السلام عليكم ورحمه الله وبركاته ..
أغلب الأعضاء والأصدقاء يسئلون عن طريقة شراء الأيفون 4من بريطانيا ..
قبل كل شيء بعض النقاط راح اذكرها ..
الايفون 4 نزل في امريكا مقفول بشكل خاص لشركـة الاتصالات AT&T
ونزل في بريطانيا وفرنسا SIM FREE في محلات أبل
وليس في محلات الاتصالات ( بالعادة محلات الأتصالات يخلونه مقفول )
بعض الأسئلة اللي راح يسئلها الأعضاء
ليش يا خي تحط هالطريقة ، راح تخرب علينا في بيع الايفون ؟ وشنو مستفيد انت ؟
حطيت الطريقة من مبدأ ( حب لأخيك ما تحب لنفسك )
وبخرب على نفسي لاني جايب واحـد للبيع ..
ولان سعره راح ينزل بشكل مبالغ فيه في الدوحـة في شركات الاتصالات .
مستفيد ( دعواتكم لي بالتوفيق)
ومستفيد ان الأعضاء يتعلمون شيء جديد ..
أشلون عرفت أن الأيفون مفتوح رسمي اللي في بريطانيا ؟
لانه مكتوب في موقع ابل هالكلام
وموجود في الصورة ..
ومعنى انه مفتوح رسمي
اي انه يشتغل على أي شبكة اتصالات في أي بلد في العالم
" اقرا الكلام اللي في المستطيل الاحمر"
هل فيه ضمان اذا طلبته عن طريق موقع ابل ستور على الانترنت من بريطانيا ؟
نعم فيه ضمان كما هو مذكور في الموقع
لمدة 90 يوم على الاشياء الفنية
ولمدة سنة على البطارية والاشياء الثانية ..
هالكلام موجود في آخر هذه الصفحة
iPhone warranty
iPhone comes with 90 days of complimentary technical support. In addition, your iPhone, its rechargeable battery, and all included accessories are covered against defects for a full year from the purchase date by
كم المسموح لي اطلب أيفون4 ؟
مسموح لكل شخص يطلب عدد 2 بنفس بيانات بطاقة الدفع ( الفيزا ) وبيانات الشحن .
هل اقدر اطلب الأيفون الأبيض ؟
الايفون اللون الابيض ما نزل حالياً وراح ينزل بداية شهر 8 في امريكا
كم مساحة الأيفون المتوفر الشراء حالياً ؟
موجود ايفون4 / 16 جيجا
وايفون 4 / 32 جيجا
كم السعر اللي راح اشتري فيه الايفون4 من بريطانيا ؟
الايفون الاسود4 16 جيجا = 499 جنيه // = 2,758.79 QAR ( حتى تاريخ اليوم )
الايفون الاسود4 32 جيجا = 599 جنيه // = 3,311.65 QAR ( حتى تاريخ اليوم)
(تقدر تتأكد من صرف العملة من هنا )
تضيف لسعر الشراء
سعر شحن التلفون عن طريق ارامكس لين الدوحة ( تقريبا 100 ريال قد تزيد او تنقص )
متى راح ينزل الأيفون في قطر وكم سعره ؟
الأيفون متوقع ينزل شهر 9 عالعيد تقريباً ..
وسعره المفروض انه يكون نفس سعر 3Gs .
الايفون مفتوح رسمي يصير استخدمه في قطر أو في الخليج ؟
نعم الايفون اللي تشتريه من موقع شركه ابل عن طريق الانترنت
وبالطريقة الموجودة في الشرح مفتوح رسمي
وتقدر تستخدمه على اي شبكه اتصالات ولكن بشرط واحـد
وجود شركه Micro Sim
شريحه جوال مصغرة .. ( اصغر من العادية اللي نعرفها من سنين )
اشلون اقدر احصل على شريحه الجوال المصغرة Micro Sim?
تقدر تسئل شركه الاتصالات اذا متوفرة عندهم
حالياً كيوتل وفودافون يوفرون الشريحه ..
في حالة اذا شركة الأتصالات ما نزل الشريحه
تقدر تقص الشريحة الحالية اللي عندك وتخليها اصغر
وشرح طريقة القص موجود في الانترنت من هــنا
شنو الأشياء المطلوبة عشان اقدر اشتري ايفون من بريطانيا ؟
أذا كنت خارج بريطانيا ..
