النشــاط المفــرط لدى الأطفــال ( Hyperactive ) ~

[ابو علاوي]

موضوع مهم جداً
عندي نفس المشكلة مع وليدي علاوي مايهدى ماشاء الله عليه
عمره سنتين
مايخلي شي في البيت الا يتعبث فيه
كل 5 اشهر نبدل الخدامات بسببه
مايبون يتعبون الخدم مع الجهال
عنده نشاط موطبيعي
لكن لاحظت عليه يوم اوديه لسورية ويلعب مع الاطفال يستانس اكثر وينام مبكر
لانه يصرف طاقة
وهنا المسيكين محبوس كأنه في سجن
اتوقع كثرة النشاط بسبب الظروف المحيطة بالطفل حالياً وأهم سبب ان العيشة تغيرت مومثل قبل
واذا البيت فيه حوش او مساحات مفتوحة بالحارة يقدر يلعب فيها الطفل اتوقع يفرغ نشاطه باللعب اما اللي ساكن بشقة او منطقة مزدحمة يحس فيها الطفل كأنه مسجون ويفرغ طاقته الكامنة في اثاث البيت والركض والصراخ و..و..
شكراً عالموضوع

[بصمة قطرية]

في ولد صغير أعرفه شخص بالنشاط المفرط
و قال الدكتور حق أمه إنها تخلي الولد ياخذ كم لفه حول البيت الصبح قبل المدرسة وراح تحس إن الولد ركد شوي

كم لفه حول البيت كل يوم الصبح ..!!
وفي البرد ..
والمطر ..

حل مش مقنــع ..!!!
وفي المدرسة شيسوون نفس الحل ..؟
يمكن ينجح مؤقتاً بعدها بيمل الطفل ..

[بصمة قطرية]

الحين الأم تنزل اتييب له ماي والخدامة اتشل له شنطته
والأبو ياكل عنه اكله والاخو يشتري حلاوته والاخت اتحل له وظايفه
وين بيفرغ طاقته ؟
وفوق كل هذا ،، يخلونه يلعب في الصالة وعلى السراير
اشكبره ويناقز يقولون لج نشاطه زايد

هذا تدليع ..
وسوء تربية ..
الولد تعود على عادات خاطئة وهالشي نتج عنه سلوكيات خاطئة ..
للأسف كثيرين يجهلون المقصود بــ ( الطاقة الزائدة ) ..
اي طفل مش قادرين يتحملون شقاوته قالوا نشاط زايد ..!!

[بصمة قطرية]

لان قبل كان العقال يلعب على ظهورهم يأدبهم والله يخلي الخيازرين مافيه دلع وحركات و ماقدر ولدي شيطاني ولا ولدي يتحرك ومجنني ويكسر الدنيا 00

اخبر مره جاتنا وحده البيت اتزورنا ومعاها اعيالها الله وكيلج ماتم شي ما ارفسه بريله وينطط فوق الكراسي ويكت الماي على الرخام ويتزحلق وامه اتقول عيزت معاه (فيه نشاط زايد ) وهو مثل ابليس يسمع هالكلمه ويزيد صدق الكذبه

كنت بقول لها ادلين سوق العلي فيه واحد يبيعع خيازرين اخذي وحده ونقعيها بماي وملح وبيتسنع 000

عموما مصطلح (نشاط مفرط ) ممكن يكون حاله مرضيه اذا تم الكشف على الطفل بواسطه موجات خاصه بالمخ ومنها يعرف الطبيب هل الطفل يعاني من حاله مرضيه فعلا" وتحتاج علاج ام لا 000لكن كل وحده بتقول ولدي فيه نشاط مفرط بدون كشف المختصين صراحه لاتعليق 00

المهم فيه مراكز تعالج النشاط الزايد بقطر واعتقد اكاديميه قطر فيها قسم مختص كأني سمعت بس للملتحقين بالاكاديميه 0وعلى ماضن مستشفى حمد كذلك بس مادري مهب متأكده من المستشفى

ولكن بشكل عام اشوف التربيه وتنظيم الوقت والمهام بهوايات لدى الطفل بتقدر الام اتخلي ولدها معتدل السلوك 00
0

بالضبط بنت النوخذه ..
مش أنا كأم أو أي شخص يقرر ان هالطفل يعاني من ( هايبر أكتيف ) نشاط زائد ..
استشاري المخ والاعصاب هو اللي يقرر هالحالة ..
أولاً يراقب سلوك الطفل من خلال محادثة يجريها مع الطفل يراقب طريقه كلامه وردوده وتصراته كل شيء ..
وبعدها يتم عمل فحوصات للمخ ..
واختبــار ذكـاء ..
ملاحظة مهمة :
أطفال الهايبر أكتيف مستوى ذكائهم عالي جداً ..
وممكن يكون فوق المعدل الطبيعي اذكياء جداً ..

