ارضيات وحوائط

[هنووف]

مرحبا

ااصحااب الخبره بليز ساعدوني اااحس المقاول بدى ينصب علي سألته عن ملبغ ارضياات البيت كامل ( ارضيات وحوائط حمامات الله يعزكم/ وارضيات مطابخ / وارضيات الصالات والغرف)
انصدمت من السعر ايقولي اجمالي المبلغ 35000الف يعني ابي اعرف المقاول يحسب على اي اساس اذا هو مايعرف المساحه يعني يقولي مساحة الارضيات 800 وانا حسب لي محل المتحده ارضيات الحمامات والحوائط بس 470 متر هل يعقل ان باااقي ارضيات البيت والملاحق 330 متر

بليز سااعدوني وش اسوي

[khaldoon]

لا طبعا مستحيل تكون ارضيات البيت و الملاحق بدون الحمامات 330 متر

بس اختي انت حسبتي الحوائط مع الارضيات و قلتي 470 متر مع بعض و هذا ما يصير

كل واحده لها حسابها و سعرها

الارضيات تحسب مساحة الحمام طول مضروب في عرض و بس

الحوائط تحسب محيط الحمام يعني مجموع اطوال حوائط الحمام مضروبه بالارتفاع كامل للحائط حتى السقف و يطرح منها فتحة الباب و الشباك بس اي فتحة اقل من متر مربع لا تطرح و تهمل من الحساب و كأنها مب موجوده

ما نقدر نساعدك من غير ما نشوف المخططات و نشوف كم حمام و ارتفاعات الطوابق و مساحة الفيلا ...الكلام غير واضح وما نقدر نحكم هالشكل

[هنووف]

اخوي بخصوص حساب ارضيات الحمامات الرجال اللي ف شركة المتحده هو اللي حاسبها لي بالملي لاني باااخد الارضيات من عنده

بس ايصير ان مبلغ الارضيات 35000 الف بس

[SULTAN1]

المساحة مهم معرفتها وهي موجوده ويمكن حسابها من الخرائط ،بعدين المهم معرفة السعر اللى قال لك سعر شغل التركيب فقط او يشتمل على الأرضيات اذا كانت سراميك وماهي نوعها ،هناك الإماراتي والهندي والصيني والإيطالي والأسباني .......الخ ،أسعارهم تختلف

[هنووف]

عفووا اخوي سلطان مافهمت عليك يعني فيه سعر تركيب وفيه سعر ارضيات ؟؟

[SULTAN1]

نعم فيه فرق ،المحل يبعك السراميك ،بس لازم تشوف لك مقاول او عامل يركب لك السراميك

[khaldoon]

اخوي بخصوص حساب ارضيات الحمامات الرجال اللي ف شركة المتحده هو اللي حاسبها لي بالملي لاني باااخد الارضيات من عنده

بس ايصير ان مبلغ الارضيات 35000 الف بس

اختي اعتقد انه فيه سوء تفاهم من طرفج

اقعدي مع المقاول و اسأليه 800 م تشمل الارضيات مع الحمامات و الا بدون الحمامات و هل هو جامع الحوائط مع الحمامات و الا شنو بالضبط

ترى 800 متر مربع مساحة كبيرة جدا ما شاء الله ...انتوا بيتكم كبير هالشكل و الا شنو بالضبط

اما انه مبلغ الارضيات ب 35 الف ما اعرف طالما انه ما نعرف كم حمام و ايش مساحاتهم و ايش نوع البلاط و سعره اصلا

بعدين ما تنسي انه لازم يكون في كمية هالك خلال الشغل و يفضل تاخذين 5 او 10% من كل نوع للمستقبل في حالة التكسير لاي سبب لانه اي تكسير بالحمام بسبب تسريب ماء ممكن يخليكي تكسري الحمام كله علشان نقص عليكي كم بلاطه تم تكسيرها

[هنووف]

