زوج متشدد + زوجه معتدله = طلاق

[الوجبه]

بسم الله الرحمن الرحيم

طبعا هذي المعادله واضحه واغلب الطلاق اللي يحصل من هذا النوع :

زوج متشدد ماعنده الا كلمه (لا) او (مايجوز) او (احذرك) او غيرها من المصطلحات ..

هذا ابصراحه زوج فاشل وما اعتقد بيستمرفي حياته الزوجيه .. هذا النوع من الازواج

المشكله ان الزوجه فيها (ضحيه) استعجال ازواجهم وتسلطهم (الديني)

ولكن سبحان الله بعد الطلاق وبعد ما يتزوج غيرها يتغير حاله و(يفتح) على الدنيا وتكون

انفتاحته عجيبه و (كبيره) ..

وتكون الزوجه الاولى اللي تطلقت هي (الضحيه) فانا انصح الاخوات اللي مقبلين على الزواج

انها ما اتضيع حياتها وتكون (تجربه) لزوج متشدد ..

شخص من المتشددين (دينيا) كان مانع زوجته من كل حاجه (تلفزيون) (دش) (خروج)

(سائق) (راديو) زياره الام في الشهر 1 .. البنت ما استحملت وطلقها .. بعدها تزوج

بوحده (صرخت عليه) كم صرخه تادب (راحت اللحيه) (طال الثوب) ( دش وتلفزيون)

سياره مع سايق .. والضحيه زوجته الاولى المسكينه ..

فهذي رساله للمتزوجين الجدد (اذا كنت متشدد دينيا) فانصح اترك الزواج ولا تتزوج

لان البنت محتاجه (رومانسيه) (حب) (دلع) ( احد يسمع لها) (وهي تسمع له) شكل

حلو مرتب ..

فاترك عنك اخي التشدد ولا تدخله البيت .. لان بنات قطر ما يحتاجون تشددك انت اخذتها

متربيه من بيت ابوها ما اخذت لك مسيحيه ولا بوذيه ..

فكان الرسول .. يمازح زوجاته ويسمع لهن ويلعب معهن وابدا ما كان (متشدد) مع زوجاته

في البيت .. بل موفر لهن كل سبل الراحه الموجوده في وقته ..

القصص كثيره عن ضحايا (قطريات) يعانون من المتشددين في بيوتهن .. وفي الاخير

ينتهي الزواج بالطلاق وما نشوف المتشدد يبحث عن زوجه متشدده مثله بل يتزوج له

اي جنسيه قطريه او عربيه سبحان الله يتغير حاله بعدها .. من الضحيه هنا عندك

الجواب اخي القارئ ..

وسلامتكم

[ROSE]

السلام عليكم وصباح الخير يالوجبه وكل اللي بيعلقون في هالموضوع

مب شرط المتشدد يكون ذو لحية وثوب قصير مثل ماذكرت

كل انسان غيور فيه نوع من التشدد ولكن فاهمه غلط يمكن

فعلا لاحظت هالشي ومن خلال تجربه لناس اعرفهم

الزوج كان مانع على زوجته كل شي حتى الخروج لاهلها وزيارتهم

كان يوديها لامها بس يوم الجمعه ونص ساعة او ساعة ان كثرت

وكل يوم مطيح هو في بيت اهله وماخذها معاه

السوق لا ، الزيارات لا ، الاماكن الترفيهيه لا

وفي الاخير تطلقوا والضحيه هم الابناء

ولما تزوج الزوجه الثانيه خلاها على راحتها لانه عرف انه

غلط في حق الزوجه الاولى وتحسف انه خسرها عشان امور

كان فاهمها غلط

فعشان مايخسر الثانيه بعد عدل من طبعه ولكن طبعا مع وجود

تشدد بسيط ماترك الحبل على القارب مثل مايقولون


الغيرة مطلوبه المراقبة مطلوبه من الزوج لزوجته

لحبه لها واهتمامه فيها ولكن مش بتشدد كبير ولا انه يلين ع الاخر

والزوجه هي الامر والناهي في حياته العدل مطلوب في كل شي


واشكرك على هالموضوع

[شبح الصمت]

يعـطيك العـافيه يالوجــبه وبيض الله وجهـك وكلامـك فيـه أشــوي من المنطـق وأشوي من اللوم على المتشددين في متشـددين في أمور الدنيا وهذا الشيء لا بد منـه لأنه لأزم أشياء أحنا نغفـل عنها ونتجاوزها ومع مرور السنين ترجـع عكسـيه..
من ناحية زيارة الزوجه لأهلهـا هذا شيء صـراحه ما يحـق له يتحكم فيـها ..
مشاهدة التلفزيون طبعا لازم لانه التلفزيون شيء خطيـــــررررررر في مجتمعنا حاليا وتدري المره مالها الا البيت تشاهد الأشياء الي منها فايده ..
طبعا الخروج لازم يطلعها ويلفها ويقولها كلام حلــو وهالشيء لا بد منـه لتجديد العلاقة الزوجـيه .. عاد لو المره نكديه هذا كــلام ثاني ..

