همســـات نواااعــــم.....> كيف تقضين اوقات اللعب مع الأطفال؟

[دلة الرسلان]

لعبنا وما قد قلنا بس وكان الفريق (ج) بكبره هو ساحة لعبنا وما شاركونا والدينا وما شعرنا

بضرورة ذلك ليش لازم نلعب مع عيالنا أو نشعر بتأنيب الضمير ؟ يمكن في الأسر اللي ماعندها

ألا طفل وحيد يحتاج فعلا والديه ليلعبوا معه ، بس أذا ماشاء الله محصلين الرفقة من عيال

عمومة وخوال فما بيكون لنا دور مشارك كوالدين ولكن دور أشرافي وعلى حسب سن الأطفال
-----------------

غزلان سالفة الشعور بتأنيب الضمير هي خطوة استباقية لأنه بتشوفين اراء تتحجج بعلم النفس

ومناهج التربية الحديثة التي تحتم مشاركة الطفل في اللعب كوسيلة تربية نقلا من مصادر أجنبية

[khaldoon]

الحين شسالفه كل يوم وحدة منكم تفتح موضوع همسات نواعم ....مرة اخت ام السعف و مرة موضي و الحين غزلان.....كم وحده متفقة علينا!!!...هذه مؤامرة

عن نفسي العب مع ابنائي مونوبولي و جبت لهم شطرنج بس مخهم شوي الحين تخين و الشطرنج مب قادرة تخترقه و العب معاهم لعبة السلم و الحية و شوية العاب على الكمبيوتر

ناوي ان شاء الله العب معاهم لقدام بس يكبروا شوي لعبة ريسك و لعبة ....ناسي اسمها هذه اللي فيها جريمة قتل و نبحث عن القاتل نفس نوعية مونوبولي ...يعني اشجع نوعية الالعاب اللي من طخة مونوبولي و ريسك لانها لعب جماعية

ايضا ناوي العب معهم لعبة اونوا ....على ما اذكر هذه اللي مثل لعبة الشدة او ورق اللعب

لو عندكم اقتراحات فأرجوكم ما تبخلوا علي فيها

يعني و بس يكبروا اكثر بلعب معهم بوكر خخخخ.....لا والله اتغشمر لا تصدقون

[تحداني]

زمان كل شي لعبت .. وكنت البنت الوحيده بعد شابين الله يرحم عبدالله
فكانت ألعابهم شبابيه وما كنت اعرف انها شبابيه
كانوا يعلموني جمباز .. اشلون اشقح من على السور .. اشلون اسدد هدف وافوز
اشلون طريقه الشطرنج .. الكيرم كنت ألعبه بمهاره ولين اليوم
الورق والجوكر وبو ثمانيه والسفره ..
وكنت اضرب اليهال وايد وكله ابي ادافع عن نفسي

بعد ما صار عندي اخت صرت احب العب معاها العاب ثانيه .. سوالف بنات " مدرسه ودكتوره وابوي يومها ما كان وايد غني .. فكله كان خاطري في باربي .. وكانت اللعبه وايد غاليه فيوميا اروح بيت جيرانا .. واوقات كنت اخذ معاي وحده من عرايس بنت جارنا للمدرسه عشان اراويهم ان انا بعد عندي بس في الحقيقه مب لي


اليوم علاقتي مع اللعب مب وايد كهوايه .. خذتني الحياه ابسرعه للكبر
متعلقه بالوالده وحملت جزء كبير من البيت ودراسه اخواني
الجامعه وتفوقي فيها ومثابرتي خذوني اكثر
عملي اليوم صار صعب جدا ومتعب

بس ان شفت ياهل قدامي الا ألعب معاه
ويوم الجمعه كل اليهال متجمعين ويقولون لي " إعميمه من اكبر انتي ولا اعميمه هذيج "
اقول لهم انا .. يقولون لا انتي صديقتنا

العب نطل الحبل
غميضه
سباق
العب في المكعبات
انط على الكراسي
اركض وراهم على اني ابي اصيدهم .. وابطأ حركتي ويشردون ويستانسون



يمكن هذا سبب من بين الاسباب الي يخليني أكره عمري الحقيقي
مب لاني كبرت واستحي منه .. لان ابداخلي للحين ابي اكون مع اليهال وألعب
وامي اتقول خلاص عاد اعقلي .. وحجمي يساعد اني العب معاهم وكون جسمي رياضي ولله الحمد فإمسهل العمليه


احب اليهال فديت روحهم .. والي متملل من مشواير الاعيال او تبي اتسافر اتجيبهم عندي
عرض جدا مغري اقدمه لكم


جملكم الله برضاه

[doha2012]

ابكتني الصور والذكريات ..


