قال الاطفال اللي يشوفون الاسد الملك اليوم هم قتلة المستقبل .. ما احنا كبرنا وتربينا على الاسد الملك ليش ماقلتنا احد
ولا لما قال ان اللي عامل الموسيقى التصويريه للاسد الملك شيرلي ماكلين .. من يكون الاخ ؟
ملحن الفلم هو هانس زيمر اللي فاز بالاوسكار عن موسيقته الرهيبه بالفلم ..
واضح ان المعلومات كلها دقيقه ماشاءالله مب كذب وتزوير !!
وبخصوص ان اسم بوكاهونتاس يجيب الشيطان وان معناه روح الشيطان
ياخي روح واقرا عن اللي كان لها الاثر الاكبر بعملية السلام بين البريطانيين والهنود واعرف معنى اسمها بالاول
she was given the nickname of pocahontas which has many different translations. It is loosely translated as "one who plays mostly," "playful one," "little wanton," and "playful, frolicsome little girl."
وبعدين شخصيه حقيقيه وتاريخيه مثل بوكاهونتاس الحكومه عامله لها تمثال رسمي تقديرا لها
وقصة حياتها ياخذونها الطلبه عندهم بالمدارس
ولها احترامها وهيبتها بين افراد قبيلتها وتعتبر بنت الزعيم .. واخرتها اسمها يدل على روح الشيطان؟؟
وماطلع هالتفسير العبقري الا لما ديزني سوت لها فلم؟؟ ..
وبعدين من الفلم كله معقوله ماطلع الا ان اسمها يدل على الشيطان
وترك العبر والحكم والدروس اللي يزخر فيها الفلم مثل الحب والسلام واللي لو تأثر فيها الطفل بتخليه يطلع انسان محب ويكره الحروب والقتل
ياخي والله عيب ..
لما كتبت رد بقمة الاحترام والادب لواحد ناشر مقطع مشابه عاليوتيوب راح ومسح ردي !! بدال لايناقشني !!
وارسل لي رساله يقول اسمحلي حذفت ردك لكن مابيك تخرب الرساله اللي احاول اوصلها ..
لو حجته قويه كان رد على كل النقاط اللي رديت عليها واثبت لي ان كلامي غلط
لكن هالنوعيه فاكره نفسها قاعده تقدم خدمه للمسلمين وهم اول من رجعنا ورى 100 سنه !!
مالوم الناس العاديين اللي يصدقون هالخرابيط لان بالنهايه مش مطلوب من الكل ان يكون متعمق بديزني مثل فانزها
لكن العيب لما اشوف واحد من فانز ديزني يقر بهالاشياء !!
وبخصوص حركة الاصابع يعني والله شي يضحك .. شنو هالحساسية المفرطه اللي مالها داعي
لنفرض ان حركة الاصابع فعلا متعمده ولو اني ماشوفها كذا واشوفها عاديه
ولاحظوا ان كلهم بنات اللي عاملينها والبنات دايما اصابعهم مرتخيه وناعمه كذا بالكرتون بشكل عام مايات على ديزني بس
لكن خلونا نفرض ان وراءها معنى فعلا .. الحركه ابعد ماتكون عن حركة علامة الشيطان واقرب ماتكون للغة american sign ****************
وهالحركه معناها ily sign يعني اختصار حق i love you .. رمز كله تفاؤل وبراءه
لكن اللي يشوف ان كل شي حوله عباره عن مخطط صهيوني وماسوني وعايش بقضية المؤامره لازم يحلل الامور كذا
ومن هالطفل العجيب اللي بيحرك الفلم بالسلو موشن عشان يسمع عبارة البساط السحري اللي مالها وجود اصلا
اذا احنا الكبار ماسويناها ولا انتبهنا لها
ولا بيقعد يشوف بالحركه البطيئه حركة الاصابع والايحائات وكلمة جنس ومادري ايش
ياخي تكلموا بما يعقل .. خليتونا نشك بملابسنا وبالهوى اللي نتنفسه !!!
وبخصوص مشهد فانتازيا ياليت لو اصحاب المشروع كملوا خيرهم وحطوا باقي المقطع
مو يعرضون الجزء اللي يبونه .. واللي مايخدم رسالتهم يشلونه !! .. مثل اللي يقول لا إله .. وشال كلمة إلا الله !!!
الشيطان اللي انحط بالمشهد شصار فيه؟ شفتوا الفلم ولا لا؟
لو ان ديزني فعلا ماسوني ومن عبدة الشياطين هل كان فكر يعمل مشهد ينهان فيه الشيطان ويتدمر ويموت بأخره والخير بالاخر ينتصر عليه!!
الله يخليكم قولوا شي عدل مقنع !!!
واحلى شي ان الاخ عارف كل شي ومايفوته اقل شي .. قال ان الشخصيات الجامايكيه بحورية البحر تلقي لعنات على الاطفال
على اساس ان الاخ سمعه خارق وعارف جامايكي .. اذا الجامايكيين نفسهم ماسمعنا منهم هالملاحظه اللي اكيد لو اسمعوها راح تستوقفهم !!
واحلى شي لما تكلم عن مايك ايزنر .. الحين احنا شدخلنا بحياته الشخصيه اذا تزاعل مع زوجته او اذا حب له شاذ!!
يعني كل اللي يشتغلون بديزني لازم يكونون مطاوعه مثلاً ولا ناس معصومين عن تصرفات باقي البشر اللي عايشين برا ديزني !!!
لو باقعد ارد على كل نقطه ماراح اخلص
ياخي والله خليتوا الناس يشكون بكل شي حولهم !!!