أيهما أفضل : سبوت لايت بمحول ولا بدون محول ؟؟ (تجاربكم)

[فويرط]

مرحبا

بصراحة انا بغيت اشتري سبوت لايت للبيت ومحتار بين اللي بمحول وبدون محول

رحت محل في بروة وقالي :


اللي بمحول / سعره 31 ريال ( فريم + لمبة + المحول )
تفاصيل : الليت حار - اللمبة ماتطول - إضاءة قوية - اللمبة بروحها 3 ريال ( الاضاءة لون واحد - الاصفر )


اللي بدون محول / سعره 29 ريال ( فريم + لمبة )
تفاصيل : الليت بارد ( وهو شغال تقدر تمسكة) - اللمبة تطول ( يقول اتم اكثر من سنة ) - إضاءته أقل من اللي بمحول - اللمبة بروحها 20 ريال - وفيه منه إضاءه باللون ( الابيض - الاصفر ) ويسمونها (LED) .


رحت محل بعد في بروة اللي يبيعون شكلهم صينيين
ويبيعون أدوات كهربائية صينية بس شكلها كوالتي
قال بيعطيني السبوت لايت بدون محول آخر شي (31.5) وبيعطيني ضمان على اللمبة لمدة سنة
وقالي اللمبة الوحدة بــ 25 ريال .


أتصلت للكهربائي وسئلته ( أيش أفضل / بمحول ولا بدون ) قال : بدون محول !!!!



نشوف تجارب الأعضاء مع السبوت لايت


( للعلم البيت اللي ساكن فيه الحين مافيه سبوت لايت واحد )


علشان جذيه ماعندي خلفيه عنه


وهذا موضوع اخوي ( احساس شايب ) بنفس عنوان موضوعي



http://www.qatarshares.com/vb/showthread.php?t=464512

[OREO]

مراحب اخوي ،،

اخوي و حبيبي فويرط لا تخلط الحابل بالنابل لان بالطريقه هذه ما راح ترسي ع بر و خلينا نقارن اضاءة الاسبوت لايت مع اضاءة LED و كل فئة من الفئتين هذول لهم محاسنهم و مساوءهم ،،

في معلومه لازم نعرفها في البدايه ،، الاسبوت لايت تجي منه 12V ( بمحول ) و 240V ( بدون محول ) ,, و اضاءة LCD تجي منها 12V و اكثر( بمحول ) ،،، وفي بعد 240V ( بدون محول ) .


السؤال اللي يطرح نفسه ،، هل اختار 12V او 240V ،،

يعتمد على حسب ميزانيتك ،، اذا انك انسان مقتدر اخذ بو 12V لان يدوم مابين ثلاث سنوات و اربع سنوات و سعره اغلى و اذا ميزانيتك ما تسمح ،، اخذ بو 240V و طبعا هالنوع ما يدووم كثير لان الكهربا اللي داخله عليه عاليه ،، اما من ناحية الاضاءة فتأكد بأن الاضائتين نفس الشي بالضبط لان المقياس هو قوة الواط Watt و مهب الفولت V ,, ( نفس الشي ينطبق على نظام اضاءات الـ LED ) ،،

في الجمله اللي طافت وضحت بين الـ 12V و الــ 240V في عموم الااضاءات سواء الــ Halogen ( الاسبوت ) او ( LED ) ..


احين نجي نقارن بين الاسبوت لايت و الــ LED ..

١- الاسبوت لايت عادتا ما تجي منه الا لون واحد ( الاصفر ) بخلاف اضاءات الــ LED اللي تجي منه اكثر من سبع درجات من الاوان و الخ ,,

٢- اضاءة الاسبوت لايت تكون حاره و خاصه بو 50W و هذا بخلاف اضاءات الــ LED ,,

٣- اضاءات الاسبوت لايت تصرف كهربا اكثر من LED .. خذ الحسبه - - - من المتعارف عليه اضاءة الاسبوت بو 50W تساوي ما يقارب من 650-700 شمعه ( Luminance ) اما اضاءة الــ LED بو 12W تساوي 600-700 شمعه .. يعني نقدر تقول بأن كل 4 ليتات من الــ LED تقريبا تساوي ليت واحد من الاسبوت ،،

