موضوع واحد من الربع مع شركة النيسان
هذا العضو قاهر الدروب عضو محترم جدا وفعال في منتديات قطر سبيد ونيسان ارابيا
وحصلتله مشكله مع شركة النيسان فا شوفوا شصار معاه والموضوع منقول للفائدة
السلام عليكم ورحمة اللة وبركاته
اليوم راح احكيلكم قصتي مع سيارتي النيسان بـاترول "y62" موديل 2010 منذ استلامها حتى الآن
مع خدمة الصيانة الدورية وخصوصاً في الصناعية وطبعاً الكل بدى يشتكي منهم من تعاملهم السيئ
وان شاء اللة راح اختصرلكم الموضوع لكي لايمل من يقرأها ويستفيد منها وهذا الموضوع اتمنى من
الجميع قراءته وبدقة لانه سوف يفيد الكثير والكثير ممن يمتلك اي نوع من نيسان او انفينيتي ولكن
حديثنا اليوم عن طريقة تعامل خدمة نيسان بالفرع الرئيسي للصناعية مع مالك البـاترول الجديد وهي
تعتبر من اهم السيارات لديهم فالوقت الحالي..
في البداية كنت اعاني من مشكلة في سيارتي وهي صوت تصويص او تصفير الفراميل (السفايف)
الأمامية وكانت السيارة ماشية اقل من 6000 كيلو وكان الصوت اثناء سيري في منطقة الوكرة وكان
الصوت يظهر بعد 40-60 كيلو وهو صوت مزعج ومشابه لهذا المقطع الذي تم طرحه من احد الاخوان
جزاهم الله خير
http://www.************/watch?v=wus_pcg6lhc
وبعدها رحت لمركز الخدمة فالصناعية وقتلهم الموتر عندي يصفر وانا امشي بين 40-60 كيلو
فقالي خلاص خل السيارة عندنا وبنحلك اياها وفي خلال يومين كلموني وقالولي تعال استلم
السيارة فوصلتلهم وقتلهم ايش كان سبب الصوت قالو السفايف فيها مشاكل فبعدها قلت في بالي
هذا شكله عيب مصنعي في بعض من دفعات 2010 وقلت للموظف الهندي هل هو عيب مصنعي
فصمت وقال اي اي عيب مصنعي المهم بعدها استلمت الموتر وعديت
تشيك (10-15-20) وبعد ماوصلت تشيكت 25 ألف في فرع دحيل فقالولي سفايفك حالياً استهلكت
بنسبة 70 % فيفضل انك تستبدلها في سيرفس 30 ألف وعلى قرابة 30 ألف كيلو وكان في هالحزة
السفايف مب متوفرة وكان سعرها 410 مع الخصم وشريتها في محل العبيدلي بالغرافة ب440 ريال
فقلت خلني امر محل قطع غيار في دحيل واشوف اذا القطع اوصلت او لا وفعلاً اوصلت وكان بعد وقت
الزلزال والازمة الاقتصادية فاليابان ورفعو سعرها الى 700 ريال بحجة الازمة في اليابان..
المهم دخلت الموتر على تشيك 30 ألف وبدلت السفايف وبعدها مشيت فالموتر قريب 2000 كيلو الا
اسمع صوت في الموتر تقول مب تصويص تقول صوت كعت بريك شاحنة قبل لاتوصل الدوار وبعدها
رحتلهم وقتلهم في مشكلة فالسفايف الظاهر فقالولي دامك قربت لتشيكت ال35 دخلها الصناعية
وبيحلولك اياها، وبعدها وديت الموتر الصناعية وسويت تشيك ال35 وقتلهم شيكولي السفايف لاني توني
مركبها وجديدة واذا فيها شي كلموني عالجوال وكان نفسه الهندي الي بدلي اياها على 6000 كيلو..
الموتر طول 4-5 ايام ولا جاني اتصال فتصلت فيه وقتله الموتر خلص قالي ايه
خلص فقفلت عليه وقتله ليش ماتصلت فيني انزين قالي لا بس لانه كان عندك مشلكة في fuel pump
محتاج تبديل والقطعة طولت على ماتوصل من الامارات وكذا بس لاتحاتي عالضمان ،قتله وليش ماقتلي
علشان يكون عندي علم انه بيتأخر فسكت وقتله طيب والسفايف قالي بدلتها قتله ليش بدلتها
قالي لانها مستهلكة قتله انزين بدلتها عالضمان قالي لا على احسابك قتله خير الحين بجيك..
