطريت اترك .. واشوف مستقبلي .. مع بو عيالي ..

نرجع لموضوع تجارة النت ..



دخلت اول منتدى في عام 2005 ولقيت ركن للتسوق اشوف الناس يبيعون ويشترون ..جاني حماس .. قلت ما فيه الا ابيع اغراض عمتي

وكتبت اول موضوع لي بعنوان حلو (( عود المسك موضة جديدة وريحته ولا اروووع )). ما أذكر الموضوع دعاية لنفسي لا لا ..



بس عشان نركز انه العنوان جذاب احتوى على موضة واسم محدد ومدح بالشي ..المعروض ..


ما كان ممل او رتيب مثلا (( عود معطر ..)) او ((عود ** عود ** عود **)).. او مبهم ؟؟ او مجهول ..

بارجع لموضوع اهمية اختيار العنوان الرنان .. بالتفصيل بالفوايد لاحقا ..

وايضا قدمت بالموضوع كل التسهيلات للازمة للتوصيل لقطر والامارات باليد ..

شفتو السنافية الامارات كاملة التوصيل باليد .. ما تدري عن بلا وعنوة التوصيل والمواعيد الخ ..

(1) الموهيم حصلنا على اول زبونة ( احصل على اول زبون هذا اهم شي ) طلعت من قطر فوصيت اختي توصل لها البيت .. وكان اول ربح لي .. واول احراج لي طلعت تعرف بنات من اهلنا .. وانا كل شغلتي تخرب البرستيج .. انه فلانة المدرسة الفلانية بنت بيت فلان .. (( بياعة )) ياشين الكلمة هذي تحسس الوحدة ..انها تشحت .. .. انا طورتها مستقبلا الى تاجرة انترنت بدال بياعة .. بعد ما اكتسبت الثقة وواجهت الجمهور ...



وكسبت زبونتين وحدة من قطر جاية دبي .. والثانية من دبي .. وصادف الويكند طالعين نتمشى طلبت من زوجي نروح دبي نبات ونونس اليهال .. من قدنا سكننا في الموفنبيك الليلة 1400 درهم ..والفايدة من البياعة 50 درهم ركبو المخ انتو عاد .. هههههههه بس تبون الصدق كنا جيه جيه رايحين نتمشى حتى لو ما كنت مواعدة حد من الزباين..
بس بعد كان ودي اجرب التجارة ..واذوق طعم الربح ..




الموقف الحلو بالسالفة ياحليلي وحدة خليت لها بالريسبشن تاخذ الطلب .. والثانية واعددتها ديرة سيتي سنتر ..

كاشخة بكيسة وحاطة فيها 4 علب زجاج بكيسة مرتبة ..



و علقت الكيسة على التروللي ( العربانة )وقعدت ولدي وقريب الالعاب والزحمة والسلم الكهربائي



قاااااااااااااااع تطيح العلب الزجاج مالت العود .. خخخخخخخخخ انكسرت وحدة وفتر العود المعطر اللي فيها كله على الارض جنه دود والا نمل اسود خخخخخخخخخ .. وفرررررررررر زوجي وولدي الثاني شردة .. خبركم وحدة تفشل .. بس زين اني منقبة .. لوووول .. وقومي لمي من الفشلة لا الناس يتوصخون من العطر المصبوب مع العود وحطيته عالسريع بكيسة ثانية واروح لريلي وهو معصب من البياعة اللي ما تبي تعدي اليوم على خير .. هههههه



من زود الشطة والحماس .. كسرت الزجاج بعيوني خخخخخ .. الموهيم لقيت البنت خلال نص ساعة قلت لها خذي الاغراض ووديهم معاج قطر واللي ناسبج اخذيه والباقي مع الحساب الاهل بيمرون ياخذونه بقطر ..



ولله الحمد والمنة ..

هالثلاث(2)كتبو بموضوعي رايهم الرااائع بالعود والدخون .. والتعامل السهل والسريع ..



