الموضوع باين من العنوان
بنزل الموضوع للي يبون او يفكرون يسوون زراعة شعر
انا الصراحة كنت اعاني من التساقط و الصلع و مافي دوا ما استعملته ,في ادوية توقف التساقط بس لازم تستخدمها
باستمرار و اذا وقفت الاستخدام يتساقط الشعر ,فكرت اني اسوي عملية زراعة شعر و سئلت في لبنان و فرنسا قالولي الشعر ب دولار و فرنسا ب دولار و نص و بريطانيا انسي تسوى العملية ! شفت ايرانيين ساكنين في بريطانيا و بلجيكا جايين يسوون العملية في ايران عشان السعر و قالوا لي انه هناك في بريطانيا مافيه اقبال من الناس على عملية زراعة الشعر ! هني في الدوحة شفت طبيب زائر في عيدة خاصة قال لي العملية بتكلفك تقريبا 40 الف ريال , المهم عن طريق واحد من الشباب سافرت ايران و شفت اكثر من مركز و اخيرا قررت اني اسوي العملية في المركز الي شفته و شفت صور قبل و بعد العملية لبعض المرضى و الصراحة انصح اي واحد يعاني من الصلع يروح يسوي زراعة لانه العملية بسيطة كلها خمسة ايام و انت خالص هاي اذا المنطقة الخلفية للراس عندك فيها شعر ممكن تخلص في خمسة ايام او اقل و اذا الكثافة قلقلة ممكن في مرحلتين .
واذا بتروحون مكان ثاني يفضل انكم تسوون العملية عند دكتورة مش دكتور و ما تكون كبيرة في السن لانه العملية هذي يبي لها تركيز و بال طويل بمعنى انهم يزرعون شعرة شعرة و الشعر لازم يكون جنب بعض عشان الكثافة تكون كثيرة و الشعر يبين طبيعي ,طبعا اذا بخششت الفنية 500 و 1000 ريال امورك بتكون خالصة,
العملية اسبوع بالكثير و اسبوع بعدها يتم غسل الراس ,ممكن عملية اغسل تسويها بنفسك و بعدها تسوي اسبوع جلسات ليزر كل يوم 20 دقيقة ,هاي ممكن تسويها في الدوحة ,بس انا انصح انه تكون اجازتك 3 اسابيع عشان تخلص كل شي هناك ترجع و لا حد يحس انك مسوى عملية زراعةشعر.
بالنسبة للتكلفة انا زرعوا لي 10000 شعرة و كلفتني تقريبا 13 الف ريال و نفس كمية الشعر في الدوحة قالوا لي 40 الف ريال ,طبعا هناك عندهم غرف في اي بي يعني تكون بروحك في غرفة خاصة و تدفع فرق بسيط , الصراحة انا عجبني كل شي عندهم والي يبي يروح يسوي زراعة الشتاء احسن وقت ,الصيف هم زين بس الحر يمكن يأذيكم شوي. عندي صور اذا حبيتوا ممكن انزلها لكم , و الي حابب يروح ممكن اعطيه العنوان و فيه واحد هناك ممكن يضبط له الفندق و ياخذ مواعد للزراعة .
على اذنكم بروح اسوي سشوار و احط جل على شعري <<<<< اصلع سابق