1- حساب بريدي عن طريق شركة ارامكس
اللي تعطيك صندوق بريد افتراضي ( وهمي ) في بريطانيا وامريكا
واي شيء تشتريه يحولونه لك إلى قطر بمبلغ معين ..
ليش هالطريقة ؟؟؟ لأن الشراء من موقع ابل يشحن مجاناً لأي عنوان داخل بريطانيا بس .
2- حساب فيزا بطاقة بنكية سارية المفعول وتقدر تشتري منها على الأنترنت
وفيها مبلغ كاااافي ( انتبه لفرق العملة ) .
3- حساب في الايتيونز ITunes اذا ماعندك تقدر تسوي بنفس الوقت ..
4- لغة انجليزية بسيطة ..
/
اذا كنت داخل بريطانيا تقدر تطلب نفس الشيء ولكن الاختلاف في عنوان بريدك ..
/
هل أقدر اختصر هالخطوات كلها ؟
نعم تقدر اذا لغتك الأنجليزية جيـدة بأمكانك الاتصال مباشرة بخدمات البيع المجانية لشركه ابل
عن طريقة الانترنت باستخدام برنامج الاسكايبي skype على الرقم التالي
0800 048 0408
وتقول لهم ابي اطلب ايفون وراح يتابع معاك الخطوات / خطوة خطوة / ويسئلك عن معلومات الدفع / ومعلومات الشحن / ومعلومات الفيزا الخ ..
لين يوصلك الأيميل ..
اشلون أتاكد أن طريقتك صحيحة ؟ وشنو اللي يضمن لي كلامك ؟
اللي يضمن أني جربت هالطريقة وبتشوف معلوماتي في الصور
وتلفوني راح يوصل قريب على نص الشهر ..شوف حالة طلبي آخر الموضوع.
/
نبدأ الخطوات
ندخل على موقع ابل ستور البريطاني من هنا
كما بالصورة ..
بعدها نختار أي تلفون 16 جيجا / 32 جيجا
ونلاحظ تاريخ التوصيل 3 اسابيع
ونلاحظ مكتوب تحت
* iPhone 4 order limit: two per customer.
يعني تلفونين لكل شخص ..
بعدها راح يجينا عدد التلفونات اللي راح نشتريها
نقدر نخليها 1 او 2 بس ..
ونضغط بعدها checkout
للمتابعــة
/
بعدها راح يسئلنا اذا عندنا يوزرنيم وباسورد حق الايتيونز او الاستور
للدخول / نكتب البريد الالكتروني كامل والباسورد ونسجل دخول /
اذا ماعندنا نقدر على اليمين نكتب بريدنا الاكتروني ونختار تسجيل جديد
/
بعدها راح تجينا معلومات الدفع
Billing Address
وهي معلومات الدفع
بالنسبة بما أن بطاقتي الفيزا من بنك امريكي
حطيتي معلومات سكني في امريكا ..
بالنسبة لك تقدر تحط معلومات البنك الخاص فيك بالدوحـة
او معلومات سكنك في الدوحــة
بمعنى ادق ( هي معلومات صاحب الفيزا)
ملاحـظة بما أننا في الاستور البريطاني اترك معلومات البلد على بريطانيا
وفي خانة الكود البريدي اكتب هذا SL3 0NS ولا ما راح تواصل عملية الشراء
(ماراح يوديك للصفحة اللي بعدها )
/
بعدها نواصل راح تجينا صفحـة بيانات الشحن ( اهم شيء )
لمعلوماتك اخي الكريم انا عبيت البيانات اول شيء
وغلطت فيها وكنسلو طلبي .. وعدلت على البيانات
نفس اللي في الصورة وتم الموافقة على الطلب ..
كل ما عليك تكتب نفس هالمعلومات بالضبط
والتغير يكون في اسمك / ورقم صندوق بريدك البريطاني الخاص بارامكس وبس ..
( تقدر تنسخ العنوان من هنا )
Aramex House Old Bath Road
DOH XXX
(XXX = رقم صندوقك )
Colnbrook Slough
Berkshire SL3 0NS
Tel: 01753-689898
بعد التأكد من المعلومات نواصل
راح تجينا صفحة لتأكد معلومات الدفع والشحن
نفس هالصورة
نتجاهلها بالضغط على click here
بعدها /
لنختار طريقة الدفع ورقم البطاقة
نفس هالصورة
نختار فيزا .. ورقمها / وتاريخ الأنتهاء / وكود التأكيد ( الموجود خلف بطاقة الفيزا)
بعدها نواصل
راح يطلع لنا تأكيد الطلب / نضغط موافق مرة وحــدة
وننتظر حتى يتم قبول الطلب ..