وجرووو باقي الزباين ..


مع الوقت (3)تطورت واخذت دورة عند وحدة تعلم الدخون والعطور .. رووس اقلام بس وبتلقون كل الطرق موجودة بالنت .. لحد يسالني عنها لانها امانة وسر مهنة .. وتطورت الى ترويج عطورات فراش وعطور بخاخ ولوشنات .. ومخمرية ..

والحمد لله ذوقي شبابي بالروايح ..



النقطة الثانية .. بعد فترة كنت متفرجة بس حسيت فيه ركود بسوق العطور والدخون .. صرت (4)ابحث من اللي مححتاج شي من الامارات او من قطر ممكن اوفره له بعمولة طبعا ..

الى ان جاتني فكرة من احد التاجرات طالبة اكسسوارات بالجملة لمحل جديد ؟؟ واخذت لها كمية كبيرة واخرتها طاحت بجبدي لانها نقت لها بالحبة من الموجود .. وانا ما عارضت لان (5)التسهيلات تخلي الزبونة ترجع لج مرة ثانية احب الزبونة تكون مرتاحة بكل الطرق .. عشان اكسب تعاملها مرة ثانية ..



وبعدها طلبت مني و سالت عن مكياج .. من ماركة معينة (6)ولقيت المصدر( افضل شي ممكن يخدمج بالتجارة الحصول على المصدر المباشر ) وجنبه لقيت مصدر للدرماكول .. وعرضت عينة بموضوع جديد لتجميع طلبية جاتني طلبية كبيرة جدا جدا .. من قطر لان سعري كان نفس السعر المعروض عند تاجرات الامارت والمميز عندي(7) التسليم باليد بالبداية .. ومجانا بعد <<< شفتو التسهيلات ..



لدرجة اني صرت امول جملة لكثير منهم .. والحمدالله ..



هنا احب اركز على انه (8)صار لي زباين ثابتين يثقون .. بي وبذوقي وباسعاري .. فصارو يلجأون لي باي غرض معروض بالنت يطلبونه مني مع موافقتهم على عمولتي مهما كانت لانه دايما بتوفر عليهم المشاوير وال تحويلات وممكن النصب .. عليهم ..



هالشي عطاني الدفعة الكبيرة للتقدم والتنووع والتوسع لاني كل طلب لغرض جديد يشوفونه معروض عند اي تاجرة خارج قطر ومش متوفر يكلموني على طول وصرت ابحث عن ارخص عرض ( لمصلحتي ولمصلحة الزبونة )



كيف ؟؟

اقعد يوم او يومين اسوي بحث بالنت عن هالغرض في كل المنتديات وسعره الين احصل افضل عرض جملة باقل سعر .. واطلبه واحول واستلم وارسل البضاعة باليد ..



كانت سياستي لما كنت بقطر(9)استاجر سيارة مع سايقها لان ماعندنا سايق .. واحدد مكان وزمن باكون فيه باحد المراكز التجارية والكل يجي يستلم بالوقت اللي يناسبه .. وانا اكون مع عيالي بالالعاب .. فالتوصيل يكون تقريبا 60 لكل الطلبيات لو خصمته من كامل المبلغ اللي حصلت عليه في ذاك اليوم يكون مب خسارة فيهم المشوار على حسابي ..



وكالعادة اروح اتشرى لي ولعيالي بالفلوس نتدلع .. لان كان مو هدفي التجميع بس حب لممارسة التجارة واثبات نجاح وبس وكان هذا غلط فااادح طبعا لان زوجي بعد يعطينا مصروف .. وهفففف نطيره بيومه .. باتعلم مستقبلا كيف ارتب اموري المادية



(10) ودخلت مجال جدديد بعدها وتقريبا تخصصت فيه لفترة من الزمن.. كان الالعاب الزوجية .. الاصلية .. وتوابعها من رومنسيات ولانجري ..



