المكالمة التي ابكت المذيعة ببرنامج وطني الحبيب !!!!!!!!!!!!!!

[بوالفاروق]

الله يفرجها عليه

[النائب]

للتوضيح فقط وعلشان محد يخلط الأمور

مافي احد قال او طالب بعدم مساعدة انسان محتاج سواء مديون او غير مديون

البعض كان غير مؤيد لتسديد جميع الديون بشكل عشوائي يتساوى فيه اللي ماخذ دين او قرض علشان شيء ضروري من سكن او علاج مع من أخذ دين من أجل مظاهر مثل سيارة فخمة او سفرات سياحة , وفوق هذا الانسان اللي متحمل ظروفه الصعبه وما أخذ له قرض ما يحصل اي مساعدة ومايكون له نصيب في شي.

كلموا الناس بالعقل ! الحين لو طلع قرار بدراسة حالة المحتاجين من الناس وظروفهم واسباب اقتراضهم وتمت بعد ذلك مساعدة المحتاجين هل تعتقدون في احد بيعترض !!!

اللي كان يقول هو ضد فهو ضد تسديد ديون ناس اقترضت حق اللعبه والاولى مساعدة المستحقين الحقيقيين وبعدين ممكن مساعدة الاخرين

الله يفرج عن هالانسان ضيقته ويفرج عن كل مسلم محتاج اللهم امين

ابو محمد

من ردك احس إنك فاضي شغل يا اخي شعب يريد أن يعيش بكرامه أنت وش خاصك في الموضوع إذا مارح تدفع من جيبك .

الله يهديك ويخليك لعين ترجيك ابعد عن مواضيع ديون القطريين لين يجيك احد ويطق على بابك ويقول عطني ذيك الساعه إشتك عليه عند مركز الشرطه .

[صفقه]

استغفر الله العظيم ولا حول ولا قوة الا بالله

والله بعض الأعضاء ردودهم تفقع المراره بس لأن يدهم في الماي ..

والله وده الواحد يدعي عليهم بنفس وضعية هالرجال المسكين علشان بس يشوف ردودهم كيف تتحول ..

لكن ما أقول الا الله يهديهم ويصلح بالهم ويسخرهم لتفريج كربة أخوانهم وخدمتهم .

والله يفرج على اخونا المسكين ويفرج علينا وعلى كل محتاج ...

ياجماعة الخير .. اطلبوها من الله من قبل بومشعل ... هو أولى بأنه يستجيب لدعواتكم .

[R.S.C]

كل يوم اسمع المكالمة مرة ثانيه ,, وكل يوم اتأثر فيها كأني اول مرة اسمعها

[Al-Kuwari]

قبل سنة 2000 كانت الديون تعطى على فترات طويلة تصر لـ 20 و 25 سنة

ولكن المصرف تدارك الامر وعدل من قانون منح القروض وخلى اقصى مده 7 سنوات وبشرط ان القرض مايعدي 50% من التزامتك الشهرية

قضية اخونا علي " الله يعينه وييسر له احواله " ان قرضه كان على فترات طويلة تصل 30 سنة احياناً

ولما تأجل قسط واحد بمبلغ 5 الاف مثلاً تتجمع الفائده من شهر القسط المؤجل الى اخر شهر فالسلفه فتخيل عدد الشهور لما يكون 240 او 220 شهر
وقياساً عالقسط 5000 ريال تلقى 60% من قيمة القسط فوائد
5000 / 100 = 50
50 * 60% = 3000

تخيل 3000 ريال تتضاعف على مدى 220 شهر

مبلغ خيالي لا يمكن احصائه فما بالك والرجال كان متعسر لمدة سنتين من 2005 الى 2007

ارتفاع المبلغ من 350 الى 1,400,000 واقعي جدا بالنسبه للمعطيات السابقه !!

والبنك فعله خبيث لأن المتعارف عليه فالبنوك عند فقدان العميل لوظيفته وعمله ومصدر رزقه البنك يحاول اخذ اصل المبلغ واسقاط الفوائد ولكن الظاهر ان موظف البنك استغل قله معلومات العميل وجهله بهالامور ولعبها بخبث ظناً منه انه شاطر ولكن حسبي الله ونعم الوكيل فيه وفي البنك اللي ماقدر حالة المواطن المسكين ولا حاول يساعده بل ضاعف عليه المبلغ اضعاف ما اخذ !!