لي عوده ان شاء الله ..

,,

[غزلان]

بما ان الموضوع يتكلم عن اللعب بشل كل العابي عبر تاريخي المديد وببسط في الموضوع وبكون ضيفة داشة وطالعة منه اتمنى قبولي بصدر رحب


اللعب في حياتي له مكانة كبيرة جدا من يوم كنت صغيرة لليوم

فمع شروق شمس الأالعاب في حياتي


ومنذ نعومة اظافري



سمعت ان ابوي كان يلاعبني وايد وكان يقضي وقته من عقب عناء التعب في ملاعبتي ويحرص على قضاء وقت كافي معاي ،، بس للأسف ما اتذكر هالسوالف
لكني ممكن ابصم عليها ،، لأني لاحظت ان ابوي كان يلاعب اخواني اللي اصغر مني
ويقضي وقته وياهم وان كان راد من شغله تعبان

فمن جذيه اللعب في حياتي احتمال تكون عادة مكتسبة من الوالد
والوالدة دعمت العادة هذي بصنع العرايس لنا



وسماحها لنا باللعب في الماي
لما كنا نلعب دور الأم والأبو ونسوي غدانا ونقهوي بعض في المواعين البلاستيكية ،،



مواعينا كانت بسيطة جدا وسيد الطعام فيها كان الربيان " البفك " وعصير بونص



وسيد الحلويات كيك بونص



كنا نلعب دور الأم اللي تطبخ لبوالعيال اللي يدخل يسألها اشتبي من السوق ويركب حصانه قالب المخمة
طبعا هالعصا ما عرفنا لها طريق بس توضيح للعصا اللعبة اللي كنا نستغلها في حال
حاجتنا لتمتع بنعمة ركوب حصان سريع






وبنفس الوقت كنا نستقبل الحريمات ونقهويهم ونشرب العرايس الحليب ونسكتهم وانرقدهم وانغطيهم ،، ونلحق على طباخنا قبل ما يوصل بو العيال

واللي أحلى كنا نتغطى لو ريل جارتنا بيدخل علينا صدفة وهو ياييب الإيدام من السوق

كانت هالمرحلة مابين عمر اربع وخمس وست سنين ،، لأن عقب خلاص
تغيرت طريقة لعبنا وصرنا نلعب في الشارع مع الصبيان ،، فانتظروا الجزء الثاني
من رحلتي في عالم الألعاب

--
حياج الله اختي ام السعف والموضوع مايحلا الا بمشاركتكم

اللعب هو الشي الوحيد الى مارسناه بكل مراحل عمرنا وعلى حسب تطور الألعاب المتوفره طبعا لعبة دور الأم كلنا لعبناها غير التركيب الى لين الحين احب العبها مع عيال اختي واخواني اذكر اني امسك الكتلوج واجرب ابني مباني بالتركيب مثلهم وهالشي يمكن عطاني طولة البال ..اما الربيان والعصير فكان حفلتنا مع الكيك الأسكريم في نهاية لعبنا ..

الألعاب كثيرة ومتنوعه لكن كان اللعب له فوائد كبيره على حياتنا

[غزلان]

*لكل فتاه مااهمية اللعب في حياتك؟ وماذا كانت لعبتك المفضله؟

ممم عندما كنت فتاة كانت لعبتنا الركض والبحث والاستكتشاف لكل شي حولنا وطبعا هالشي يساعد وايد في تنمية العقل والفكر

*هل كان للعب في حياتك اثر في تكوين شخصيتك واظهار موهبتك ؟

بالطبع وايد

*هل تحبين مشاركة الأطفال اللعب؟

جدا جدا، يوم الخميس ببيت اهلي احب اجمع اليهال لو خمس دقايق والعبهم العابنا مالت اول الاغاني مالت اول واسوي لهم حركات شقلبه ونط