هذي سوقهم ولا ارووووع .؟ وماشي طول السنة .. بس نوعا ما هالمجال ..محرج ..وادخال الاغراض الجديدة والنادرة للدولة امر صعب ومعرض للمسائلة .. والاحراج طبعا من قبل المسوولين .. بس كنت اتحايل على هالموضوع بطريقتي الخاصة والمتعبة جدا جدا بالنسبة لي ولكن بالمقابل ارفع اسعاري .. كمقابل لتوفير هالاغراض .. الصعب توافرها بالبلد ..



هنا حابة اركز على نقطة مهمة جدا جدا جدا بالتجارة بشكل عام


اذا حبيت اتتاجرين اتبعي قاعدة <<<متوفر وارخص .. او نادر وغالي >>>



اما اذا (أ)كان الغرض متوفر بالسوق بالبلد .. فانا الجا الى توفيره ولكن ارخص من السوق لانه لو نفس سعر السوق الناس ياخذون من السوق على شوف عينهم احسن .. وباي وقت يناسبهم وما يعتبرون بضاعتج فرصة ذهبية اما اذا كان عرضك اقل من السوق .. يسارعون الى الشراء منج لانك وفرتي لهم باقل من السوق ويصلهم للبيت بعد .. مثلا .. على سبيل المثال .. قمصان النوم بالسوق بكثرة ولكن اذا وفرتيها بسعر حلو وموديلات وخامات حلوة وبسعر معقول وعروض او هدايا للكميات .. بياخذون منج على طول ويصيرون زباين ثانبتين ..



او ((ب))تاجري باغراض غير متوفرة بالبلد مثل .. ماركات غريبة للشنط او الجواتي او الملابس .. او الالعاب الزوجية والمنتجات الزوجية من زيوت مساج ومنتجات اللي تنوكل الى اخره .. مش متوفرة بالسوق ..



وفريها من مصادر موثوقة وحبذا لو من امريكا لانها تكون صحية اكثر من الصناعات الاخرى اللي جودتها خسارة فيها ينحط ريال ..


ثم حددي السعر اللي يوفر عنج التكلفة والشحن وفايدة مضاعفة لو حبيتي .. لانه لها زباين متميزين .. ويقدرون تعبك لتوفير شي مميز لهم ..

وتحط الزبونة ببالها اذا ماخذته منك ما بتلقاه عند غيرك فتضطر تاخذ منك وهي تضحك بعد ..





وبعدها توجهت الى فكرة حلوة .. لاني كنت اعرض بمنتدى اماراتي والقى كل اللي عندي اغلى منهم .. ففكرت بفكرة ونجحت ولله الحمد ..



عرضت المكياج ((11)) بالجملة .. للسبب اللي ذكرته قبل ..



((اللي اخذه من الامارات نفسها يعني ما بيكلفن شحن بس التوصيل للبيت بعد)) ..

وباسعار خيالية .. لانه حسبته بهذي الطريقة ..

الدرزن مثلا لاي شدو اخذه ب60 درهم اعرضه ب100 درزن كامل .. يعني فايدتي 400 درهم مرة وحدة ..

لو حسبتيها .. بالمفرق مرة ثانية يعني اذا اشتريت الشي ب5 ريال ابيعه ب8 ريال ؟؟ بتشوفينها مو محرزة 3 ريال ما تسوى التعب .. صح ..





بس انا حسبتها بطريقة اخرى ..

( بدال ما ابيع شي واحد فقط وفايدته مرة وحدة .. وتعب متكرر على كل طلب .. ابيع مجموعة اشيا ء في كل قطعة ربح بسيط ولكن مجموعهم مع بعض اكثر من ربح القطع مفرقة ..))

يعني بالتفصيل :

انا لما اشتري شنطة مكياج مثلا5 ريال وابيعها ب20 لانها تسوى بتكون فايدتي كم ؟ 15 درهم بس .. والطلب بيكون اقل لانه سعرها نفس السوق ..