مرحبا اخوي خلدون بالنسبه عدد الحمامات 7 حمامات ف البيت و2 ف الملاحق

ومطبخ خارجي ومطبخ تحظيري ف الدور العلوي وبالنسبه للحمامات مساحاتها مب كبيره وايد عندي ثلاث حمامات 3 في 3 والباقي مساحاتهم زينه

بس احس المقاول ظلمني ف السعر الاجمالي لان حسب علمي دفعات بنك التنميه 100000الف للحمامات و100000الف للارضيات البيت شامل التركيب

[khaldoon]

مرحبا اخوي خلدون بالنسبه عدد الحمامات 7 حمامات ف البيت و2 ف الملاحق

ومطبخ خارجي ومطبخ تحظيري ف الدور العلوي وبالنسبه للحمامات مساحاتها مب كبيره وايد عندي ثلاث حمامات 3 في 3 والباقي مساحاتهم زينه

بس احس المقاول ظلمني ف السعر الاجمالي لان حسب علمي دفعات بنك التنميه 100000الف للحمامات و100000الف للارضيات البيت شامل التركيب

نحاول نحسب شوي مع بعض

7 حمامات بالبيت و 2 بالملحق

3 حمامات 3*3= 3*3*3= 27 م2 لللارضيات

الحوائط بتكون للحمام الواحد= 3م*4 حوائط*3م ارتفاع= 36م2
الباب المفروض يكون 2.2*90 لانه باب حمام = 2م2
الشباك راح اهمله على فرض انه صغير و مساحته اقل من متر مربع

اذا الحوائط للحمام الواحد= 36-2= 34م2

في 3 حمامات= 102م2

الخلاصه للحمامات 3*3

ارضيات= 27 م2
حوائط= 102 م2

الباقي يعني 4 حمامات مساحتهم زينة.....ما اعرف اقدرها هالشكل

قولي 2*2.5 (افتراضا)
الارضيات= 2*2.5*4= 20 م2
الحوائط= 4.5*2*3=27م2 للحمام الواحد و بعد خصم الباب بيصير= 25م2

الخلاصة
اربع حمامات بمقاس افتراضي 2*2.5
الارضيات= 20 م2
الحوائط= 100 م2


الملحق حمامين
عادة بيكون مقاسهم صغير جدا جدا

نفترض 1.5*2 و ممكن اصغر بعد
الارضيات= 1.5*2*2= 6م2
الحوائط= 3.5*2*3*2=42م2
نطرح البابين للحمامين بيصير =42-2*2= 38م2

الخلاصة لحمامات الملاحق
ارضيات =6 م2
حوئط =38 م2

المجموع النهائي ارضيات= 53 م2
حوائط= 240م2


بس انت قولتي ببداية الموضوع انه المحل حسب لج ارضيات و حوائط الحمامات 470 م2

ما اقدر احكم ...لانه ما عندي مخططات و كلها فرضيات اللي فوق للمساحات و لارتفاع الحوائط على فرض انه 3 م

بس هذا الحساب كمساحات بس بدون هالك و بدون احتياطي للمستقبل و ما تنسي انه كل حمام له بلاطه و يختلف سعره عن الحمام الثاني و في اشياء اسعارها غاليه جدا جدا و في اشياء رخصية جدا جدا

ولو التركيب بيكون بزاوية 45 درجة نتيجة اختلاف مقاس بلاط الحوائط عن الارضيات بيكون الهالك كبير جدا جدا خلال التركيب مقارنة لو انه التركيب بزاوية 90 درجة لما يكون مقاس البلاط للحوائط و الارضيات مثل بعض و الفواصل متطابقه مع بعض

يعني في اشياء كثيرة بتحكم

الفكره بس علشان تعرفين اشلون الحساب

بالتوفيق

[هنووف]

مرحبا ااخوي خلدون طرشت لك المقاسات حسب الخرايط على الخاص