أسواق الفرجان

[رحال الدوحه]

السلام عليكم ورحمة الله وبركاته ،،

اخواني وخواتي اقدم لكم موضوع وموقع " اسواق الفرجان " لتعم الفايده على الجميع ..

بتوجيه ورعاية كريمة من صاحب السمو الشيخ تميم بن حمد آل ثاني أمير البلاد المفدى
( حفظه الله ) ، يأتي مشروع " أسواق الفرجان " ثمرة للتعاون الجاد والوثيق بين العديد من
الجهات المعنية في الدولة متمثله ( وزارة الاقتصاد والتجاره ، وزارة البلديه والتخطيط العمراني
، وزارة الماليه ، وزارة البيئه ، غرفة قطر ، بنك قطر للتنميه )

رابط وموقع الرسمي أسواق الفرجان

وبالامكان معرفة الانشطه التجاريه وطريقة التسجيل

أخوكم : رحال الدوحه

[المحاميه]

اخوي انا حابه اشارك واستاجر بس مب فاهمه الموضوع عدل ممكن التفاصيل عالخاص

[رحال الدوحه]

اخوي انا حابه اشارك واستاجر بس مب فاهمه الموضوع عدل ممكن التفاصيل عالخاص

هلا وغلا اختي ..

الله يرحم والديج الشرح والتفاصيل موجوده فالموقع ..
الانشطه محدده وكذلك عدد المحلات لكل سوق حسب الموقع والمساحه
وطريقة التسجيل لازم يكون عندج سجل تجاري
( تقدرين تطلعين لج سجل جديد )
حسب الانشطه التجاريه المسموحه وتقدمين اونلاين لدخول القرعه لاختيار المستأجرين ..

لا تنسوني بدعواتكم الطيبه واي خدمه انا فالشوفه
أخوكم : رحال الدوحه

[المنسى]

مايمديك اطلع سجل طارت الطيور برزاقها

[alsoq]

الرجاء من الاخوه والاخوات قرأه الشروط

ومش كل سجل تجاري يتيح لك الخدمات المذكوره

بالتوفيق

[وحيد-الشوق]

يمدي اطلع سجل واسجل ولا ؟

[دايموند]

اشكرك اخوي رحال ع الموضوع الله يجزيك الف خير


يا اخوان حد ياكد لي هالمعلومه

سمعت ان لازم اذا بنقدم يكون المشروع قايم مو بس نطلع سجل تجاري وخلاص

يعني لازم يكون في محل فاتح من زمان
هل هالمعلومه صحيحه؟

وبخصوص اذا يمدي او مايمدي لاستخراج السجل

الي عرفته ان السجل ماياخذ غير يوم واحد والا معلوماتي غلط ؟

[سلامي للكل]

السلام عليكم ورحمة الله وبركاته

من خلال فهمي للموضوع

السجل التجاري يطلع وبسهولة وما ياخذ وقت

ولا يتشرط ان يكون عندك محل/مشروع قائم لدخول القرعة

والوقت يمدي للي يبغي يقدم

أدعوا الشباب القطريين للمشاركة فهذه فرصة ممتازة

وبالتوفيــق

[رحال الدوحه]

يمدي اطلع سجل واسجل ولا ؟

وعليكم السلام ورحمة الله وبركاته ،،
هلا اخوي وحيد .. بخصوص السجل يمدي يطلع في يوم وساعه نفس ما اعلنوا
وزارة الاقتصاد والتجاره بس جهز مجموعة أسماء اللي بيكون الاسم التجاري
وصورة بطاقتك الشخصيه وانصح التاكد من جميع الاجراءات عن طريق موقعهم الرسمي
حق أسواق الفرجان .

* ملاحظه : بند رقم 7 من الشروط بعد استخراج السجل التجاري بيطلبون عليك ضمان بنكي
من اي بنك موجه " لبنك قطر للتنميه " صلاحيته لمدة سنه ، يرجى التاكد من هالشرط

أسال الله التوفيق للجميع

[رحال الدوحه]

اشكرك اخوي رحال ع الموضوع الله يجزيك الف خير


يا اخوان حد ياكد لي هالمعلومه

سمعت ان لازم اذا بنقدم يكون المشروع قايم مو بس نطلع سجل تجاري وخلاص

يعني لازم يكون في محل فاتح من زمان
هل هالمعلومه صحيحه؟

وبخصوص اذا يمدي او مايمدي لاستخراج السجل

الي عرفته ان السجل ماياخذ غير يوم واحد والا معلوماتي غلط ؟

هلا وغلا العفو اختي الله يرحم والديج ..

بخصوص تاكيد المعلومه حسب الشروط مب مذكور عن مزاولة النشاط او سجل تجاري جديد

شروط التسجيل في أسواق الفرجان .. اضغط هنا فضلاً

وشئ طيب الواحد يكون حريص ويتأكد من كل المعلومات عن الموضوع
عسى ربي يوفقكم كلكم دوم ..

أخوكم : رحال الدوحه