اخطاء في البناء او الديكور ندمت عليها بعد الانتهاء.. شاركنا بتجرتك !!

[بو نايف]

ارتفاع المجلس عن مستوى الشارع ,, كنت اتمنى لو رفعته اكثر’’

[um nawaf]

يعطيكم العافية .. الموضوع فكرته حلوة ..

يا ريت الأعضاء يضيفون بعض المزايا والأشياء اللي ما تحسفوا عليها خلال أو بعد البنيان

الله يقويكم ويهنيكم في بيت العمر وأنا وياكم ان شاء الله

[العمراني]

مشكور اخوي على هالموضوع المفيد

انا اول مرة ادش على هالموضوع ويمكن ملاحظاتي تكون مكررة لكن كلها مصلحة

اول خطاء كان اختيار المقاول على اساس السعر دون التركيز على الجودة ( من تهاون باللحم خانت به المرقة )
اخترت استشاري شخصي وهذا زاد الطين بله وياليتني مختار المكتب اللي قام بالتصميم

المواصفات لازم تكون بالتفصيل الممل كل صغيرة وكبيرة بالنوع وجهة الصنع والمقاسات وحدود السعر واللي لازم يكون اكثر من سعر السوق بما لا يقل عن 10% ولا زم تستشير اللي بنوا حتى تتلافى النواقص

الابواب الرئيسية اذا كانت مقابله الشمس افضل تكون من الالمنيوم المشغول ( غالية لكنها قوية وتعمر وما تصدي مثل الحديد )

توزيع نقاط الكهرباء لازم يكون مدروس حسب الحاجة بدل ما تترس الجدران بدون حاجة ونفس الشي نقاط التلفون والدش .

اذا فلل ملتصقة لازم يكون جدارين وبينهم عازل

لا تخللي المصمم يعمل لك تخطيط فيه مناور لانها بلوى كبيرة خاصة وقت المطر .

بالنسبة للحمامات اعمل اغلبها بدون بانيو وخلل الشاور على السيراميك وكنسل البيدية لانه حسارة فلوس وياخذ مساحة بالحمام والشطافة اسهل منه

كفاية اليوم هالملاحظات ونشوفكم في الزيارة الجاية

[همر]

نصائح من ذهب:

- لا تشتغل مع عرب..
مش تجني ولا افتراء ولكن من عدة تجارب اثبتت لي ان هذولا اهم شي بالنسبه لهم كيف يدخل من وراك ريال زياده باي طريقه وخلوكم من العواطف.. وابعدوا عن المصممين اللبـ .. طبعا معروفين .. خايييي ...كلام حلو.. ويرويك شغل حلو.. وصار لي سنه معاه شطبت البيت ولي الحين ما خلص لي التصميم ! طبعا مافي غيرهم يشتغل بالتصميم الداخلي تدرون ليش؟ اسهل شغله تبيع فيها كلام وزباينك معظمهم حريم

- لا تحاول تخلي آسيوي يسوي شي يعرفه بطريقه مايعرفها..
اذا قالك انا يسوي هاي شكل انا ما يسوي هاي شكل.. ترى بيعفس لك البطح وصدقوني شي علمي.. هذولا عقلياتهم تطبيقيه بحته (اللي تعلمه في يوم بيطبقه طول 30 سنه) ومافي مجال للابداع او الابتكار.. ماعدا الفلبينيين والصينيين.. اذا مايعرف يقولك ماعرف وعندهم شوية ابداع..

- لا تشتغل مع صديقك او قريبك ولا حتى اخوك..
حتى لو شي بسيط وما يستاهل بس بعد مايسوى انك تخسر هالشخص بسبة شغله ماتسوى.. دائما تعامل مع ناس ماتربطك بهم اي صله.. لو صار ما صار.. دور على غيره..

- استشير الناس وقط بحر..
اسأل واستفسر وابحث وتقصى براحتك بس اذا مقتنع بشي سوه ولا تخلي حد يأثر عليك خصوصا الاهل في النهايه انت اللي بتسكن البيت مب هم..

- تحرا الحلال.. واتق الله.. وانتبه تبخس اي عامل حقه..
ما دام طلب ووافقت عطه.. حتى لو تدري او دريت بعدين انه قص عليك.. بعض الشباب الله يهداهم يقولك خله يخلص بس وارويك فيه مب معطيه ولا ريال.. صدقني ماراح ترتاح في هالبيت طول عمرك اذا فيه طابوقه وحده بالحرام..

احس اني طولت..

[ابو سلطان11]

جزاك الله خير وكثر الله من امثالك

[ابو علاوي]

الصراحة الموضوع يستحق التعليق من كثر ماشوف الاغلاط الموجودة في البناء وخصوصا فيما يتعلق بشغلتي وهي تركيب وتوريد الحجر الطبيعي في قطر
اللي ابغي اتكلم عنه اليوم هو انه بعض الاخوان يبنون الفيلا ويكثرون الديكورات الكونكريتية مثل عمل ديكور حول النوافذ او الابواب او عمل الوارش اللي فوق بسماكة كبيرة
وبعد فترة يجي يبغي يركب حجر
اول شي لازم نكسر كل الخرسانات اللي عاملهم صاحب الفيلا
حتى نركب ديكور حجر خاص بالنوافذ
الشي الثاني الوارش اللي فوق مستحيل يتركب حجر ولو تم تركيبه سيكون مكلف جدا لان يحتاج قطع حجر صغيرة لتلبيسه او نحته والنحت مكلف
ويكون المالك اصلا دفع ثمن الوارش الكونكريتي
الشي الثالث الاعمدة : دائما يسوون الاعمدة بقطر كبيرة ولما نجي نركب حجر يكبر محيط العمود ونصف قطره حوالي 16 سم
فيكون العمود ثخين وغير متناسب مع الفيلا
انا انصح اللي يبي يسوي حجر بالتالي:
لايسوي اي ديكور بالكونكريت لان مصيره التكسير
والاعمدة يصغرها شوي ويحسب حساب انها بتكبر بعد الحجر
نافذة قبل وبعد الحجر

[منابر خالده]

متابع جيد
مشكور اخوي على الموضوع

[N.QTR]

نصائح من ذهب:

- لا تشتغل مع عرب..
مش تجني ولا افتراء ولكن من عدة تجارب اثبتت لي ان هذولا اهم شي بالنسبه لهم كيف يدخل من وراك ريال زياده باي طريقه وخلوكم من العواطف.. وابعدوا عن المصممين اللبـ .. طبعا معروفين .. خايييي ...كلام حلو.. ويرويك شغل حلو.. وصار لي سنه معاه شطبت البيت ولي الحين ما خلص لي التصميم ! طبعا مافي غيرهم يشتغل بالتصميم الداخلي تدرون ليش؟ اسهل شغله تبيع فيها كلام وزباينك معظمهم حريم

الله يسامحك اخوي ليش جذيه بس
انا مصممــه ديكــور قطريــه والحمدلله سويت شغلي وخلصته باكمل وجه ، وفي الوقت المحدد للتسليم..
اصابع يدك مش سوا،،

واسمحولي عالمداخله،،

[نمـر]

العازل للحمامات الله يكرمكم سوو عند شركه معروفه حتى لو كانت غالي والتمديدات البيبات للحمامات خارجيه

[BonBons]

اسجل حضوري ومتابعتي ،، موضوع جد مفيد