همســـات نواااعــــم.....> كيف تقضين اوقات اللعب مع الأطفال؟

[غزلان]

,,


مسيكم بالخير



كنت العب مع اعيال اختي واخوهم كلنا العاب بنات


اهم شي العاب المطبخ كان لها شان كبير ذيك الايام


ونحافظ عليها .. ونخلي الولد هو الضيف واحنا هل البيت


ولا تسوي لنا دمى .. كيف مدري بس الظاهر اعواد وخلق ومدري وشو .. او نشتريها من السوق .. كنا ذيك الايام ماتخلينا امي نطلع مكان .. الا المدرسه ونلعب مع اعيال اخواني في الفريق ..


ومن ضمن الا لعاب .. ( الصقله ) وهي كوره مدوره صغيره ومعها حجر .. الله ياذيك الايام واذا تهاوشنا تحاذفنا بالحصا


وكنا نلعب العصا اللي اخرها تاير سيكل لاقينه مقطوق مدري وين ولعبنا به ... ولما كبر الولد خذت له امي سيكل .. ابوك يالسيكل الاول كان يهايط به على العيال .. ومن ركبه دبغناه


لابه ايفون ولا ايباد ولا ايبود ولاسوني ..


الحمد لله رب العالمين



تسلمين اختي استمتعت بالمشاركه هنا

معاج حق ايااام حلوه ايام اللعب الي بدون قيدون منطلقين بكل ماهو متوفر نلعب ونستمتع

السيكل كان شي ثمين نفرح على هالنوع من الهدايا لأنه يخلينا نروح كل مكان يعني يسهل المشوار ههههههههه

وانا استمتعت بردك

[ام السعف]

عـــدنا في الجزء الثالث من الألعاب

وهي امتع المراحل في اللعب بالنسبة لي في تسعينيات من القرن الماضي ،، بو العيال دخل لنا اول كمبيوتر وتتبعه كمبيوترات ثانية ،،
علموني عيالي الشباب الكبار على الألعاب المسماة PC Games
اول لعبة العبها كانت لعبة استراتيجية ،، كانوا يلعبون مع ناس وعلموني العب وياهم
وكنا نلعب بشبكة داخلية في البيت ،، وفي الصيف نسهر للصبح لعب في هاللعبة
اثنين من عيالي كبروا وهم على حضني واحنا نلعب سواء بروحنا او مع ناس على الأون لاين ،،

وعقب صرنا نشتري الألعاب ونلعبها وان ادمنا لعبة تعلقنا فيها وصعب انغير اللعبة
اكبروا الكبار وبديت العب مع الصغار نفس الالعاب ومرات اشتري احدث لعبة من الالعاب
الاستراتيجية ،، وفي كل لعبة يديدة عيالي يبتعدون عني لأنهم ما يبون يلعبونها ،،

بس مرات ولدي اللي تخرج من الجامعة لليوم يطلب مني العب معاه لعبة كرهتها
لأني العب بضمير وغيري يغش
" واعتقد انه متابع ممتاز لي في المنتدى لاحظت من كلامه اليوم ،، بس من هو ؟ مب راضي يقول لي من هو "
فصرت وحيدة ،، يا إني العب اون لاين او ما القى حد من عيالي يلعب معاي
لين ياني اخر العناقيد خوسيه ،،

مع خوسيه كل شي تغير ،، كل شي حوله كان اسمه كمبيوتر ،،
وما يصير ينهمل واحنا ننشغل عنه ،، وصل عمره ثلاث سنين فتحنا له حساب
في الهوت ميل ،، وكان يشوفنا نلعب العاب على الماسنجر ،، فكنا نلعب وياه
لعبة تركيب الصور ،، او العلم " الالغام " او X O او الغطاس ،، وكنت العب
سودكو ما كان يفهم لها كلش ،، واليوم مع الجواويل لعبة السودوكو واجب عليه
انه يلعبها في المستوى السهل ،، واخليه يشوفني احل واقول له اشلون ممكن
يشوف او يخمن الأرقام حسب المعطيات اللي جدامه ،،

فكنت اقعد في غرفتي وهو يقعد في غرفة الكمبيوتر مع اخوانه اذا تقدم علي
ياخذ له لفة في الغرف وهو يصرخ ويقول : " الله عليك يالعرباوي الله الله عليك "
عاد يوم كان عرباوي قبل لا يبوقونه الريانيين