٤- في المستقبل اذا حبيت تغير من الاسبوت لايت الى LED ,, فما عندك مشاكل لان الفريم و المحول التابع للاسبوت لايت راح يركب على ليتات الـ LED ،، اما العكس لا ،،

٥- Etc,,


عزيزي فويرط ،، IF I WERE YOU, I WILL GO FOR SPOTLIGHT ,,

و هذه لعدة اسباب ،،

1- اضاءة الــ LED اللي على شكل الاسبوت لايت حدها 12W و هذا طبعا اذا انك بتطلب من برا ،، اما اذا انك بتاخذ من الدوحه فتأكد انك ما راح تحصل اكثر من 3W و قوته تجي ثلث 1/3 قوة الاسبوت لايت ،،

2- جميع اضاءات الــ LED اللي على شكل الاسبوت لايت كل ابوها الموجوده في الدوحه مهب من ماركة CREE و EDISON ،، بمعنى إن المصنعين هذول هم من افضل المصانع لمادة الـ LED و المصنعين اللي ذكرتهم يصنعون القطعه اللي في اللمبات نفسها و هذه عباره عن سلك و تغطى بماده صفراء او بيضاء و من وظايفهم قوة الاشعة الصادرة من الماده نفسها ،، ( معلومه بسيطه .. الماركتين اللي ذكرتهم للتقنيه هذه ،،،هي الماده او القطعه الموجوده في الليتات الــ LED بمعني ما راح تحصل ليت بالماركه اللي ذكرتهم فوق ،، على سبيل المثال ،، ليتات الــ LED من شركة فليبس تستخدم المادة المصنعه في ليتاتها من ماركة Edison ,, بخلاف الليتات التجاريه الموجوده في الدوحه اللي ما تعرف وين مصدر القطعه اللي داخل الليتات ،،

3- ما راح تحصل في الوقت الحالي اضاءة بو LED 12W ليت واحد ،، اغلب ليتات الــ LED راح تحصلهم يا اما عباره عن ثلاث ليتات او اربع و كل ليت عباره عن واط واحد W1 و مجموع الثلاث يساوي 3 واط ،، و اكيد انت شفت النوعيه هذه في محلات الدوحه ،،

4- ليتات الاسبوت اذا خذتها في الوقت الحالي مهب خساره فيهم لان اذا جيت بعد فتره و حبيت تستبدلهم بالــ LED تقدر تستبدل بس اللمبه نفسها و بدون ما تغير شي و حتى الديمر نفسه تقدر تستخدمه ( القطعه اللي تتحكم في قوة اضاءة الاسبوت )،، اما اذا ركبت نظام الــ LED و جيت في المستقبل تغير بالاسبوت لايت ما راح تقدر و لازم تغيز السستم كامل و الخ ،،،

5- و الخ ،،،


اسمحلي اخوي فويرط سندرتك اشوي لكن حبيت افيدك والله و تستفيد من كل ريال تدفع في الليتات هذه ،،

عن نفسي حاليا مركب اسبوت لايت بو 12V و منتظر لين ينزلون ليتات LED تعادل نفس قوة الاسبوت لايت و بشرط يكون ليت واحد و مهب ثلاث او اربع ليتات في لمبه وحده ،، لان الثلاث ليتات زواياها حاده من الداخل و تعطيك اضاءه حاده و اتعور العين ،،

موفق اخوي و قبل كل شي لا تنسى تستخير ربك و تشوف ايش اللي راح ترتاحله ،،

[OREO]

للتوضيح ،،،



ليتات الــ LED المتوفره حالياً بالطريقه هذه و من عيوبها حدة الاضاءة و بحد اقصى 3W لكل ليت ،، يعني مجموعهم 9W و طبعا هذا اذا شريت من النت ،، لان اللي في محلات قطر راح تحصل 1W لكل ليت و مجموع الثلاث ليتات بتكون 3W ,, يعني الاضاءة تكون تعيسه اذا قارنتها بالاسبوت لايت ،،





