السلام عليكم ورحمة الله وبركاته ..
مساكم الله بالخير جميع .. ومبارك عليكم الحيا .. اليوم موضوعنا يمكن يهم شريحه معينه من الناس الا وهو الزار او الخبيثي او السامري واخر شي استنزال !!
ما هو الاستنزال ؟ عباره عن اغنيه او نشيده او تهليل بشكل معين عقبها يستنزل احد الاشخاص او اكثر من شخص ويبدأ بالتخبط او التنطط او الرقص بشكل عشوائي !! شالسالفه ما يندرى .. يالربع شفيه فلان .. ما فيه الا العافيه بس استنزل زين وبعدين ما عليك شوي يرد مره ثانيه !! شلون يعني لا ذول المشايخ نزلوا عليه !! شنو مشايخ شالسالفه .. انت ما عليك بس شوف وما يصيدك شي .. يا فلان ترى الهدهد عندي !! عندك ليش .. اصبر شوي وبتعرف كل شي .. صبرنا شوي الا بخور ذكر البان .. تبخر فديتك . . لا الشيخ ما اداني ريحته !! اقولك تبخر .. زين انشاء الله اهم شي خلك طبيعي ولا تزعل !!
الى الآن ما فهمت شي .. قلت انسى يا رجال الموضوع .. وتدور الأيام .. الا جوالي يدق !!
السلام عليكم .. هلا بالغالي اشحالك امورك طيبه في عندنا اليوم شي ثقيل ها شرايك امرك ونروح !!
شنو يعني ثقيل وتمرني ونروح ؟؟ اليوم الاثنين صح .. قلت اي صح .. قال اليوم حق المشايخ .. من المشايخ تقصد شيوخ دين ولا شيوخ فلوس ولا شيوخنا !!
لا الله ايهداك .. شيوخ غير علويين !!
هاي شنو بعد ؟ .. خلاص بامرك يالهدهد وعقب بتشوف كل شي بعينك .. زين امرنا لله .. مر اخونا علي ورحنا صوب ذاك المكان !! .. الا ذيك الخيمه وذاك البخور اللي يجيب التايه !! شالسالفه .. قال السموحه ذاك اليوم ما شفتك مرتاح .. هالمره بتعجبك السالفه !!
امرنا لله سامري مره ثانيه .. يا ولد انا ما لي بهالسوالف .. ..المهم يا اخوان السموحه اني طولت السالفه .. قبل لا ادش شوي الا شيبه جا صوبي ويقول لي .. تبخر يا وليدي .. قلت ان شاء الله تبخرنا ..
وكان بعد شوي يبتدي التهليل .. الا يا جماعه شوي واحد نقز من مكانه قلت بل شالسالفه وشلون نقز وش له نقز ؟؟!
المشكله ان الرجال الي نقز اول شي ما يشوف الله لا يبلانا .. ثاني شي الرجال يوم ما وصل اثنين مجودينه لأنه ما يقدر يمشي هل هو مريض او بسبب انه بعافيه ما شاء الله من الوزن الثقيل لكن اللي شفته .. اي شفته اخوكم الهدهد شاف شي ما لا يصدقه عقل .. الرجال استوى بخفة الريشه !! ويناقز .. شوي الا حولوا اغنيه ثانيه كان واحد احداي يقط الغتره على وجهه قلت لا حول ولا قوة الا بالله .. ياليل مطولك .. اشفيه هذا بعد كان رفيجي يقولي ابد استنزل واللي فيه وحده !! .. المهم قلت زين خلني اروح بيتي ابرك عند عيالي وام عيالي شللي خلاني ارد عليك .. قال اصبر توه الثقل ما جا .. قلت لا ثقل ولا بقل الله يرحم والديك ابي اروح البيت .. .. بالفعل عشر دقايق حركنا من هناك .. قلت له يابوفلان شالسالفه وش هالخرابيط اللي تصير؟ .. قال ابد مجرد تغير جو ..قلت تغير جو هالشكل .. امحق تغير ..ناس الله لا يبلانا فيها ما فيها .. وش لنا بهالسوالف .. ورديت البيت ولله الحمد وما فينا الا العافيه ..
سؤالي .. هل الزار هو علاج؟ ام هو حالة شرود نفسي ؟ وما هي علاقة الجن بذلك ؟ اليس الزار هو استدعاء للجن على حسب ما شفت ؟ يا جماعه في حد ياكل جمر؟؟؟ في حد يقدر يمشي على الجمر ؟؟؟ الجواب لا لكن هذا اللي شفته .. وعندي لكم مقطع بسيط لشخص استنزل وشوفوا طريقة استنزاله .. كنه واحد يشله شل من الأرض .. يوم يمشي كنه يطير ما يمشي !!
يرجى الضغط على الرابط
وحياكم للنقاش .. ان اردتم النقاش .. وليس الجدال !
والله لا يبلاكم ويبعد عنكم كل شر وكل جن .. مع ان الجن حلوين