اعيد تفكيري مرة ثانية واقول انا بكل طلبية ابي ربح اقل شي 50 او طالع ..



فاسعر الشنط مرة ثانية واحط الدرزن ب100 ؟ منها انا استفدت 40 درهم ..بالطلبية بدال ال15



وممكن يتضاعف الطلب اكثر من درزن لان السعر يعتبر صفقة للتاجرات ؟؟ فيصير 80



وبالاحرى وبصراحة قولو ماشالله تبارك الله اقل وحدة طلبت تقريبا ب500 درهم على عروض الجملة



يعني بدال ال15 صار الربح 200 درهم على االطلب ..



وهكذا .. من غير طلبات السعودية والبحرين عمان .. ولله الحمد ..



وبقى من تجربتي ..



قمت((12)) بعرض حلو للمبتدئات او للي لهم معارف وتجمعات او بالدوامات .. من زبوناتي بقطر ..(((سابقا ))



ععندي شنطة تحتوي كمية من عروض الجملة .. حبيت ابيعهم بالمفرق .. ومعاها بقايا بضاعة سابقة .. من مشد ومقص حف وملابس الخ..



نزلت عرض( كوني مندوبة بطريقة مشتاقة لقطر في كل الاحوال انتي ربحانة ؟ )



بالمختصر كانت انه اللي بتاخذها تبيع منها اللي تبيعه باسعاري الرخيصة جدا .. والمبلغ النهائي يكون لها 15 % منه وممكن ازيدها شوي اذا كان المبلغ حلو ..

واترك بعد لهم مجال بتغيير سعر اي سلعة يشوفون انها ممكن تنباع باكثر .. او مطلوبة عندهم ..



وما احدد تاريخ ارجاع الشنطة ولا اضغط بخصوص الفلوس حتى تاخذ الاغراض حقها بالترويج وترتيب التاجرة لحساباتها ..



وبالنهاية ما بيقى على المندوبة الا انها ترجع الاغراض ولا يبقى شي طايح بجبدها ومنها استفادت بعد .. كان الحمدالله يجيني غالبا اقل شي الف ريال ..



من كل وحدة وممكن تصل الى 3000 ريال .. بعض الاحيان



النشاط الاخير اللي زاولته

كان فرصة ذهبية بصراحى اتمنى تتاح لباقي التاجرات .. هالسنة بعد ما كانت بدايتها الكورس الماضي بمدارس قطر

او معاهد او رياض اطفال او مراكز تحفيظ ..

(13) معارض او بازارات مصغرة غير رسمية ..بالمدارس .. تؤجر الطاولة ب100 ريال غالبا لليوم الواحد لمدة 5 ايام .. ويكون فيه اقبال من اولياؤ الامور ومجلس الامهات بنفس الاسبوع .. ونهاية الدوام ..



بعدها توقفت نهااائيا عن التجارة بقطر .. الى اشعار اخر ..



واحس اشتقت للتجارة ولكن ابي اتخصص اكثر ان شالله .. وبتكون تجارتي غالبا بالامارات بيدي .

v
vقبل كمن شهر كان هالكلام ...[/COLOR]

[COLOR="Navy"][SIZE="6"]قولو ماشالله تبارك الله .. والله يرزق كل وحدة وواحد فيكم .. يارب بالحلال .. والاستفادة من الوقت على النت بدل التصفح عالفاضي والشات عالمسنجر ..سوو لكم دخل لان الدنيا اتجهت على الغلاااااااااااء والراتب ماعاد يكفي .. والله ..

والبنات صارو يلجوون للشباب يصرفون عليهم .؟؟ الاولى انها تبدا تجارتها على النت .. والله بيرزقها .. مبالغ ما تتخيلها ..


وان شالله مستقبلا اكتب لكم عودتي لتجارة النت واستراتيجياتي الجديدة .. واتمنى الفايدة للجميع ..[/COLOR]