اخطاء في البناء او الديكور ندمت عليها بعد الانتهاء.. شاركنا بتجرتك !!

[rashid700]

نصيحه انا سويت خطأ وتحسفت عليه
الا وهو اني بنيت الملاحق خلف البيت والمفروض تكون جنب البيت من اليمين او اليسار أهم شي ما تكون مقابل مدخل البيت الرئيسي علشان يصير فيه زياده في المساحه امام البيت(الحوش) وبيرجع البيت ورى

[فجر جديد]

السلام ,
اولا - الحوش اغلب البيوت ما يخلون فيه مساحة اما بالزرع او كراجات وهذا يحرمهم استئجار نطاطية او زحلاقية عند اقامة حفلة . ( يمكن ما يهمكم بس انا توهقت لما قالوا لي ما تدخل النطاطية ) .
ثانيا - غرفة السايق تكون خارج البيت او مش مواجهة الحوش حتى ما يكشف اهل البيت .
ثالثا - مراعاة الميلان حتى ماتظل بقع ماء في الحمامات ( وانتم بكرامة ) + تمديد للمكيفات اسلاك او بايبات حتى ما يدخل الماء في الطوفة ( تقشر الصبغ ورطبت الطوفة ) . وبعد ينزل ماء المكيف على الحوش وصاير خط اخضر وتحول الى اسود وما يروح مع غسيل الحوش .
اخيرا - مراعاة ان لا يستقبل الحمام ( المرحاض ) ولا يستدبر القبلة . وايضا ان لا يكون ضيق فالبعض يسخسر المساحة فيه . ومحاولة الاستفادة من المساحة بعدم وضع ( البيديه ) الذي لا فائدة لة الا شكليا كطقم وهو يضيق المكان .

[السلفي]

جزا الله من شارك ونفع اخوانه خير الجزاء

[همر]

الله يسامحك اخوي ليش جذيه بس
انا مصممــه ديكــور قطريــه والحمدلله سويت شغلي وخلصته باكمل وجه ، وفي الوقت المحدد للتسليم..
اصابع يدك مش سوا،،

واسمحولي عالمداخله،،

دامج قطريه ما منج خوف .. وانا اتكلم عن بياعين الكلام في موضوع التصميم الداخلي .. واذا انتي تنفذين بعد بعطيج بيتي تنفذينه

[بن غنيّم]

موضوع استفدت منه يعطيكم العافيه

[ZURICH]

موضوع رائع وكل يوم استفيد منة خاصة أني في دورة تأسيسية في بنيان بيتي

[ZURICH]

موضوع محترم بمعنى الكلمة

ملاحظة صغيرونه :
ابواب الحمامات اعزكم الله .. يفضل تكون من الألمونيوم
الخشب مع مرور الوقت يتشرب بالماء ولونه يتغير ويشوه المنظر الجمالي للحمام
خصوصا
اذا كانت الحمامات نوعية جيدة ومتعوب عليها .

قواكم الله

مرحباً بوخليفة

في طريقة تقدر تعزل الماي الي داخل الحمام ومايوصل للباب

وهي تلبيس الباب بالكامل من الداخل بالبلاستيك وكأنة زجاج

وانا افضل باب الحمام يكون مطابق لجميع ابواب الغرف ..

[q6r.10]

السلام عليكم

وومساكم الله بالخير

أكـثر شي ندمت عليه هو ارتفاع سقف المجلس الخارجي ( مجلس الرجال )

الارتفاع المسمووح في البلديه تقريبا 3.75 واكثر الاستشاريين يخلوون الارتفاع 3.30

بس هالارتفاع مب ارتفاع مجالسنا ياهل قطر اللي متعودين عليها .

خلو الارتفاع 4 امتار واذا كلمتو البلديه يمشون وعادي تبنون ز

وسلامتكم

[darkuae]

من الأشياء اللي انصح بيها

* تسوون بانتري أو مطبخ تحضيري في كل طابق (الأرضي يكفيه لو في خارجي ومتصل بالفيلا) والأول والبنت هاوس

* تسوون أكثر من مخزن وذلك حسب المواد المخزنة:

- مخزن رئيسي خارجي
- مخزن داخلي للمكنسة وأجلكم الله النعل والجواتي وأنصح بيه يكون تحت الدرج
- مخزن للفرش والملابس الموسمية وانصح يكون في البنت هاوس
- مخزن للمعلبات والعيش والسكر وميرة البيت وانصح ان يكون مكانه في المطبخ

* نصيحة عامة انكم تدققون في الخريطة عدددددل وتحطون فيها كل كبيرة وصغيرة ولا تقولون عقب وقت البنيان باكلم المقاول يسووي كذا وكذا، عشان اذا عطيتوا المقاول الخريطة وسافرتوا وقت البيان فترة او ما تقدرون تتابعون البنيان كل يوم بيومه او ما تنسوون بعض النقاط

* نصيحة اخيرة حاولوا انكم توزعون سويكات الاضاءة بطريقة مزدوجة في بعض الأماكن وعلى سبيل المثال:

- إضاءة الدرج خلوا سويكات تحت الدرج واعلى الدرج للإضاءة والاغلاق لنفس الليتات
- عند باب المجلس الخارجي وعند الباب الداخلي للمجلس (عشان ما تقعد تتحسس الطوفة فالليل وانت رايح تفتح باب المجلس
- عند باب غرفة النوم وعند السرير (حركات الفنادق)

[كبير المتداولين]

انا توني ماخلصت بنيان بس تحسفت اني ماكبرت الحمام وانتو بكرامه اهم شي الواحد يكبر الحمام