شوركم وهداية الله

[على قد حالها]

السلام عليكم

في بالي فكرة وبغيت شوركم قبل لانفذها!

ابغي اشتري اسهم الدولي الاسلامي بس بصراحة الحين ماعندي سيولة كلش ، كل اللي عندي حطيته في الاسهم وعشان الهبوط الحين ماقدر ابيع اي شي ، علشان جذي افكر اني اخذ سلفية من البنك (طبعا مو فلوس كاش ، يعني باسوي سالفة اني اشتري سيارة من حد من الاهل ...الخ) تقريبا بمبلغ 100 الف واشتري فيهم اسهم الدولي فانتوا شتنصحوني فيه اقدم على السلفية الحين والا انتظر شوي لين الصيف والا لين اقتراب موعد اجتماعهم (السنة الجاية) علشان سالفة زيادة راس المال . وفي نفس الوقت اخاف اتأخر ويرتفع السهم اكثر وبعدين ال100 ماتجيب شي!

ياريت تفيدوني افادكم الله وسدد خطاكم...

وبعد في استفسار لو سمحتوا... ممكن البنك هو اللي يشتري لي الاسهم اللي ابغيها؟؟؟؟

[الزقروطي]

السلام عليكم
يعطيج العافيه
صراحة انا اغشم منج ما اقدر افيدج
بس نفس السؤال ممكن البنك يشتريلي اسهم الدولي ؟

ياليت يفيدونا الاخوان اهل المعرفه والخبره

تقبلي تحياتي

[ابوعلي اليافعي]

(طبعا مو فلوس كاش ، يعني باسوي سالفة اني اشتري سيارة من حد من الاهل ...الخ

اختي اتمنى انتج اتمين على قد حالج ولا تبدئين بهالطريقه المحرمه والله بيوفقج انشالله وبيفتحلج باب رزق حلال انشالله..ملاحظه::الطريقه الي اجازوها بعض العلماء والي تسمى بالتورق.هي انج تشترين سياره وتسجلينها وتبيعينها لطرف اخر غير راعي السياره نفسه الي شريتيها منه...

[qatari1]

أختي على قد حالها...
كما قال مشرفنا أبوعلي اليافعي هذا النوع من البيع الصوري محرم شرعاً ويسمى بيع العينة...
أما التورق فهو شراء سيارة أو أي بضاعة أخرى وإعادة بيعها للحصول على النقد فهذا النوع جائز شرعاً ولا غبار عليه سواء بعتي السيارة أو البضاعة بنفس السعر أو أقل أو أكثر من سعرها عندما اشتراها البنك...
وللعلم البنوك الإسلامية تمول شراء أسهم معينة من السوق وفق شروط معينة وهي:-
1- ألا تكون الشركة التي تودين الشراء فيها محرمة مثل البنوك التجارية والتأمين التجاري.
2-أن تكون الشركة ممارسة لنشاطها بالفعل وعلى ذلك لا يتم تمويل شركات المواشي والمخازن والإجارة وناقلات وقطر للوقود لأنها لم تبدأ عملها بالفعل، رفم أن الشركات الثلاث الأولى إسلامية ولا شبهة ربوية فيها.
3-ألا تزيد نسبة الديون إلى الموجودات عن 50% لهذة الشركة..

وتوجد قوائم بالشركات التي يقوم البنك الإسلامي بتمويلها...وإذا أردت شراء أسهم الدولي الإسلامي فالبنك لا يقوم بتمويل شراءها، ويمكنك شراء أسهم أي شركة أخرى تنطبق عليها الشروط مثل الصناعات وكيوتل والكهرباء، وبيعها-إذا كانت ملكية الأسهم حرة- ثم يمكنك بعد ذلك شراء أسهم البنك الدولي الإسلامي.

[إنتعاش]

والله اختي شوفي

ماحد ينصح بعملية الاقتراض من اجل الاسهم

سواء كانت شرعيه الطريقه ام غير شرعيه

لان مخاطرها كبيره

وما تضمنين السوق انتي

فلذلك انصح

ان تحاولين تدخلين براس مالك الحر والشخصي

ولا تباتين في هم الدين . . الله يبعده عننا وعنكم

شوفي انتي الاسهم اللي عندج حاليا كم تسوى ؟

وشوفي انتي خسارتج الحاليه فيها

هل هي مثلا . . سهم شريتيه بـ 130 وصار بـ 110 ريال ؟

على الاقل خسرتي عشرين ريال

لكن تبيعينه وتحطينه في شي بيعوضج ان شااءالله في نظري افضل بكثير

لكن قبل كل شي شوفي وضعج المادي الحالي

وشوفي الاسهم اللي عندج كم تسوى وكم تجيب

وياريت تذكرين لنا الشركات اللي شريتي فيها والاسعار

عشان الاخوان يفيدونج اكثر واكثر

وموفقه اختي ان اشاءالله

[الزقروطي]

ايييييه
وانا ولا كأني سألت

الله يسامح الشباب اللي قطوني صخر
يزاكم الله خير

[إنتعاش]

هههههههههه هلا فيك اخوي

ياغالي السموحه والله شفت اخر رد بسرعه ورديت على الاخت

بالنسبة لكلامك وسؤالك

اعتقد نعم يستطيع البنك يشتري لك

لكن كيفية الطريقة وغيرها الله واعلم

لأن كل بنك يختلف عن الثاني وانا اخوك

فماراح يفيدك الا انك تتصل بالبنك او يفيدك احد موظفي البنك من الاعضاء

[الزقروطي]

تسلم انتعاش
الله يجبر بخاطرك

[على قد حالها]

والله ماقصرتوا على الردود واوجه الشكر لكل واحد منكم.

بس اخوي ابو علي اليافعي انا اول مرة اعرف ان هالطريقة حرام واذا فعلا ثبت كلامك باكون طحي في نفس الذنب مرتين من قبل . بس معليش اخوي الطريقة اللي تقول عنها حلال (التورق) تحمل نفس الفكرة يعني ممكن انا اشتري سيارة امي وابيعها على اختي وبعدين اكلم البنك اني انا اللي اتحمل اقصادها يعني النية وحدة !!!! ومرة ثانية شكرا على الرد.

اخوي انتعاش انا بصراحة مافكر ابيع اسهمي الحين الا بعد ماتوصل للسعر اللي من المتوقع انها توصله
وعلى العموم اللي عندي والحمد لله
2600 ناقلات من الاكتتاب
العقارية 660 (مع المجاني والمخفض) على 108
المصرف 333 (مع المجاني ) على 270
المواشي 300 سهم على 33

بس اذا عندك اقتراح بالنسبه للاسهم ياريت الافادة..

والله يوفق الجميع