السلام عليكم ورحمة الله وبركاته
أسعد الله أوقاتكم جميعاً..
بكل بساطة وبلا فلسفة سنسترسل في ذكر ما تغنى به الماضي القريب البعيد
من قصص.. واغاني.. والعاب.. وعادات وتقاليد.. وكل اسبوع شي يديد
يعني...
خلونا اهووو بس نتصوخ سوالف ايديده ونسمع قصصها
عاد انا قلت خل اشكر الغلا شجرة الدر لانها ساعدتني وايد فتطوير الفكرة ووتقديمها وان شاء الله كل اسبوع ايديده بتييكم وبتييب معاها
العاب وبتحازيكم واذا تبونها تغني لكم بعد يمدحون صوتها
بس يدووه ماتحب الاضواء وماتبي تنشهر خايفة يسندرونها المعجبين وقطتها على راسنا احنا الصغار ننقل عنها شيصير في بيتها
عاد سترو على ما وايهتو وسوو روحكم ماتعرفون ايديده
ولو شفتو عيوز ببطولتها وعباتها على راسها ولا تقر من مكان لين مكان وفيدها دلتها غمضو عيونكم سوو روحكم ما تشوفون زييييييييين!!
يلا انقل لكم اول تقرير عن بيت ايديده وشصار يوم رحت لها
جنون: السلام عليكم يمــه
ايديده: مرحبا ببنتي المينونه شحالج يمه
جنون: يمه جنون مب مينونه
ايديده: والينون غير عن المينونه؟ يمج نفس الشي
جنون: لا يمه غير.. جنون اسم والمينونه صفه فوحده خبله
ايديده: زين ينون ومينونه.. شجره قالت لي ان كل واحد وله نصيب من اسمه
جنون: يمــه مالي بااارظ اتعايا وياج خلاص اللي تشوفينه مينونه صاحيه خبله مشموخه اللي تبين وشجوور خليها علي
وشوي الا دخل علينا صبي ثووووبه يشتكي منه عليه قحفيه ورافع الثوب صرواله يبين من تحت لونه بني من الطين ورييوله ملحه وعاض طرف الثوب بضروسه
ويركض ووراه الدريول : حسووون جيب سويج مال سياره
حسون: روح روح ماعندي ثويج..
ايديده: حسووون غربلك الله يننتني يعلك العاافيه جم مره اقول لك لا تدش غرفة الدريول وتاخذ سويجات السياره تبي يدك يضربك؟
حسون: ماخذيت ثويج انا بث خذيت الميدليه مالتي عطوني فالمدرثه
جنون: انت فالمدرسة وليحين ماتقول سين؟ وليش ماداومت
حسون: ثكتي ثكتي يالمينونه
جنون: يمه انا بروح ومره ثانيه بامر عليج.. شكله زحمه عندج الحين!!
ايديده: صج مينونه!! وين الزحمه ياليسن فالشارع احنا.. اهوو يلسي مكانج تقهوي وخل اقوم انا اييب العسو حق هالهيس
حسون: لالا مابي عثو مابي خلاث يود بابو ثويجك روح غرفتك ولا باخلي عثو ايديده يركض وراك
جنون: عسو يركض؟؟
حسون: اي يدتي تقول العثو بيلعب على ظهري لان انا صغير بيلعب معاي بث هو كبير بيركض وراه بث
جنون: ههههه يمه شمسويه فحسون؟
ايديده: والله يمج ماسويت له شي بس عساه ما ينني قلت له العسو بيلعب على ظهرك وتعالي فججي انتي شبيفهمه هالدعله ذي
جنون: حسون تعال اقعد عندي بنسمع قصه حلللللووه الحين
حسون: لا تقولين لي ام الخضر والليف مابي روحي تخرعيني انتي
جنون: لالا مب ام الخضر مادري الحمر قصه ثانيه
حسون: هيهيهي غبيه ماتعرف شنو ام الخضر والليف هيهيهيهيهيهي
جنون: لا ماعرف ومابي اعرف يمه يلا حازينا
ايديده: شحازي فيج انا اخاف اقول شي وتقولين لي خضر و حمر؟.؟. انتي بروحج بنت قواطي نيدو ماتعرفين حق سوالفي حسون احسن منج
جنون: لا قولي بعرف. وانا شعلي من سوالف حسون الا اخضر مادري اصفر انتي سولفي علي الحين انا وراي تقرير اكتبه عنج واحطه عالمنتدى ينطروني الحين هم بيقولون عنج هذاره وعيوز قشره ومامنج فايده
ايديه: ويعل العيوز القشره تقعدج نصايف الليالي شهر ما ترقدين يالمينونه انا عيوز قشره؟
جنون: لا يمه فديت خشمج الي حاطه فيه ترجيه محشوومه انا اقصد ان في اعضاء يتمللون بسرعه فالمنتدى والحين بيقولون مصخت السالفه
ايديده: يمج اذا السالفه ماصخه رشي عليها ملح.. ويالمينونه هذي مب ترجيه هذي يسمونها زمام
جنون: تنكتين يديده مب هينه انزين زمام زمام!!