*ماهي أنواع الألعاب الى كنتي تلعبين فيها مع الأطفال عامه سواء اخواتك اخوانك اطفال اختك / اخوك ثم اطفالك ؟

اكثر شي الشقلبة والنط والاغاني التراثية

*هل توافق ان اغلبية الأمهات يهملوون هذا الجانب المهم ويتركونه للخدم؟

يعني هالشي ماقدر الاحظه الا لو عشت مع الامهات ببيت واحد ، مدري ببيتهم ومع اولادهم شيصير

*هل اثر خروج الأم الى العمل وعودتها متعبه يجعلها لاتجد وقتا كافيا لتخصيصه للعب مع اطفالها؟

والله صار لي 22 سنة اشتغل عمري ماهملت هالجانب ، والحين امارس هالشي مع بنتي العليا وماشاء الله عليها لاحظتها تحب اللعب الحر اكثر من الالعاب ، وانا احب هالشي معاها ومخليتها دايما في الهواء الطلق واحب العب معاها حركات وتقلدني ياربي عليها تجنن ، علمتها فتحي ياوردة وسكري ياوردة فديت قلبها بروحها تصفق وبروحها تنتبه للحركات وتقلد ، احس هالشي يزيد ذكاء الطفل

---
اختي ضوى لاحظي من خلال اللعب تظهر موهبتك في وين هل في الرسم ام في الأبداع والتركيز ولا في هوايه رياضيه ككرة السله او الطائره او حتى الجرى ,,

ماشاء الله شي حلو تخصيص وقت للعب مع اطفالك وهالشي بيفيدك كثير في زيادة التقرب بينكم غير التخلص من الطاقات الكامنه عند الأطفال فيقلل من عصبيتهم وشقاوتهم

شاكره حضورك ومشاركتك

[غزلان]

انا كأم -اتمنى لو ان الوالدة ولا الوالد كانوا قضوا معاى وقت اكثر وانا صغيرة ومرات افكر ليش ماشوف صور لي معاهم واحنا نلعب !!

فانشاللله مابحرم عيالى من هالشي وعلى قد مااقدر بلعب معاهم كل مايكون عندي وقت

--
مرات مشاغل الحياه اويمكن لن فيه من يلعب معاج من خواتج او قريباتج يكفي عنهم

اهم شي تعوضين اللعب مع عيالج لأنه له فوائد ونتائج على نفسيتهم غير انهم يكتسبون مهارات تنفعهم في حياتهم,

ماذكرتينا اهم الألعاب الى كنتي تلعبين بها؟

[غزلان]

نلتمس العذر اختي الغالية ، احيانا الحياة والركض وراء الرزق يلهينا عن فلذات الاكباد

الله يرزقج بر عيالج يااارب ومايشغلج الا بطاعته وبهم ياااارب

فعلا مرات ظروف الحياه تجبرنا

ضوى وشرايج بالأمهات الى يرسلون اولادهم للألعاب مع الخدم او السايق؟

[intesar]

لي رجعة بس لما تفك عني الزعلة.. حمسانة.. من موضوع..

[غزلان]

ندخل في الجزء الثاني من رحلتي في عالم الألعاب
وهي مرحلة المشالع والركض واللعب في السكة مع اخواني وعيال الفريج وبناتهم



لعبنا على الدواريف والزحلاقيات والميزان



وسوينا مقالب في العالم في تريبات الرمل
ولما نفضى وما نلقى لنا شغلة نمارس لعبة تنسيم التواير

وكل ما كبرنا اشوي كنا انحصل على ثقة الصبيان ويشاركونا في العابهم الجماعية

لعبنا الكوك ولعبنا شرطة وحرامية ،، ولعبنا الرين " كنا ننصلخ من المجرمين "
ولعبنا قلينة وماطوع ،،
واذا الشباب كانوا يرفضونا لوجود عنصر شاب غريب وياهم ،،
كنا نلعب نط الحبل او القيس او نركب الطوف نراقبهم ،،

لعبنا قبل ما كان يعتمد على اللعب اللي تنشرى ولا عرفنا لها طريج ،،
كانت حياة الطبيعة والبساطة في التعامل مع عالمنا يترك لنا مساحة كبيرة
في الركض والتشقلب والتنطط ،، وكل هذا كان يكسب اجسامنا قوة
ويفرغ طاقاتنا وانطيح في البيت رقود بعد يوم حافل باللعب ،،

