السلام عليكم ورحمة الله وبركاته
في البدايه يتسائل البعض او الكثير كيفية الشراء عن طريق النت
والبعض يجهل هذا الموضوع والبعض يخاف منه بنفس الوقت والسبب الخوف في
سرقة بطاقاتهم الالكترونيه سواء الفيزا او الماستر وماشابة ذلك
المهم ..
اليوم بقولكم الطريقة اللي انا اتعامل فيها وهي سهله جداا في شراء الاشياء من الانترنت
ومن المواقع المعروفه سواء موقع امازون او موقع ايباي ..
قبل كل شي وعلى شان تدخل معترك الشراء عن طريق النت
لازم تتوفر عندكم بعض الاشياء
........
اولا الحصول على بطاقة فيزا او ماستر ..
وثانيا .. الحصول على بريد في الدول التاليه وهي الولايات المتحده الامريكيه
وبريطانيا ..
............
بقولكم الحلول لكيفية الحصول عليها ..
بطاقة الفيزا الكل متخوف في ضياع فلوسه او سرقتها من الانترنت
ولاكن احسن طريقة وافضلها اخراج بطاقة فيزا للانترنت خاصه
يعني بطاقة فيزا تستخدم للنت ولا تستخدم خارج النت ابداا
واحسن مكان لصرف هذي البطاقة في بعض البنوك .. ولاكن عن رؤيتي الشخصيه
فأحسن بطاقة هي تجدونها في شركة المجموعة ..
شركة المجموعه يعطونكم بطاقة فيزا ماستر كارد للانترنت بقيمة اعتقد 250 ريال
ولمدة سنه مااعرف كم صار سعرها ولاكن ميزتها
انكم مثلا اتحطون فيها مبلغ مثلا 2000 ريال وتشترون فيها اللي تبون
وكل ماخلصت وانتم تبون تشترون شي اتروحون للمجموعة اتحطون فيها الملبغ
اللي تبون تشترون فيه الشي من النت يعني لو الغرض اللي تبون تشترونه ب 1000 ريال
انتم حطوا 1200 ريال وبقولكم ليش حطيتوا هالمبلغ بعدين ..
-------------------
ثاني شي البريد اللي في امريكا وبريطانيا ..
على شان ايصير عندكم بريد اهناك فيه شركة في الدوحه اسمها ارامكس ..
موقعها في شارع سلوى قريب من دوار قطر للديكور ..
اتروحون اهناك تعطونهم بطاقتكم الشخصيه وتدفعون مبلغ اعتقد 300 ريال
واهم شي تعطونهم بريدكم الالكتروني في تعبية الطلب وتعطونهم رقم جوالكم اللي
بتوصل فيه المسجات اذا وصلكم شي في بريدكم
ولاتمسحون المسج اللي يوصلكم من ارامكس اذا وصلكم شي لانه راح يكون مثل الفاتوره
اذا رحتوا لارامكس بس راووهم المسج وبيعطونكم غرضكم اللي وصل
وبالنسبه لبريدكم الالكترني راح يرسلون لكم على بريدكم الالكتروني عنوان بريدكم اللي في امريكا وبريطانيا
والسبب في هالبلدين انكم لو شريتوا غرض من امريكا حطوا بريدكم اللي في امريكا في
الطلب اللي تبون تشترونه واذا في بريطانيا حطوا بريدكم اللي في بريطانيا
وعلى فكره سعر التوصيل من امريكا للدوحه مثلا يحسب على سعر الوزن فقط
يعني لو شريتوا تي شيرت او ملابس ماراح يكون لها وزن كبير
راح يكلفكم يمكن 35 ريال فقط للتوصيل ويمكن يستغرق من اسبوع الا اسبوعين فقط
اعلى مبلغ دفعته في شراءسلعه حجمها كبير كان 200 ريال فقط
========
طبعا بعد ماسوينا هالاشياء مابقى علينا الا انروح اندور شي نشتريه من النت
وعلى شان ماتغامر في اي تشتريه اشتر اول شي شي سعره رخيص وبعد اسبوع او اسبوعين
راح يوصلك مسج على جوالك المسجل في ارامكس فيه رقم طويل هذي هي الفاتوره ..
====================
انا اقتصر شرحي فقط على موقع امازون ونفس الطريقة هي موجوده في موقع ايباي ..
يالله نبدا الشرح وان شاء الله تستفيدون
في البدايه ندخل موقع امازون .