في الرد اللي قبل ذكرت لك بأن احسن مصنعين على مستوى العالم هما EDISON و CREE و بالضبط اللي اقصده هي المربعات الصفرا اللي تشوفهم علي الليت نفسه ،، اما ماركة اليت راح تشوف شركات كثيره و مختلفه و الخ ،، و بتسألني اشلون طيب اعرف الماده او الــ Chip اللي داخل الليتات هذه مصنوعه من اي مصنع فيهم ،،

راح تحصل الشركات اللي تبيع الليتات تتفاخر و تكتب على ليتاتها بأن مادة الــChip اللي في الليت نفسه مصنوعه من شركة Edison او Cree و اذا شفت الصوره اللي فوق كان نكتوب تحت الليل الجمله هذه (3x3W Aluminum MR16 LED Light 12V Cree Edison Chip) و بالاضافه يوم تشتري لازم يكون مكتوب ع الكرتون ،،

و موفق بإذن الله ،،

[صمت 1]

جزاك الله كل خير على التوضيح اخوي

[كبير المتداولين]

انا جربت احمر وابيض بووحده بوثلاث بديمر بدون ديمر كل النوعيات الي في الدوحه يختربون اشتر بوريال كميه وكل ماتخارب وحده بدلها وفك نفسك

[روح الاطلس]

دار راسي من كلام اوريو ماشاء الله خبير

طيب اوريو وين احسن مكان نشتري منه السبوت لايت؟؟

[Chambray]

انا عندي خبره بسيطة في محلات الليتات في فرنسا

معظم محلات فرنسا تاخذ الليتات الموديرن من المانيا ..

توني طايح على شركة اسبانية

بس عموماً اسعار اوروبا غاليه بس كواليتي ..

بس مشكلتي ماعرف في الكهرباء كلش
يعني

ودي اعرف

الغرفه كم واط يكفيها ؟؟

الصاله كم واط يكفيها ؟؟ كم ليت اشتري لكل مكان !!

ما ابي احط في مكان اضاءاه زيادة عن اللزوم

وما ابي احط في مكان اضاءه خافته وماتكفي


الي اعرفه ان الدايمر مايشتغل مع ليتات ال led

فما رأيكم ؟؟

[OREO]

دار راسي من كلام اوريو ماشاء الله خبير

طيب اوريو وين احسن مكان نشتري منه السبوت لايت؟؟

سلامت راسك حبيبي ههههههههه

كثير من الناس اشوفهم مستانسين ان حصلوا احسن و ارخص سعر و في الاخير يتفاجأ بأن الاسبوت لايت ما يدوم عنده كثير ... لييش ؟؟ ،، ( اصبر علي و بقولك ايش تشتري لكن ماني قايلك من وين عشان الاداره ما تقولي ليش يا اوريو تسوي دعايه لفلان او علتان ) ،،

1- احسن نوع للمنازل من ناحية السيفتي و قلة الصيانه هو الاسبوت لايت بو 12V ،،

2- احسن ترانسفورمر هو الالماني القديم ( Analog ) و مهب الالالكتروني ( Digital ) ,,

3- الفريمات تقدر تاخذ الصيني اللي مكتوب عليها Made in Spain و هذه الفريمات صناعه صينيه و جودتها عاليه و في منها اشكال معينه و خاصه اللي تجي منها الساده لان معدنها سميك و قصتها 7 ملي ،،،

4- من اهم الاشياء اللي لازم تحرص عليها بأنك ما تركب الواير الابيض اللي يجي مع الفريم و استبدل الواير هذا بواير اسمك و اتحصله ينباع في نفس المحل اللي بتشتري منه الفريمات ،، و كثير من الناس تحترق الليتات و السبه هذا الواير لان غير مطابق لمواصفات الــ 50W و بالاضافه اتحصل الوايرات تحتر بسرعه و اوقات تحترق بعد ،، فلذا انصحك تركب وايرات اسمك و تكلفه الواير الواحد تقريبا ٤ ريالات ،، But you are gonna save your money and your family from any disaster in future لا سمح الله ،..

