كتبت موقف مؤلم ومسحته
كتبت موقف مؤلم ومسحته
التعديل الأخير تم بواسطة غايه الطواش ; 17-02-2011 الساعة 03:30 PM
علمت أن رزقي لن يأخذه غيري فطمأن قلبي
وعلمت ان عملي لا يقوم به غيري فاشتغلت به وحدي
تسلمين يالأصيلـــــة ..
مواضيعــج دايماً لها نكهــة مميزة .. ( ما شاء الله )
طبعاً المواقف كثيــرة ..
و اللي يعيش .. يتعلـــم ..
جدتي الله يرحمها في المرض اللي توفت فيــه ..
كانت تعاني في البيت و ما تحب تروح المستشفى .. مثل معظم الحريم الكبار ..
المهم بالغصب أقنعناها .. و أخذتها أنا و خالتي للطوارئ و قعدنا وياها لما خف عليها الألم شوي و طلبت تترخص ..
رديناها البيت .. و رجعت أنا بيتنا
هالكلام كان الظهر تقريباً ..
قبل المغرب بشوي زوجي سألني رحتي تطمنتي على يدتج .. قلت له بس أفطر ( كنت صايمة ) و اريح شوي بروح لها ( الصراحة كسلت شوي ) و ما رحت ذيج الليلة
الصبح عرفت انهم خذوها في الليل الطوارئ كان عندها نزيف حاد .. و دشت العناية و توفت ..
رحت شفتها في العناية و دخلت عليها كانت توها متوفية .. سلمت عليها و حبيتها ..
و اعتذرت منها .. لأني ما كنت معاها وقتـــها ..
و من عقبها .. تعلمت ما أأجل الروحة حق أي مريض .. بالأخص إذا كان قريب علي ..
الله يرحمنا برحمتــــه .. و يشفي جميع مرضانا و مرضى المسلمين ..
الله يرحمها ويغفر لها ويجمعكم معاها في الجنة
ويخلي لي جدتي الغالية يارب....
أنا مريت بها الموقف وكان عندي عزيز غالي منوم في المستشفى ..
وذاك اليوم كنت متردده أروح له وإلا ما أروح وكانت فترة العصر...
ضغطت على نفسي ورحت ...
لما رجعت المغرب ماصار العشاء إلا جانا خبر وفاته
الحمدالله إني رحت وإلا كان تندمت أشد الندم
الله يرحمهم ويجمعنا معاهم في جنات الخلد...
وتسلمين على الإطراء يا الحياة صعبة...
ربتني عمتي وجدتي الله يرحمهم
جعل مثواهم الجنه يارب
زهاد بالحياه يفكرون بالآخره بلا انقطاع
لسان حالهم الصلاه و الخير والمبادئ السامية
التي تعد المثاليه بوقتنا الحالي اللتي اصبحت شبه معدومة الا من رحم ربي
اقصد بذلك ( الانسان في نقائة من الداخل والخارج ) قطعه ذهب نقدية واحدة مهما اختلفت الاوجة
عشت حياه مايخلى الناس من بيتنا الباب مفتوح والناس داخله وظاهره
بحكم جدتي اصبحت امرأه كبيره بالسن
مجرد جسم جالس على الدوشق لايسمع
ولا يرى ولا يتكلم
الشيئ الوحيد ا للي كانت تسويه ( الوضوء )
قسم الله من اقداره ان ياخذ أمانتة من عمتي الله يرحمها
توفت جعل الجنه دارها ويأنس وحدتها يارب
طبعاً خبر موتها اخفوه علي ومابلغوني به الا قريب العصر بحكم هي من ربتني مع جدتي
طبعاً انا من هول الموضوع كان الأمر عادي
وابي يضمني يبكي وانا بعدي بس عشان احسسه اني حزنت دمعت دمعه وحده بس
ورحت البيت( بيتها) اقابل الناس لجل العزى
والناس داشه وظاهره تسلم علي
انا كل شوي اشوف الباب اقول الحين بتدخل
غصب عني انتظر متعودة بعدي مامصدقه
المهم واروح لغرفه جدتي اشوفها
الا اشوف جدتي جالسه ماحولها الا بنات صغار
شوي الا جدتي تسيل الدمعه على خدها تبكي
جالسه وجهها واجم مايبين الحزن الا بس مقله العين والدمع
اقول في قلبي من علمها وهي لاتسمع ولا تشوف
سبحان من نطق من لاينطق كيف الاحساس يأن به الانسان لو ماتكلم
ايام بسيطه وترقد بالمشفى حال الحزن بالتدريج بصاحبه لما قرب يومها
قبل لاتتوفى كنت عندها قلت بمرها العصر
الا العصر وانا رايحه يقولون ماتت
اللهم لك الحمد والشكر
ذهب اللذين احبهم وبقيت مثل السيف فردا
بمشيئه الله في وفاه عمتي مارحت المقبره ويسر لي سبحانه اني اروح لجدتي ويقسم الله لي من خيره اكفنها بغرفه الغسيل
تذكرت جدتي تشيلني وانا صغيره بمهادي واليوم انا معها بمهاد لا اله الا الله
مثلي بشر لا اخفيكم الوجع بعد مرور اشهر قرب وقت الحج ركبت السياره اقول بروح بيت عمتي اسلم قبل لا اروح
تذكرت
بكيت
لجل نسيت انها ماتت الله يرحمها
التعديل الأخير تم بواسطة قطرية فذة ; 19-02-2011 الساعة 03:05 AM
قلبي عورني ياقطرية فذة
موقف صعب
العمة والجدة من أغلى الناس على القلب كيف وانتي ربيتي عندهم وبين أياديهم
الله يرحمهم...
طبعا أهلنا الله يرحمهم ماكان لهم هدف غير كسب
الأجر والثواب والفوز برضا الرحمن والجنة
لما افكر بحال عماتي وجداتي وأقول شيء طبيعي مصيرهم الجنة من ورعهم وحسن خلقهم وسترهم الغير طبيعي
يعني بطوله وفوقها غشوة والعباية وسيعه حدها
ولايمرون أمام الرجال ولاراحوا أسواق ولا أماكن تجمعات
الله يرحمهم ويجمعنا معاهم في الفردوس الأعلى من الجنة...
شكرا لك ياقطرية فذة على إثراء الموضوع..