ونضغط على اللي عنده اشاره للتسجيل في الموقع
وثاني شي راح تطلعلكم هالصفحه فيها خياريين الخيار اللي فوق هو اتحط فيه ايميلك
اذا كنت مسجل فيه اصلا من زمان واتحط الباسوورد تحت امام كلمة yes واتحط الباسورد
لاكن بما انك شخص جديد في التسجيل ضع على علامة no واضغط على
كلمة sign in using
والصفحه التاليه نبدأ انعبي الفراغات
الفراغ الاول نكتب فيه الاسم
الفراغ الثاني حط فيه الايميل الخاص فيكم
الفراغ الثالث اعد كتابة الايميل نفسه
الفراغ الرابع حطوا الرقم السري او الباسوورد
الفراغ الخامس اعيدوا كتابة الباسوورد نفسه
بعد هالشي وبعد ماسجلنا انت الان عضو في الموقع
وراح اتحصل اسمك فوق مكتوب قبلة not كذا
الان انت مسجل وتقدر اتروح تشتري اللي تبي
لاحظوا فوق في الصورة
الان اذا انت تبي تشتري شي اكتب اسمه في البحث وسو بحث للاشياء
ولا حصلت اي شي من بين الصور والصفحات اضغط عليه بتطلعلك هالصفحه
وانا استخدمت مثال اني راح اشترفي كفرات للايفون مثلا
اذا انتم تبون هالشي اضغطوا على الخيار اللي في الصورة
وهي انكم اتحطون غرضكم في السلة الخاصه في الموقع
بعد ماحطيتوا الغرض اللي بتشترونه في السلة بتلاحظون ان السلة صار فيها الشي اللي
اخترتوه وبسعره اللي بالدولار مثل هالصورة
واذا مثلا اكتفيتوا من ترس السلة اضغطوا على نفس الخيار اللي عليه السهم
على شان طريقة الدفع وملئ الفراغات الخاصه في التوصيل على بريدكم اللي
في امريكا
وبعد ماضغطتوا على الخيار اللي قبل اشوي راح تطلعلكم صفحه فيها ايميلكم
ويقولكم حطوا الباسوورد الخاص في امازون لانه يخافون حد يستخدم اشتراكم
لان موقع امازون يحفظ معلوماتكم ااذا شريتوا من قبل فيه
يعني المره الاولى بس اللي اتعبون فيه الخيارات المرات الجايه ماراح اتعبون شي
بس نكس نكست
المهم خلونا في المره الاولى على شان نتعلم
لاحطيتوا الباسوورد اضغطوا sign in
الان هذي الصفحه فيها عنوانكم اللي في امريكا وبريطانيا اللي وصلكم على بريدكم الالكتروني
من ارامكس
اذا الغرض من امريكا حطوا بريدكم اللي في امريكا .. ولاحظوا انه بريدي موجود فوق
والفراغات اللي تحت انتوا عبوها نفس ماهو بريدي اللي في الصورة
بتحصلون ايميلاتكم اللي في امريكا نفس بريدي بالضبط بس يختلف فيه شي بسيط
ولاحطيتوا بريدكم كامل نفس طريقتي اضغطوا على ship to this address
الان راح يطلعلكم شي خاص في الشيبينغ او التوصيل
يعني كيف تبون المحل اللي شريتوا منه يوصلكم الاغراض اللي شريتوها
يعني تبون بأسرع وقت ولا ماتبونها مستعجل تبونها على راحتهم
الخيار الاول هو ستاندر يعني العادي
الخيار الثاني خلال يومين يوصلكم الغرض
الخيار الثالث خلال يوم واحد يوصلكم الغرض لبريدكم
وهذي تختلف من محل لمحل في التوصيل
وبعد ماتخلصون اضغطوا على كونتنيو او continue
الان وصلنا لمرحلة ادخال الفيزا او الماستر كارد
اختاروا مثلا الماستر كارد وحطوا الرقم الطويل المكون اعتقد من 16 رقم
وبعد ماتحطونها فيه خيارات لتاريخ انتهاء البطاقة الشهر والسنه
يعني بتحصلون في البطاقة الماستر كارد مكتوب مثلا 8/10
يعني شهر 8 وسنة 2010
وبتحصلون شي اسمه سيكيوتري وهذا هو الرقم السري الخاص بالبطاقة الفيزا
بتحصلونها قريب من الرقم الطويل عباره عن ثلاث ارقام حطوهم واضغطوا كونتنيو
الان وصلنا لااخر خيار وهو خيار يخبرك فيها بالاشياء اللي شريتها وبالسعر النهائي اللي بتدفعه ويخبرك بالعنوان مالكم اللي بترسله الغرض ويخبرك ايضا برقم الفيزا اللي بياخذها منكم
اذا كل الاشياء تمام اضغطوا على العلامة اللي عليها السهم وخلااص مبروك عليكم الغرض
وبعد ماخلصنا انتظروا يومين او ثلاثه وادخلوا على موقع ارامكس
وادخلوا باسووردكم في الموقع وايميلكم
بتحصلون فيه شي وصل في بريدكم اللي في امريكا
لان شركة ارامكس يعطيكم خيار انه فيه شي وصل في بريدكم في امريكا مثلا
ويقولكم وين الحين وصلت شحنتكم ومتى راح توصل الدوحه
ويراويكم سير الرحله الخاصه للشحنه من امريكا للدوحه
=============
وااسف اذا قصرت في شرحي واي سؤال في هالخصوص او توهقتوا في شي
خبروني على الخاص او من خلال هالموضوع وان شاء الله ارد عليكم بما يفيدكم
وااسف للاطاله
للمعلومية اخواني انا ولد ...
تمنياتي لكم بالتوفيق