السلام عليكم ورحمة الله وبركاته
اولا انا مابي لا ممول ولا شريك هذا مشروع يدور ف راسي وحبيت اشاركم هالمشروع لعلى وعسى ينفتح باب رزق لاحد المسلمين ....طبعا لان هالمشروع يبي له فراغ وراس مال كبير وانا عندي الشرط الاول بس ما عندي الثاني ......ندخل في تفاصيل المشروع.....
وكما نعلم ان قبل الطفره اللي صارت بالاسهم سنة 2005 وقبل الطفره اللي صارت بالعقار في الاونه الاخير......وقبل ازدهار الصناعه والتجاره ....كان اهل قطر بسطاء يعتمدون على الراتب ..ونص الشهر متلفتين الشباب, الرصيد مصفر الا من رحم ربي ....المهم ذاك الوقت كانت اغلب السيارات يا تيوتا يا نيسان واذا واحد يصدق كلام الدعايات اللي بالتلفزيون والجريده ياخذ هوندا..المرسدس والبي ام والسياراة الفخمه نادر تشوفها او بالاصح شوي اللي يقدرون على قيمتها ومصاريفها ومب فارقه معاه لي اختربت السياره او خلص الضمان يدخلها الوكاله ويعدلها من الصدام لي الصدام....بس بعد طفرة الاسهم والعقار والرواتب القويه ولله الحمد صار كل واحد يقدر يشتري هالسيارات وصرنا نشوف المرسدس والبورش والرنج بكثره ....وبالذات من سنة 2006 وطالع والللي صاير الحين ان اي واحد عنده هالسياره واختربت عليه بيدخلها الوكاله وبيصلحها ع الضمان......بس بعد سنه وسنتين هالضمان بيخلص وبيصير لازم يصلح بالوكاله ...وهني الدقه لان هالوكالات تصليحهم واايد غالي ومب اي واحد يقدر عليه واي خراب تافه بتدفع فوق العشرين او الثلاثين الف وهاي مبلغ صعب لو كل كم شهر اصلح سيارتي بالمبلغ هاي ....مثال واحد من الشباب عنده رنج موديل 2004 منتهي ضمانه الله كتب وجان تخبط المكينه طبعا ماله الا الوكاله انصدم ان بدلو له المكينه بثمانين الف .. والموتر شاريه اصلا ب 120 الف طبعا الريال اعتفس ومني مناك وخصم وكلم مدير سو له خصم لي ستين الف وبعد واايد ومبلغ خيالي بس شيسوي مافي غير هالحل!!!!!!
خلاصة الكلام ليش ما يكون في كراج متخصص في تصليح هالسيارات ويكون فيه مكانيكين متخصصين في هالسيارات ...ما اعتقد كل واحد عنده مرسدس او بورش او رنج واخترب موتره بيوديه الوكاله وبيصلح بخمسين او اربعين الف لو في كراج بيصلح بعشره او عشرين ...وراعي الكراج يقدر يزيد الربح بانه يوفر قطع الغيار من السكراب اللي هني والامارات والسعوديه والكويت وبيمشي الشغل ......انا ادري الموضوع صعب شوي ويبي له راس المال والاجاراة غاليه بالصناعيه بس لو واحد اهتم بالموضوع واشتغل عليه صح طبعا مع المعرفه والخبره اتوقع بيكون مشروع ناجح باذن الله ....
عالعموم هي فكره وحبيت اشاركم فيها ..وبالاول والاخير الارزاق بيد الله
|
رد مع اقتباس