في هالمرحلة من العمر اللي كانت ما بين 6 لين عمر 12 و13
كانت مثل ما قالت ضوى العابنا كلها في الهواء الطلق ،،بس عقب
مع دخولنا سن ننمنع فيه بالاختلاط بعيال الفريج ،، تتغير ميولنا في اللعب
ونتحول بيتوتيات واندور لنا على العاب تسلينا ،،
فكانت الصبة والكتور والجلاد والحرامي ولعبة جماد بلاد حيوان هي متنفسنا في اللعب
وبالأخص الجلاد والحرامي ولعبة جماد بلاد
هاللعبة اللي كنت اسيطر فيها على الوضع ،، واليوم العب عيالي فيها
من امسك القلم اشوي والا اصرخ عليهم stooooooooooop
مساكين يتخرعون وينقزون هيهيهي ،، اقول لهم خلصت
" مرة لعبتها في بيت ابوي وكنا فريق كبير ،، من نبتدي اللعبة اصرخ stooooooooooop
خلصت وكانوا عيالي يلعبون ويانا ،، فاخوي الكبير اتهمني اني اغش ......> ما يثق فيني :"(
وقال براقبها ،، وتم واقف على راسي ،، من اخلص اصرخ بصوت عالي
واخرعه وينقز هاهاهاهاه ......> محد قال له يتهمني
ما تتخيلون اشلون هاللعبة زادت من حصيلتهم المعلوماتية في النباتات والبلاد
والحيوان والجماد والأسماء ،،

وولدي الصغير العب وياه ،، واخليه يكتب وانشغل في النت وانطره يقول لي ستوب
واحاول اساعده واتساهل معاه علشان يكتسب قدر اكبر من المعلومات ،، لأني ناوية عليه
بكلمة ستووووب في المستقبل ان شاءالله



ومن الالعاب بعد اللي كنا نلعبها
لعبة الزهرة
والثعبان والسلم


ولعبة المنبولي



وعقب هالألعاب صارت نقلة نوعية في الالعاب اللي نلعبها
صحيح عمرنا ما امتلكنا جهاز اتاري


بس كان عالم يديد عجيب غريب ،، لفت انظارنا احنا البنات
وكنا نروح بيت خالي بس علشان نسمع صوت الكرة اللي تضرب يمين ويسار
وساعة الهنا لما يسمحون لنا نلعب



عقبها تسارعت وتيرة دخول الالعاب هذي لعوالمنا
فدخل جهاز الفاميلي



كنا كلنا في البيت ما شاءالله نجتمع جدام التلفزيون في الصالة ونلعب
لعبة الذبان وعقب لعبة التركيب ،، والفايز يستمر ،، وكانت امي تعاني ويانا
وهي تعصب علينا سكروا صلاة سكروا روحوا ناموا ، سكروا تعالوا تغدوا

وعقب الفاميلي دخلت علينا العاب كثييرة شي تنمسك في اليد مثل ال game boy



وشي اطور من الفاميلي
واللي هو النيتندو والعابه المشهورة وسوبر ماريو المكستح ايامها بس ما حبيته
وكنت العب العاب ذهنية ثانية تفتح لي مغارات مسكرة ويبي لها مهارة تفكير ،،



ومع هالجهاز دخلت عش الزوجية وكان الـ game boy صديقي ورفيجي في اوقات فراغي

لين كسرت خاطر بو العيال وحب يتعامل مع الطفلة اللي فيني وللحين ما كبرت وادركت انها صارت زوجة وفي طريقها للانجاب ،،
راح شرى لي جهاز صخر مع شاشة تلفزيون صغيرة



كنت اقضي كل وقتي الصبح العب لعبة the castle 1 & 2



ويوم كبروا عيالي ادمنوا هاللعبة ،، كل الذكور من عيالي ادمنوها



كنت اقعدهم على حضني واعلمهم اشلون يلعبون واشلون يفكرون واشلون يسوون ،،

فكان صخر عالمي قبل دخول السيجا ،،


اللي ما تفاعلت وياه وايد
وخاصة سونج ذيه ،، فكانت لي العاب خاصة فيني تعتمد على مهارة التفكير
وايجاد الحلول ،، بس اطلعوا محاربين انتقصوا من حقي في الجهاز
ومرات و نزولا مع رغبة عيالي كنت العب معاهم streets of rage



