إخواني وأخواتي ... السلام عليكم ورحمة الله وبركاته
صارلي موقف مع غلاء الأسعار وحبيت إنكم تتابعون الموضوع معي خطوة خطوة وسماع ملاحظاتكم وتعليقكم على الموضوع ، لذلك إسمحو لي أن اعرض عليكم القصة
توجهت يوم الأربعاء بتاريخ 06.10.2011 إلى صيدلية الخريطيات لشراء قطرة بإسم systane وهو عبارة عن دموع صناعية لترطيب العين وللعلم إني أستخدم هذا الدواء بمعدل علبة واحدة أسبوعياً ، إشتريت علبة واحدة كالعادة وعطيت البائع 50 ريال ورجعلي الباقي 4 ريال فقط!!! بمعنى أن السعر الجديد وهو 47 ريال مع العلم أنها في السابق كان 43 ريال.
ماكلمت البائع ولا شي ركبت السيارة واتصلت على إستعلامات الدليل وعطوني رقم حماية المستهلك وهو 8005000 والحقيقة تم الرد على إتصالي في الحال وكان ذلك في تمام الساعة 06:12 مساءً ، وإليكم نص المكالمة حرفياً:
أنا: السلام عليكم
حماية المستهلك: وعليكم السلام
أنا: حماية المستهلك قسم الشكاوي؟
حماية المستهلك: نعم
أنا: عندي شكوى على صيدلية إشتريت قطرة إسمها كذا وألاحظ سعرة مرتفع
حماية المستهلك: عندك قسم تسعيرة الأدوية التابع لمستشفى حمد تقدر تكلمهم على رقم ، وعطاني الرقم بس ماحفظته
أنا: أخوي ممكن سؤال؟ إيش وظيفتكم بالظبط؟
حماية المستهلك: إحنا نحقق في الشكاوى المتعلقة بإرتفاع الأسعار!!!
انا: إنزين وانا شقاعد أقول ، دوى كنت اشتريه 43 ريال وصار 47 ريال ، ومكتوب على العلبه السعر الجديد ولو تشيل لصقة السعر بتحصل تحتها السعر القديم وإنت لو توجهت لهم الحين وإشتريتها بتحصل نفس الشي
طبعا بعد هذا كله خذا إسمي ورقم الجوال وكتب الشكوى وقالي خلاص إحنا إستلمنا الشكوى منك
سألته هل في داعي إني أكلم قسم التسعير في مستشفى حمد ولا الموضوع منتهي عندكم؟ قاللي إللي انت يرضيك سوه ، قلتله إللي يرضيني إن سعر الدواء يصير مثل ماكان بالسابق ، قاللي إن شاء الله خير.
طبعا أنا اديت إللي علي كمستهلك تعرض لجشع التجار ، ووصلت الشكوى لذوي الإختصاص وأنتظر منهم الرد ، أنا لازلت احتفظ بالعلبة المكتوب عليها السعر القديم والجديد وحاولت انزل صور بس ماعرفت شلون ، أتمنى تشاركوني بردودكم ولو احد عنده نصيحة حياه الله