ننسخ المعلومات اللي تطلع في ملف ..
اهم مافيها هو رقم الطلب ..
اذا كل البيانات صحيحة
( بيانات الدفع + بيانات الشحن )
راح يوصلنا بريد الكتروني على البريد اللي سجلناه
نفس هالصورة ..
تأكد لعملية الشراء والمبلغ وكل المعلومات ..
ملاحظة هالصورة من ايميلي بعد تاكيد طلبي ..
ومبروك عليكم ..
------------------------------
كيف أتاكد من أن طلبي تم قبوله ولا رفضه؟
تقدر تدخل على حسابك في الاستور ومن فوق من اقصى اليمين عند كلمه account
بتحصل order state
تضغط عليها وتحط اليوزر نيم والباسورد الخاص فيك
وبتحصل الطلب الخاص فيك وتاريخ وصوله
اذا مكتوب عليه Not yet shipped معناته قبل الطلب ..
اذا مكتوب عليه Cancelled معناته تكنسل طلبك لأي سبب من الأسباب ..
شوف صورة من حسابي .. لكل طلباتي ..( الـ 2 اللي توافق عليهم / والقديم اللي تكنسل لاني كتتب عنوان ارامكس غلط )
كيف أتاكد اذا فيه مشكله وسبب إلغاء طلبي ؟
اسهل طريقة تتصل فيهم تلفون على رقمهم المجاني
عن طريق برنامج الأسكايبي على هالرقم 0800 048 0408
طلبي انلغى وخصمو المبلغ من حساب الفيزا ؟
المبلغ تجمد وعشان يرجعون لك الفلوس أتصل فيهم
بالعادة نظام الفيزا ترجع الفلوس 15 يوم لين شهر لكن
كلمهم وخلال يومين يرجعون الفلوس بحسابك ( صارت معاي شخصياً في طلبي الاول اللي انلغى )
يصير اطلب تلفون واحـد وبعدين واحـد ؟
نعم يصير اذا مشى طلبك في المرة الاولى
بعدها العملية سهلة وما تاخذ ثواني
لان بياناتك كلها مستجلة / بس راح يسئلونك رقم التاكيد الخاص بالفيزا ( الثلاث ارقام).
اشلون اعرف انهم سلمو لي الطلب على بريدي في ارامكس ؟
راح يجيك بريد الكتروني منهم ان طلبك جاري شحنه ومن ثم تسليمه .
كيف استلم تلفوني من ارامكس ؟
اول ما يوصل طلبك الدوحة يجيك مسج على رقم تلفونك المسجل بارامكس
فيه معلومات الشحن والطلب وقيمه الشحن ورقم الطلب كامل
هل يصير احد غيري يستلم التلفون من ارامكس ؟
نعم يصير تعطي الشخص رقم الطلب الي ارسلته ارامكس لك
ويروح يدفع قيمة الشحن ويستلم التلفون.
هل يصير استخدم حساب ارامكس لشخص غير/ صديقي مثلاً ؟
نعم يصير ولكن تحط في بيانات الشحن اسم الشخص ورقم صندوقه بارامكس
( وهذا اللي صار معاي ، طلبي عن طريق صندوق احـد الأصدقاء " مشكور اذا يقرأ" )
هل يصير اطلب أكثر من تلفونين ؟
نعم تلفونين لكل بطاقة فيزا / ولكل عنوان ارامكس .
هل يصير اتواصل معاك عشان تساعدني اذا عندي سؤال او استفسار ؟
بكل سرور عندك الرسايل الخاصة ..او في مدونتي (بالتوقيع)
في النهاية الموضوع اجتهاد شخصي ..
ومن تجربه شخصية مب مجرد كلام
طبقتها بنفسي .. وتلفوني الاول بيوصل تاريخ 18 ( معروض للبيع)
والثاني تاريخ 21 ..
في الاخير
أتمنى لكم التوفيق .. وأتمنى دعائكم ..
واللي حاب ينقل الموضوع حياه الله ..
مع ذكر المصدر ..
أخوكم
الحجاجي
|
رد مع اقتباس
المشاركة الأصلية كتبت بواسطة Gh2o