ايديده: شنسوي بعد.. شوفي دامج طلعتي خبله ماتعرفين شنهي ام الخضر والليف ماني بقايلتلج شي غيرها بس خل هالهيس الاربد يقوم يبدل ثيابه فطما اقولج قصتها.. حسووون قوم تسبح عن اللثد اللي فرويلك يالمجثي والبس جلابيه لا تلبس ثوب الحين مالك حايه فيه
حسون: ابي اثمع القثه ايديده
جنون: توك تقول ماتبي تسمعها.. زين حسون انا بقولك القصه بعدين واذا قمت وتسبحت وبدلت بوديك الجمعيه
حسون: جعميه مره وحده بث عثان اتثبح؟ خلاث انا باتم اتثبح لين المغرب عثان توديني الثوق بعد اثتريلي ثياره ام جهاث
جنون: ههههه زين روح تسبح يلا
وقام حسون وعض على ثوبه وقحص بريوله على الصبان احححححن شيييوو وسوالنا غبره واختفى هو فالغرفه
ايديده: بس هذا حالي وياك يالهيس
جنون: يمه ليش ما تبينه يقعد ويانا ؟
ايديده: ما بيه يعرف اني اقص عليه على سالفه ام الخضر واليف خله يصدقها لين يكبر ويعرف عقب انها بس جذي ومب صج
جنون: اااهااا. زين يلا قوليلي عن الخضره
ايديده: الله يصبرني على ما بلاني.. قلت لج ام الخضر والليييييييف.. هذي الله يسلمج من يوم كنا صغار كانو امهاتنا يخرعونا فيها
عشان ما يبونا نطلع فالقوايل خايفين علينا من دوخة الشمس لو يصير فينا شي والا لو حد من هالبتاتين يخطفنا ما درو عنا.. واحنا يهال
كانو عقب الغدا يقولون لنا دشو رقدو القايله ولا لاتطلعون من البيت لان ام الخضر والليف تاخذ اليهال اللي يطلعون القايله.. ويقولون احيان انها تطير فالقايله تدور اليهال اللي برع البيت
وهذي بس جذي والا ام الخضر والليف كاانو يقصدون فيها سعف النخله في ناس يقولون ام الخضر والليف وناس يقولون ام السعف والليف
واحيانا كانو لين يبون يخرعونا زياده يقولون لنا ام احمار.. عاد ام حمار هذي يقولون انها ادميه وريولها ريول حمار وتاخذ اليهال وتاكلهم حتى مب بس يقولون عن ام حمار حزة القوايل.. كانو حتى يقولون انها تطلع فالليل
جنون: وانتي صج خفتي منها؟
ايديده: اي شلون ماخاف.. انا مره طلعت فالقايله بدون شور امي.. وسمعت صوت النخله من الهوى تتمايل وخفت ركضت وانا رايحه البيت وطحت وتزلغت ركبتي ويوم شافتني امي داخله عليها اصيح ما طمتني الا خرعتني زياده
وقالت شفتي لانج ما سمعتي كلامي.. هذي ام الخضر والليف طيحتج بالعماله عشان تخافين ولا تطلعين مره ثانيه ومن عقبها وانا القايله ولا اشبر عند عتبة الباب
جنون: ههههه والله انتي طلعتي مقصه بس صدقتي انها طيحتج؟
ايديده: وشلون ماصدق وانا صج طحنت وسمعت صوت النخله؟ وكنا يهال وصغار مانفهم مثلات حسون الحين ما يفتهم فقير ويحسب ان صج في ام الخضر والليف
شوي والا حسون طالع كاشخ بالجلابيه المقصمله والصروال الطويل المخبخب والفنيله يدها طالعه من تحت يد الجلابيه
حسون: يلا بنروح الجعميه انا صرت نظيف..
جنون: هههههه زين العصر بوديك الحين قايله وبتيي اختك من المدرسه وامك وابوك من الشغل.. روح ارقد احسن لك والا ان يا ابوك وشاف انك مارحت المدرسه بيهاوشك
ايديده: ايه مب انت قايل لهم فالمدرسه انك ميهود.. والله اني انا الميهوده مب انت روح انسدح وباييب لك غداك والعصر بتوديك الجعميه على قولتك
0
0
0
0
0
هني انتهى يومي الاول مع الهيس حسون
واتظروني كل اسبوع مع تقرير من بيت ايديده وعيالها وشخصيات جديده
حبيت انوه ان الموضوع كل اسبوع يكبر بقصص اكبر .. وبديت هالمره بقصة طفوليه لانها اول مره وكل مره تكبر القصص وتكون ابلغ
شخصية ايديده وحسون والباقي اللي بتشوفونهم. موجودين في مكان ما وزمان ما.. وان نقص عددهم فرحمة الله على اللي راحو
وجميع القصص اللي بتنذكر ان شاء الله اما حقيقيه صارت او خرافيه لكن توارثوها وانتقلت لنا
اتمنى ماطولت عليكم ومللتكم
ملاحظة: في بعض الكلمات يمكن تكون غريبة عليكم واللي يبي يعرف معناها يأشر بس