وصلت هناك والامبير ضارب عندي وقتله جيبلي الفاتورة الحين وقولي شسويت فالسيارة
فشفت الفاتورة واتضح انه مسوي تورنا للدسكات الخلفية وتورنا لقدام مع السفايف
فقتله ليش هذا وكيف تسويها من غير علمي فجأه سكت قتله انا ماني دافع الا التشيك فقط
اما الي سويته من غير علمي ماراح ادفعه والمشكلة انه وراي عرس واحد من ربعي ومستعجل
ابي استلمه فالهندي ماقدر يتكلم معاي وحط الموضوع بيد واحد عربي وقالي لو الموضوع بأيدي
كان حليتلك المشكلة وقتله ياخي الكريم كيف هذا الغشيم يستلم موتري ويبدل الاشياء على كيف
مخه من غير علمي قال لا بس لانه احنا عانينا من ضغوطات وكذا قتله مو انا الي اتحملها وبعدها شرطت
عليه وقتله شوف اذا السفايف صوتت من جديد قبل ال5ألاف انا ماني متحملها فقالي خلاص ولا يهمك
تعالي انا شخصياً وبحلك اياها واستلمت الموتر وكان الموتر مبهدل وموصخ بزيت على جوانب البيبان
ولو اني مب مستعجل كان ماصار الي صار...
بعدها مشيت فالموتر والصوت رجع من جديد بعد ال1500 كيلو وكلمت الموظف وقتله الصوت رجع قالي
موترك كم ماشي قتله حروة 37500 قالي جيبها لي على تشيك ال40ألف وكان هالوقت في رمضان
وبعدها دخلت الموتر وقتله شوف وابيك تسمعني عدل الموتر استلمه من غير اي مشاكل وانا ماني
متحمل الصوت الي طالع منه بس راح ادفع على التشييك وبعدها دخلت الموتر واتصلي ب5 أيام وقالي
راح انبدلك السفايف ولكن الدسكات عليك قتله ليش انزين علشان اني استهلكتهم ولا علشان القطع
نفسها خربت الدسكات فقالي لا لانك انت مستخدمها وماعرف شكان يخربط علي قتله طيب بدلها
ولكن تسويلي خصم عليها وبعد ماسكرت من عنده اتصلت في نيسان الشرق الأوسط لتأكد من مشكلة
سفايف الباترول الجديد وبعدها ردو علي وقالولي فعلاً اول دفعات من النيسان بـاترول هناك مشكلة
مصنعية فالسفايف وبعدها تحسنت فقتلهم طيب يعني انا كعميل شمشكلتي يدفعوني على سفايف
ودسكات وغير المعاملة السيئة وبعدها والمشكلة الي كلمتها وحدة وحتى ماتبي تكبر الموضوع وقالت
تواصل مع واحد مدير العلاقات لخدمة الزباين وان شاء اللة مشكلتك بتنحل،وبعدها تواصلت معاه
وقتله يافلان الموضوع كيت كيت شالحل معاكم هل انتو تبون تستغلون العميل ولا كيف قالي ياسيدي
احنا بقدر الامكان نرضي العميل وانا بقدر الامكان اعملك خصم علشان عيونك ياشيخي قتله انا مابغي
شي انا يهمني حسن معاملتكم مع العميل والحمداللة الخير واجد ولكن مااقبل ريال ادفع اذا الموضوع
في استغلال وبعدها رحت استلمت الموتر وكان الموتر بعد وصخ وكان وقتها في ليلة العيد وكنت بعد
مستعجل يعني الحظ ابد مب محالفني علشان افضى لهم واغسل شراعهم قلت المرة الجاية..
سافرت الامارات ثالث يوم العيد ورجعت الدوحة والسيارة قربت ال44 ألف والصوت رجع من جديد
ومباشرةً رحت الصناعية ودخلت على مدير خدمة الزباين وقتله تراني تعبت معاكم بصراحة قلنا
انكم تبون ترضون العميل ولكن لحد الآن ماحليتولي المشكلة قال خلاص الحين اجيب test driver خاص
للبـاترول الجديد علشان يسوق الموتر ويجربه، وبعدها طلعت معاه وساق وسمع الصوت قالي الظاهر
الموتر مقصرين من القريز قلت في بالي الظاهر باخلين حتى في القريز..
بعد ماوصل الموتر لتشيك 45 ألف دخلته عندهم وبعدها داومت في offshore لانه دوامي اسبوع
بأسبوع وخلال يومين خلصوه واتصلت فيهم وقلتهم شكانت المشكلة قالي الدسكات الخلفية عندك
كان بس محتاجة تورنا وقتله والسائق قال كان ناقص قريز من قدام قال لا بطلو وشيكوه وطلعت
المشكلة من الدسكات الخلفية قتله طيب الدرويل بيجيك وبيستلم الموتر عندكم...
فجأة اتصلي السايق وانا فالدوام ويقولي عبدالرحمن ترى اول مرة في حياتي استلم السيارة وصخة
من الداخل وملطخين البيبان والارضية ومن غير مايقرطسون الكرسي والسكان وبعد الارضية
يعني تقول الموتر دخل كراج ميكانيكي درجة 10 وهمهم بس تنفيذ شغلهم من غير اهتمام السيارة...
|
رد مع اقتباس
خـلآ إبـتـسـآمـآتـي مـثـل حـب كــوعـي