5- افضل و احسن نوعيه من الاسبوت لايت ( الليت ) هما نوعين ،، يا اما بو 50w الكنديه او ماركة اوسرام الالمانيه و تجي منه يا 13W او 50W ،،



الاماكن اللي تقدر تشتري منها الاسبوت لايت ،، مافي مكان محدد ،، لكن لازم نعرف اللي نبغيه ،، و طبعا راح اعطيك سعر الترانسفورمر الالماني ( 20-22 + الفريم 5 ريالات للفريم الثابت + الليت من 1-2 = 26 الى 29 ريال ،،،

طبعاً كثير من الناس بعد ما ياخذون الاسبوت لايت يتفاجأون بأن الاسبوت يا اما يحترق بسرعه او الواير الابيض اللي بين اللمبه و الترانسفورمر يحتر و يحترق ،،

فعليك بالنصيحه هذه ،، استبدل اللمبه التجاريه بلمبه اصليه يا اماكنديه او من ماركة اوسرام الالمانيه و مهب الصينيه ،،، و هذه قيمتها من 4 الي 5 ريالات ،، و استبدل الواير الابيض بواير امتن و اسمك و قيمة الواير من 3 الى 4 ريلات ،، و بعدها تعال و ادعيلي ،،

تذكرت شي ،، اذا ركبت ديمر ( اللي تعلي و تخفض منها الاضاءه ،، ) هذه لها حسبه بسيطه و لا تخلي الكهربائي يلعب عليك ،، فرضاً عندك في الصاله 20 اسبوت لايت ،،
اضرب عدد 20 اسبوت لايت في 50W = ديمر بو 1000 واط ،، في الحاله هذه نصيحه لا تركب بو 1000 ،،، ركب بو 2000 لان اظمن لك و فوق المعدل المطلوب ،، اما اذا ركبت بو 1000 او اقل راح تحس بحرارة الديمر و بالاضافه تسمع صوت طزه من الديمر ،،،

ملاحظه ،، راح تلاقي الديمر بثلاث احجام تقريبا في السوق ،، يا اما 500 او 1000 او 2000 بحد اقصى تقريبا ،،

عرفت ليش الناس تتذمر من الاسبوت لايت ؟؟
تذكر الواير الابيض بو 4 ريالات و اللمبه الكنديه او اوسرام الالمانيه بو 4 او 5 ريالات و بعدها شوف اذا الليتات بتحترق بسرعه و الا لا

سامحني على الاخطاء الاملائيه لان خبرك ما رقدت لهالحزه و المخ شبه في حالة خمول تام

[OREO]

انا عندي خبره بسيطة في محلات الليتات في فرنسا

معظم محلات فرنسا تاخذ الليتات الموديرن من المانيا ..

توني طايح على شركة اسبانية

بس عموماً اسعار اوروبا غاليه بس كواليتي ..

بس مشكلتي ماعرف في الكهرباء كلش
يعني

ودي اعرف

الغرفه كم واط يكفيها ؟؟

الصاله كم واط يكفيها ؟؟ كم ليت اشتري لكل مكان !!

ما ابي احط في مكان اضاءاه زيادة عن اللزوم

وما ابي احط في مكان اضاءه خافته وماتكفي


الي اعرفه ان الدايمر مايشتغل مع ليتات ال led

فما رأيكم ؟؟

اخالفك في الراي يا مشرفنا ،،،

لان ليتات الــ LED تجي نوعين ،، يا اما Dimmable او UnDimmable ,,

فلذا لازم تنتبه و خاصه اذا تطلب من النت ،، لازم من ظمن مواصفات الــ LED تكون Dimmable


موفق ان شاءالله ،،

[Chambray]

اشكرك على التوضيح ياخبره
والله خبرتنا معدومه في هالامور ونستفيد منك والله

بخصوص الاضاءة .. كيف اعرف هالغرفه وهالصاله كم يبيلها من اضاءه ( كم واط ) ؟ كيف اقدر احسب ؟؟

مثلاً غرفه 5 × 5 ارتفاع 3 متر