وبعدها يقرر الطبيب نوع النشاط اللي يعاني منه الطفل ..
هل هو نشاط عادي ..
أ/ حالة مرضية تستلزم تدخل طبي وعلاج ..
ومتابعه من قبل طبيب نفسي واخصائي اعصاب ..
يا جماعه الحالة مش بسيطة ..
احمدوا ربكم ان اطفالكم ما يعانون من النشاط الزائد ..
مجرد شقاوة عادية ..
والله ثم والله ان اللي عنده طفل مصاب بالهايبر اكتيف يعاني معاناة ما يعلم بيها غير رب العالمين ..
الاهل يعانون والطفل نفسه يعاني ..
مرات كثيرة ما يكون مسؤول عن تصرفاته ..
ولما تسأله ليش تسوي جذي يقول لك مادري ..
ويكون متأثر جداً وراح يبكي ..
يكون عدواني يأذي غيره ويأذي نفسه ..
ما يحب الأوامر ..
عنيد ..
يعاني من صعوبة تعلم ..
واشياء ثانية كثيرة..

للأسف اختي بنت النوخذه بالرغم من ان قطر فيها حالات كثثيرة من النشاط المفرط ..
الا ان نفتقر لوجود مراكز تضمهم ..
ومرات الأهل يجهلون ان طفلهم يعاني من هالشي ..

تسلمين على مداخلتج المهمة ..

[بصمة قطرية]

موضوع شيق اختي بصمة. انتظريني لي عودة

في انتظــارك أخوي ~

[بصمة قطرية]

ما اظن عندنا شي اسمه نشاط مفرط

يخلون عنهم الفاست فود والحلويات ومجابل الالعاب الالكترونية

بالاضافة الى تقليل استخدام الكمبيوتر سواء في المدرسة او في البيت

خاصة في السنوات الاولى من عمر الطفل واحنا بخير ونعمة

لان استخدام الكمبيوتر يسبب عدم تركيز للطفل وتشتته

وساعتها .. بيطلعون عيالنا من احلى ما يكون

ياختي لا تعمين بكلامج ..
عندنا هالحالات ..
مين قال ما عندنا ..
طفلي اللي يعاني من الهايبر اكتيف ما يتناول وجبات سريعه ..
ولا يستخدم الكمبيوتر الا نادر ..
ولا يحب الالعاب الالكترونية يلعبها نادر ..

هالاشياء مالها علاقة ..
احنا نتكلم عن حالت مرضيــة ..
مش مجرد نشاط عادي ..!!

[intesar]

النشاط الزايد فعلا مرض وحالات كثيرة يحتاج له علاج دوائي
ممكن لو سمحتي تعرفينا أكثر شنهو هي الأعراض للمعلومة فقط

[intesar]

الدولة محتاجة اهتمام أكثر في نواحي ذوي الاحتياجات
مركز العلاج الطبيعي ما يعطونج الا يومين حتى لو الطفل محتاج علاج مكثف
لو يخلونه أكثر يكون أحسن وبدوامين أفضل و أفضل
لو يسوون دورات تثقيفيه لهذي الأمراض يكون حلو لأهل المريض ولغيره هم حلو
ان شاء الله في المستقبل نشوف اهتمام أكثر

[intesar]

الدولة محتاجة اهتمام أكثر في نواحي ذوي الاحتياجات
مركز العلاج الطبيعي ما يعطونج الا يومين حتى لو الطفل محتاج علاج مكثف
لو يخلونه أكثر يكون أحسن وبدوامين أفضل و أفضل
لو يسوون دورات تثقيفيه لهذي الأمراض يكون حلو لأهل المريض ولغيره هم حلو
ان شاء الله في المستقبل نشوف اهتمام أكثر

[مشتاقة لقطر]

عندي واحد منهم الهايبر اكتيف

عطينا كل اللي تعرفينه وساعدينا