المشاركة الأصلية كتبت بواسطة كلنا قطر 1981
يعطيك العافيه اخوي العقل الحر
صراحه تايلاند من اجمل الدول من الطبيعه و الاسعار و الشعب الودود ولكن في اشياء لازم
الحذر منها هي (الموق) الي هم الكهنه لانهم منقدسين عند الشعب التايلاندي بشكل كبير
صراحه كسمواي او سسام وي حلوه لكن مشكلتها النامس و لكن فيها هدوووء غير طبيعي و روعه اما بتايا صراحه حلوه و تعجبني و فيها حدائق و نزهات من اجمل ما يكون و حتى ممكن تتسوق فيها ولكن يبيلك تتدل فيها عدل حق التسوق و ابتعد كل البعد عن منطقة العرب و بتكون سالم و بالنسبه حق المكاسر في التشري اخوي العقل الحر اختلف وياك في هالنقطه او مادري شاقولك يمكن الاختلاف في الشخص نفسه
في كل سفره يكون ويانا واحد فلسطيني و النعم فيه مادري هو ساحر و لا شنو بالضبط احنا نتم نكاسر و نحاو و نثبت وياهم على سعر و ما نقدر ننزل وياهم شي و هو يصارخ عليهم و هم يصارخون عليه و كلهم يضحكون و اخر شي ياخذ الغرض بالسعر الي يبيه و يطع و القهر هم يعطونه رقمهم و يقولون له تواصل ويانا و اي شي تبيه بنعطيك احسن الاسعار سوينا وياه اكثر من تحدي انه ندخل على محلات و نتحدى من ياخذ باقل الاسعار بصراحه في كل مره هو الي ياخذ احسن سعر و الحين صار اسمه بين الشباب مشهور و يقولون لك تبي تتشرى خذ فلان وياك و ابشر بالاسعار و تصدق اخوي لا تقول انه يكاسرهم بالشي المعقول الال يكاسرهم بارقام صج تخرع يعني يقولون له 2500 هو يقولهم 200 لين ياخذ الغرض ب 500
و القهر صج انهم يبعونه و هم مستانسين اما احنا ما ناخذ بنفس الاسعار ولا نفس المعامله
اللمهم نرد حق انه بتايا فيها اماكن روعه و لكن الي بيعيش جو الليل في بتايا ما يشوف منها الا الخربطه و المسخره و في شي مهم في بتايا كل شي ارخص من غيرها في الرحل و التحرك و كل شي يعني الي يبي يفتل صح يروح كل مكان في بتايا و لكن ما يقرب صوب البحر لانه بحر بتاياو جزرها مب زوود و يخلي الرحلات البحريه حق بوكت
شنغ ماي منطقه روعه و حلوه و حتى التشري فيها اوكي رخيصه و معقوله بس مالت 3 ايام مب اكثر
بوكت قمه في السحر بكل صراحه و البحر فيها خيال جزيرة البي بي و جمس بوند احلى شي و الفنتازيا تستاهل انك تروح له و البلد نظيفه بكل ما تعنيه كلمة نظيفه و هاديه و نسبة المسلمين فيها 65% من العدد الكلي بس تعتبرؤ اغلى من بتايا بشي بسيط بكل صراحه في الرحلات البحريه لازم الواحد يستخدم كريم الشمس لانه انا سويت نفسي بطل انا و ربعي و ما حطينا كريم واقي الشمس و صج احترقنا الا واحد من الربع حط و النتيجه كانت انه احنا في الليل كلنا في الصيدليه نتداوا من الحروق الا رفيجنا الي حط كريم اموره كانت في السيفتي
بانكوك مشهوره بالتشري و فيها دريم ورلد حلوه و حديقة الحيوان المفتوحه بعد حلوة و تقدر تركب مركب عود ياخذك لفه في النهر تقعد تقريبا ساعتين و نص او 3 سعات مع الاكل و ياخذك لفه على بانكوك بكبرها
تايلاند روعه و الي يبي المسخره يلاقيها في كل مكان مب بس في تايلاند
الفنادق في بتايا تبتدي من 800 بات و انت رايح و في ارخص بس انا اتكلم عن اسعار الفنادق النظيفه و عندك في بوكت و شنغ ماي نفس الشي اما بانكوك من 1300 بات و انت رايح بعد و كسماوي من 1200 بات و انت رايح
بالنسبه حق المواصلات انا كنت اتاجر دراجه ب 150 بات في اليوم و اروح فقيها كل مكان ارخص من التكاسي بس المشكله مع الشوارع العكس كانه يفتر راسي فيها بعد المرات
الفواكه قمه عندهم و لها لذه ثانيه غير عن الي عندنا هني
بلد حلوة و شعبها جدا راقي و ودود و طيب و لكن لا تقل ادبك عليهم ولا تسخر من دينهم و معتقداتهم و الملك عندهم معظم و محبوب بشكل مب طبيعي
السموحه على الاطاله و تسلم على الطرح الطيب اخوي العقل الحر