وصـدقت يوم قلت يروح يتزوج لها من دول الشـام بالأصـح وينـقلـب حاله مليون درجة مادري فيـهم سحر وهالشيء شفــته بعيـني يعطيها الأولي والتالي ما يرد لها طلـب والأولـى مسكيـنه مخليـها تشوف وتحســر وتقول أشفينــي ...

اللهم استر علينا فوق الأرض وتحـت الأرض ويوم العــرض

[شبح الصمت]

نسيـت ما قولـك

المتشــددين الله يحفظهم

تعدد الزوجات + كثر الأكــل = اشبــاع وإبــداع

[ولد شرق]

فهذي رساله للمتزوجين الجدد (اذا كنت متشدد دينيا) فانصح اترك الزواج ولا تتزوج

كلامك حلو اخوي بس ودي افهم شي
اشلون رساله للمتزوج (اترك الزواج ولا تتزوج) اذا هو اصلا متزوج

[رذاذ]

مانع زوجته من كل حاجه (تلفزيون) (دش) (خروج)

(سائق) (راديو) زياره الام في الشهر 1 .. البنت ما استحملت وطلقها .. بعدها تزوج

بوحده (صرخت عليه) كم صرخه تادب (راحت اللحيه) (طال الثوب) ( دش وتلفزيون)

سياره مع سايق .. والضحيه زوجته الاولى المسكينه ..

اتوقع هالنوع الى تكلم -المتشدد - ما عنده شخصيه وبه نقص والدليل فشله بالتجربه الاولى وانصياغة وطاعته للزوجة الثانيه ..

انت متشدد على علين وعلى راسي بس بعد البنت في بيت ابوها بعز ما خذتها انت لجل تعلمها اطباعك واخرتها تصيدها نكسه نفسية او وسواس بسب تصرفاتك ..

وتأكد يالرجل المتشدد ان كلامك لو تم بالرفض (( لا تطلعين - قلت لج لا تتصلين - لا تشترين - لا تحطين - لا تلبسين - لا تروحين ))
ان ثقثك بنفسك معدومه وتخاف من البلاء الى تسمعه من بين ربعك ومجلسك ينتقل لك .. لذلك انت تحتاج لفتره تريح نفسك بها قبل لا تطلق وقبل لا تدفع مؤخر وقبل لا تظللم وتظلم .

الزوجه عطها ثقه وحب وحنان وخذ مبدأ التشاور بينك وبينها وبهدوء وصدق يا متشدد ان راح تكون عن عشر رجال لو مشت بنفسها .

اما مكسر مجاديفها الله يعينك على ما يجيك ..

برايفت لـ ش ب ح:
صباحك عسل وسكر وقشطه وماينيز وكتشب ^_^

[باقيـﮧ على ذ ڪرآڪ]

والله اخوى فيه من المتشددين والغير المتشددين من يسوى اخس من كذا

[بوحارب]

النوعية من الملتزمين اللي تتكلم عنهم اتوقع مب موجودين هالأيام او نادرين

شباب اليوم زين منهم يصلون

والحين البنات ودهم بواحد ملتزم وراعية صلاة في المسجد بس لاحول ولا قوة اكثرهم زاحفين

اما اللي يمنع الزوجة من بيت امها هذا ماعنده سالفة

[باقيـﮧ على ذ ڪرآڪ]

النوعية من الملتزمين اللي تتكلم عنهم اتوقع مب موجودين هالأيام او نادرين

شباب اليوم زين منهم يصلون

والحين البنات ودهم بواحد ملتزم وراعية صلاة في المسجد بس لاحول ولا قوة اكثرهم زاحفين

اما اللي يمنع الزوجة من بيت امها هذا ماعنده سالفة

صباح الخير يابو وضحى وصدقت الحين البنت ادور الملتزم الى يخاف الله

[بوخالد2]

كلام حلو يالوجبه

ولكن ليس كل متشدد يكون رجل دين كما ذكرت

التشدد او الخوف او الغيره من الامور الدنيويه اللى صارت حولك تجعل الناس في شك دائما من كثر الفساد في الارض والاشياء اللى اتشوفها كل يوم من طلعتك من البيت الى العمل او الى المجمع مثلا تشاهد اشياء تجعل منك انسان متشدد خوفا من حدوث الشي هذا حق زوجتك او اهلك


ولكن كن حليم ولاتكن شديد

واذا الاثنيين شدوا الحبل بينقطع

ويحدث ما لايحمد عقباه (( الطلاق ))

والله يعين اليهال على الانحراف بعد الطلاق