نرجع للموضوع بالنسبه للموضوع اثرت فيني المكالمة بشكل كبير

لكن ماقدر اقول غير

حسبي الله ونعم الوكيل..
حسبي الله ونعم الوكيل..
حسبي الله ونعم الوكيل..

فلوسنا تتوزع فالخارج وتغطي مشارق ومغارب العالم وناس من شعبنا مب لاقين ياكلون ويعيشون حياة كريمة

لبنان تعمر بالكامل والمواطن غايش بغرفه
جزر القمر تدفع رواتبهم كامله والمواطن فالمحاكم متبهدل
الصومال تاخذ شرهة والشعب مب لاقي ويصيح ..

من حق الشعب التمتع بثروات بلاده
من حق الشعب ان يتسائل بخصوص المبالغ اللي تروح يمين وشمال والشعب مب طايل بشي منها
من حق الشعب استجواب المسؤولين

للأسف بيجيك الحين واحد وبيقولك والله ماي وكهربا ببلاش
ومعاشات ومادري ايش

لكن قياساً على عدد الشعب مقارنة بمصادر دخل الدولة والمبالغ المهوله اللي توزع للخارج فاحنا ترى ماخذنا شي من فلوس الدولة اللي هي حق شرعي للشعب وليست حكراً على احد

محد طلع البترول وتقطعت اياديهم وهم يحفرون الا اجدادنا احنا الشعب القطري
محد عمر البلاد الا اجدادنا احنا ابناء الشعب القطري

فبأي حق لما نجي نطالب بنصيبنا من الثروة يتم تهميشنا وتوبيخنا وينقال لنا ان احنا ناس مانشكر ولا نحمد ولا ينقع بعينا شي

ترى احنا ماطالبنا بمكرمة او هبه

الهبه او المكرمة لما تجي من جيب الشخص الواهب او المتكرم

لكن احنا ماطالبنا الا بجزء من ثروتنا من مداخيل الدولة من البترول والغاز وثروات ارضنا
ماطلبنا حد ولا ذلينا انفسنا لاحد علشان يجي واحد ويقول لنا انتوا مب كفو وماينقع بعينكم شي

حسبي الله ونعم الوكيل..
حسبي الله ونعم الوكيل..
حسبي الله ونعم الوكيل..

[ام السعف]

عظم الله اجركم في القلوب الحية

[الشقيان]

عظم الله اجركم في القلوب الحية

للاسف

[ام السعف]

للاسف

واللي يرحم والديك وخر الدموع من صوبي ،، بروحي قلبي متروسة
دموع

[The Master]

ياترى...هل هالشخص بيبقى في قطر؟؟؟

وشي ثاني...
بخصوص الاخوان...مع او ضد...

ترا المساحه للكل...مثل ما انت تقدر اتقول في ناس مثل حالة الاخ...هم بعد ناس تقدر ومن حقها ترفض...
وذلك كلن على حسب الناس اللي حوله...او اللي يشوفهم...
فا محد غلطان في الموضوع...لا مع ولا ضد...

والشي الاهم...

انتوا الحين اللي قايمين في الموضوع...
هل انتوا ماخذتكم الحميه والشيمه...لانه اقطري ومب عاجبتكم عيشته كذا...
ولا اسلوبه اللي قدر به يوصل لقلوبكم قبل حالته المادية...
ولا اتدورون اي عذر عشان تستغلونه ضد الديون؟؟؟

لان حالة الاخ في غيره من هل قطر نفس الحال...يعني من هو لحاله...
وناس اعرفهم معرفة شخصيه ديونهم مليونين ونص...وحالتهم المادية تعيسة...لكن مايقولون الا الحمدلله...

ان شاء الله اوصلت وجهة النظر...
و300 رد...اغلبه هذرة نسوان...او نفس الرد لكن بمفردات اخرى...
فا يا اتضيفون شي...او بينحذف الموضوع ويتسكر...

واحيي اخوي اللي قال انساعده...وهذا اقل شي اتسويه...
الله ينور

كلمة اخيرة..."الدنيا اتعلمك...والتجارب كذلك...روح الحرم...وشوف القصص هناك والتمثيليات كانت بفلوس او احتياج او كذب...وياما صارت خارج الحرم...لكن ربك العالم...ب صدق النوايا.."

مانقول الا الله يفرج همه وكربته يارب...