السلام عليكم ورحمة الله
بداية اسمحوا لي اطرح موضوعي الشخصي اللي فكرت فيه وايد واحترت ولا عرفت هل قراري سليم ام خطأ، لان الموضوع لا كان على البال ولا الخاطر لكن هي الاقدار والظروف، و اتمنى اجد وجهات النظر المختلفة والاراء حتى استفيد او اجد نصيحة منكم لأني مؤمنه ان مشاركة الرأي خير من الاستبداد بالرأي الواحد.
مابي اطول واخذ من وقتكم في قراءة موضوعي وبحاول اختصره بشكل واضح
انا فتاة قطرية كنت وحيدة امي وابوي اللي توفوا بحادث سيارة من يوم كنت طفلة وعشت عند يدتي قامت فيني وربتني ودرستني وماعرفت من الدنيا غيرها يدتي ما انجبت غير أمي وخالتي ( خالتي متزوجة وساكنة باحد الدول الخليجية)، يعني وعيت على هالدنيا وكبرت وحيدة لا اخوان ولا خوات ولا اخوال ولا اعمام والحمدلله على كل حال، حياتي شبه خالية من البشر ويدتي رغم مرضها وكبر سنها إلا انها عوضتني عن الدنيا كلها، انا لها وهي لي ماقصرت علي بشيء ولا حسستني بيوم اني اقل من غيري، يدتي صح أمية ماتقرا ولا تكتب لكن زرعت فيني حب العلم والتعلم والحمدلله خلصت جامعتي وتفوقت ورفعت راسها،
وكان عندي طبيب أزوره بين كل فترة وفترة عشان علاج يدتي وكان فاهم حالتها عدل وهي ماترتاح الا له، وصرت حتى انا لو مرضت اروح له، كان في غاية الاحترام والمهنية اللي تحكم طبيعة عمله، وبأحد الايام فاجئني بطلب غريب أبداً ماتصورته ولا كان في بالي، الخبر كان ماعرف صدمة او استغراب، وهو انه طلبني للزواج! في البداية انصدمت منه وحرمت أروح له وماعلمت يدتي عن الموضوع لاني ماعرف شلون اقولها الموضوع وبعد ست شهور مرضت يدتي واضطريت اوديها له ورجع كرر الموضوع وبشكل جاد ومصر عليه وقال انا بانتظار ردج واتمنى الموافقة.
الطبيب هندي مسلم سني في اواخر الثلاثينات من عمره تقريبا ( على مايبدو) ومتدين ويتكلم العربية بطلاقة لانه عاش بالسعودية فترة طويلة وحتى شكلا ( رغم اني لا اهتم بالاشكال) مايبان عليه انه هندي (ابيض البشرة) ويحمل جنسية اوروبية. ومن عائلة راقية واخوانه كلهم متعلمين تعليم عالي وعايشين بأمريكا واوروبا وعنده اخت دائما تزوره اهنيه كنت اصادفها مرات في عيادته وتقعد تسولف معاي ومنها عرفت عن عائلته والخ وهو مستقر بقطر من سنين وعارف كل عاداتنا وتقاليدنا
بالنسبة لموضوع الزواج منه اخذ حيز كبير من تفكيري وكنت احاول افكر بالموضوع من كل النواحي لكن طبعا الزواج من اجنبي له عواقب اكيد بنفس الوقت له مميزات انا عايشة بدنيتي وحيدة ولا احد يعرف عني شي لان دائرة معارفي قليلة ونسبة فرص الزواج لي صارت معدومة لاني كبرت بالسن وبعد كم سنة بدخل في الثلاثين وحلم الامومة اعيش فيه كل يوم واتمناه احلم بأسرة واطفال وزوج اهتم فيه ويهتم فيني مثلي مثل أي بنت واخاف اكثر لما افكر لو راحت يدتي عن الوجود بعد عمر طويل يارب شلون بعيش شلون بتكون حياتي وعندي مخاوف ثانية من ناحية اولادنا لو الله رزقنا كيف بيكون وضعهم وجنسيتهم اوروبية.. واللي خلاني افكر بالزواج اكثر هو روتين حياتي اعيش بملل وفراغ ووحدة ماعندي اهل اطلع معاهم واغير جو ويدتي ماتقوى على الطلعة ومستحيل اطلع لوحدي واخليها وتمر علي اعياد واعياد ما اسمع حتى كلمة كل عام وانتي بخير .. الوحده قاسية لمن جربها والزمن تغير.. حتى صديقات الدراسة (ماكنت اعرف الا ثنتين) خلاص كل وحده التهت بدنيتها مع زوجها واطفالها الله يسعدهم
يمكن البعض يقول الطبيب داخل على طمع او فيه شيء بنفسه يخليه يتقدم لي لكن حتى هاي فكرت فيها ومالقيت سبب واحد يخليه يطمع من أي ناحية خاصة ان وضعه المادي جيد وانا وحده اللهم لك الحمد على كل نعمك عايشة على معاشي من وظيفتي ماعندي مدخول غيره والحمدلله مستورة يعني من ناحية مادية ما اعتقد ابدا يفكر بهالموضوع، لو قلنا مطمع شكلي فهو ماعمره شافني الا مرة وحده كشفت وجهي لاني كنت اسوي فحص ولا انا ما اطلع من بيتي الا بعباية راس ونقاب وقفازات، يعني ماشفت أي سبب اقدر اقول انه يطمعه فيني ويمكن هو نصيبي المكتوب لي
واشكر العزيزة (الارستقراطية) اللي عطتني عضويتها عشان اقدر اطرح موضوعي لاني ما املك عضويه في المنتدى، طرحت موضوعي واتمنى تشاركوني التفكير لاني تعبت من التفكير واستخرت اكثر من مرة لكن احس مب عارفه اتخذ قرار مثل هذا ومن ناحية يدتي قالت لي هاي حياتج واي شي بيسعدج انا معاج فيه (يمكن لو رفضت كان ارتحت لكن خلت القرار عندي انا فصرت خايفة اظلم نفسي سواء رفضت او وافقت) وودها تشوفني متزوجه كل يوم تدعي لي تقول خايفة عليج من الزمن عقبي،، يعلها بطولة العمر تقطع قلبي لما تقول هالكلام،، وحتى لو تزوجت مستحيل اترك يدتي ( والخطيب قالها لي لو وافقتي لا تخافين يدتج بتكون معاج لو حابة)
ونقطه مهمة ابي اعرفها هل مسموح القطرية تتزوج من اجنبي او لازم تصريح ؟ بس اذكر ايام الجامعة وحده قطرية خذت عربي لكن ماعرف هل خذت تصريح او لا)
رغم اني في قناعة نفسي لا انظر للشخص من ناحية اصله ولا فصله بل يهمني تدينه واخلاقه قبل كل شيء لكن للاسف انا جزء من مجتمع لايمكنني الانفصال عنه مهما كانت قناعتي بأن الانسان بقيمه واخلاقه والتزامه لكن يظل مجتمعي يفرض قيود علي ان لا اكسرها الا بما كان منطقي ومعقول ( خاصة القيود التي ليست من الدين في شيء كالتمييز العنصري)
واسفة لو اخذت من وقتكم وجزاكم الله كل خير
واعتذر لو الكتابة رديئه او ركيكة لاني اول مرة اكتب موضوع في منتدى