فكانت هاللعبة باكورة لعبي مع عيالي بشكل ثنائي ،، وكان ولدي الكبير عمره 4 سنين
العب معاه هاللعبة ويطلب مني نوصل للوحش عقب ما نركب اللفت ونضربه علشان نفوز،،
وفرح يوم خلصنا الجزء الأول وعقب خذنا الجزء الثاني وصار اخوه الثاني يطلب مني
العب وياه ،، وخاصة لو خوالهم ما عطوهم ويه ،،

واذكر نزلت لعبة باسم مايكل جاكسون ما اعجبتني ،، ونزلت لعبة علاء الدين بعد ما اعجبتني
وبدت علاقتي بالسيجا يصيبها فتور وبرود ،، واترك لهم الجهاز واوخر عنه ،،
ودخل السوني " بلاي ستشين ون " وعقبه تو وعقبه ثري ،، ودخلنا في عوالم
العاب ثانية وتطور مستمر ومتسارع فيها ،،



فمالقيت العاب تجمعني مع العيال ، فكنت اراقبهم ،، وان كنت العب العاب خاصة فيني
ما كانوا يحبون يلعبونها ،،في الوقت اللي العابهم ماتشدني
فسبقات السيارات والضرب و كرة القدم و العاب ولادية طغت بشكل
اكبر في البيت فصرت انسحب وكان ابوهم ياخذ الدور ويلعب وياهم ،،

بس مرات بطلب منهم الكبار اللي في الجامعة والثانوية قبل الصغير
اشاركهم لعبة call of duty
واتم منخشة علشان ما تحشوني رصاصة او خدوش او رتوش
وادري اني كنت اذبح اللعب بطريقتي هذي ،، بس شاسوي مب راضيين يقتنعون
اني مب مالت سوالف ذبح وطلق نار او قتل في الألعاب ،،

بس في لعبة mortal kombat

نجتمع بشكل خرافي سواء في بيتنا او بيت ابوي مع عيال اخواني او خواتي
واخواني وعيالي ونلعب والفايز يستمر ،،



ودمب تشك ودمب دمب تشك .....> هذي نغمة بنت اخوي وهي تكفخنا وتكسرنا
والسهر في الاجازات للصبح عندي في البيت ، ولازم برفقتي
ودام انه لازم برفقتي فلازم العب معاهم كلهم



لين نزل الوي بمضاربه ،،



فكنت العب مع ولدي الصغير اي لعبة يطلبها وكان ينهد حيلي من زود ما احرك يديني واتحرك ،، بس في سبيل مشاركته كنت اتصبر



واخيرا كان للاكس بوكس حضور كبير في تجميع


كل افراد البيت عندي في غرفة وحدة علشان نلعب الالعاب اللي فيه،،
وفوقه كانوا اخواني اييوني يلعبون مع عيالي الكبار ومرات نلعب بولينج
ضد بعض ،، فلحظات اللعب هذي ما تقدر بثمن في عيون عيالي واحنا كلنا
ملتمين ونتنافس في اللعب وحركات العبط اللي تصير حزة اللعب

ولكن هل انتهت رحلتي في اللعب مع الأطفال وعيالي ؟
امم نشوف الجزء الثالث ،، قبل ما ارد على اسئلة غزلان

-
ماشاء الله اختي ام السعف تخيلت وعشت عالم اللعب بكل مراحله

شي حلو جدا ان تواصلج بعيالج عن طريق اللعب حتى لو ماكنتي تستهوينه او نقدر نقول ماعاد يناسب عمرنا,,لكن اللعب هو الشي والوحيد الى ممكن نلغي كل الحواجز علشانه وعلشان فرحة الأطفال ومتعتهم بمشاركتنا لهم

ماذاكر ابولي لعب معانا لنا كنا مجموعه مع بنات عمي لكن اتذكر كل ماتنزل لعبة جديده يجيبها لنا ,,اما الوالده كانت تشاركنا مع خواتي لعبة السلم والثعبان ومرات التركيب..

ومن وجهة نظري الوالدين قبل متفرغين اكثر لعب مع اولادهم بعكس وقتنا الحالي اشوف الخدامه هي الى تلاعب الطفل سواء بالبيت او في اماكن اللعب.