السلام عليكم ورحمه الله وبركاته
يا جمـاعه حاب أستفسـر بخصوص التراخيص أو السجل التجاري لأني مو عارف شنو اللي لازم أسويه أسـاسـا...
ان شاء الله راح أبـدأ مشروع شخصي بدون الحاجه لمحل .. واللي فهمته من قصه السجل التجاري أن لازم يكون عندي عقد محل وانا مو محتاج المحل اساسا... وحـاب يكون شغلي قانونـي وبالسليم وخصوصا أن هالايام كلن يجي ويرفع عليك دعوى واحنا مو ناقصين مشاكـل ...
هل في إجراءات معينه ؟؟ وشنو نوع الترخيص إذا لزم ؟؟ ووين ممكن أسويه ؟؟ والرسوم ؟؟
شـاكـر لكم مساعدتي ..
هل تقصد مشروع تعمل من خلاله داخل البيت ؟
عليكم السلام والرحمه
اذا تبي تستفسر عن السجل التجاري
لازم يكون عندك محل وعقد ايجار للمحل
لكن بخصوص مشروعك مادري هو شنو بالضبط بس اقدر استفسر لك وش الي حاب تعرفه بالضبط
اي نعم اخـوي قطري طموح ..
مثل ماتفضلت اخوي..السجل التجاري يبيله محـل.. وانا شغلي بالبيت ما احتاج للمحل أسأسا... ما أدري اذا نوعيه المشروع تحدد اذا بحتاج ترخيص أو لا + ما أعرف أي جهه ممكن أقصدها عشان استفسـر.. ياريت إذا كان عندك اي خلفيه تفيدني بهـا.. مشكور على ردكالمشاركة الأصلية كتبت بواسطة المهجور
هل في ناس تمارس مشاريع مماثله لمشروعك سواء في البيت او فـ محل ؟
الـمشروع عباره عن Graphic Designs .. بالنسبه للمحلات أغلبيه محلات التصوير + محلات ثانية تسوي الشغل اللي أتكلم عنه .. وما يمنع ان يكون الشغل بالبيت دامه بيكون بالمستوى المطلوب...
ومثل ما قلت بالبدايه.. حاب يكون الشغل من البدايه بالسليم ..
,
,
مرحبا اخوي
اخذ التراخيص هو حمايه للجميع للزبون ولصاحب العمل
يعني لو احد ما دفع لك ما تقدر تعمل اي شي ضده لان مافي بينكم فواتير وايصالات
الامور المتبعه عاده في الشركات والعكس صحيح
لو استلمت مال من احد وما قدمت له الخدمه المطلوبه ايضا راح يضيع حق الزبون
طبعا انا اتكلم بشكل عام والتراخيص حمايه للجميع
وراح اوضح لك بشكل مفصل
العمل من البيت او من النت له مجال وزبائن محدوده
له ايجابيات وله سلبيات
الايجابيات : ان نوفر الايجارات والديكور والاثاث وما نحتاج راس مال
والسلبيات : ان مافي شركات راح تتعامل معاك لان الشركات تحتاج كثير من الفواتير والورق وما تطلع فلوس الا ولها مستندات لنظام الحسابات عندهم
وايضا يريدون اي ديزاين على الورق لازم عليه ختم المصمم لضمان الحقوق
يمكن يكون هذا التصميم مقتبس من مكان ويحطهم في احراج ولازم يثبتون من وين اخذوه
والختم هو الاثبات
عموما يوجد الكثير من المصممين المواقع على النت ومصممين المجلات والشعارات والديزاينات يعملون من البيوت ومو محتاجين سجل لكن راح يبقى العمل نوعيته محدوده مع الافراد
والله يوفقك يارب تقدر تجرب العمل ولو حسيت ان الامور طيبه وفي توسع
تقدر مستقبلا تطلع لك سجل وبالتوفيق لك
,
,
اخوك
شموخ دائم
بالضبط اخوي .. المقصد من الترخيص ان يكون حمايه للطرفين لي وللزبون...
وبالنسبه للتصاميم ..في مجالات وايد ممكن تسويهـا والتجربه مو خسـاره
بس بالنسبه للترخيص.. هل احتاجه او لا .. ومن باب الاحتياط من وين اقدر اطلع الترخيص ؟
,
,
هلا فيك
بتحتاج ترخيص دعايه واعلان هذا مجال واسع جدا ويدخل فيه الجرافيك
في وزاره الاقتصاد خلف الستي سنتر راح تلاقي هناك كتيب عندهم فيه
كل التراخيص بالتفصيل شوف الي يناسب مجالك
الان ايجارات المحلات التجاريه مو رخيصه
راح يكلفك من 10 الاف الى 15 الف مصاريف شهريه من ايجارات وكهرباء وماء وتلفون
في المناطق المعروفه
لو انا مكانك راح اعمل الاتي
ابحث عن ( مكتب ) في اي مكان غير معروف ويكون ايجاره في حدود 3 الاف الى 4 الاف
راح تلاقي في مناطق ( اطراف الدوحه )
اعمل السجل ورخص نشاطك عليه وخلص اوراقك القانونيه
سجل تجاري
رخصه البلديه
ختم
اوراق ( ليتر هد + فواتير + ايصالات )
الحسبه الان 4000 ريال في الشهر راح يكلفك المحل في السنه
4000 × 12 = 48 الف ريال
السؤال الان
هل البزنس الي راح تدخل فيه بيجيب هذا المبلغ ويغطي مصروفك ويزيد منه ربح
هل المشروع يستحق الدخول فيه
انا اشوف المبلغ المصروف مبلغ بسيط ويستحق التجربه
خاصه اذا انت واثق من عملك وانك قادر تجيب لنفسك شغل
كذا راح يكون عملك قانوني وبنفس الوقت انت تشتغل من البيت اترك المكتب مسكر
الى ان تحتاج له
واذا تبي تأجره من ( الباطن )
اذا ما مشى الحال بهذا البزنس ( بيع السجل التجاري ) راح يجيب لك بحدود 10 الى 15 الف
الامور واضحه امامك الان وارقام الخساره صغيره توكل على الله
يمكن تكون بدايه خير لك وتتوفق فيه ان شاء الله
هذا الافكار الي عندي
وسوري على الاطاله
,
,
اخوك
شموخ دائم
ضوابط المشاركة
رد مع اقتباس