في البداية كنت انبسط من حركاته وعقب صرت اقلده
فكل عشر جولات لعب افوز بجولة وحظه كان قوي في X O 3D فكنت اقوم من مكاني
واخذ لي لفة واقول الله عليك يالعرباوي تجرح واتدوي ،، وحيو العرباوي حيوه،،
فكان يعصب ويسكر اللعبة ويعطيني بلوك ودليت

دخل عمر 4 سنين حولت اللعب معاه على الماسنجر الى تعليم تعلم يكتب اسامينا تعلم يكتب الارقام تعلم يكتب الله ،، و هلا خوسيه ، مرحبا
السلام عليكم ،، سلام ،، كنت اعلمه اشلون يستخدم الحروف واشلون يكون الكلمات
فكان يحفظ شكل الحرف والرقم ويكتبه ،،

فاللعب اهنيه ما كان تضيعة وقت فراغ الا كان تعليم
وافضل وقت لمثل هالأعمار للتعليم استغلالهم في اللعب وتعليمهم ،،

كبر حبتين وحب يلعب نفس العابي ،، فكان يعذبني في تعليمه طريقة اللعبة
والمشكلة كان يطلب مني اخليه يلعب اون لاين
وخليته مرة تسبب في سبي وطردي من اللعبة

كبر أكثر طلب له حساب خاص في ستيم وناخذ له العاب كونتر سترايك وتوابعهم
فكان يقعد يلعب اون لاين مع الناس ....> بس هل حياته كانت لعب ؟
لا،، كمل المطلوب منك علشان تلعب ،، احفظ قرآنك علشان تلعب ،، ادخل الموقع
الفلاني وارفع سكورك في حل المسائل الرياضية عقب تعال العب ،،
وكان يحرص انه يكمل كل اللي عليه علشان يلعب ،،

والعام شارك في مسابقتين للقرآن وبفضل من الله وحده حفظ المطلوب منه عن طريق تشغيل السور واللعب بنفس الوقت ،،
والمطلوب مني ادقق له على مخارج الحروف وتصحيح قراءته او احكام التجويد ،،
انجز المطلوب منه في فترة قياسية وبتقدير ممتاز ولله الحمد ،، وكان طول الوقت
يشغل القرآن ويلعب اون لاين ،، فاللعب اهنيه استغليناه في صالحه ،،


وآخر الالعاب اللي صار يلعبها وصرت اشاركه او اتركه يلعبها هي لعبة Portal 2
اخليه يلعب اون لاين مع الناس يتكلم معاهم كتابة ،، تطور اسلوب لعبه و مهارته في ايجاد
الحلول تطورت وااايد ،، مهارته في المحادثة مع الاجانب تطورت بشكل كبييير ،،
تعلم الغش منهم " ما منعته يتعلم ويتسلى في اللي تعلمه " بس رفضت انه يلعبها بشكل عام
قلت له مب مشكلة تعرف اشلون يغشون وما تم غشيم ،، بس غلط تفتح المراحل بالغش ،،

وشافني لو دخل واحد يغش اطلب منه ان انكمل من غير غش ،، وان رفض طلعت من اللعبة ،

اليوم ولله الحمد برفقته وصرت احتاج له علشان انكمل اللعبة في فئة single player
دور لي ودور له ،، ومرات اخليه واروح ارجع اشوفه فرحان انه حل المطلوب ،،
في هاللعبة مخك يعورك لو ما حليت المطلوب ومجرد ما اتحله تحس بفرحة في المخ
" لحد يقول لي اشلون ما اعرف " فالفرحة هذي تشجعنا نحل الباقي ،،

ومرات اطلب منه اييب يحل وظايفه المطلوبة منه ويشوفني اشلون احاول احل ،،
فيقول لي لحظة لحظة شوفي المفروض نسوي جذيه وجذيه وتنحل المسألة ،،
ويأشر بيده حبتين علينا
وخوسيه هذا مب بس صرت العب وياه اون لاين او single player

سحبني الى عالم الالعاب الحركية مثل السكووتر اللي نصحني اركبه واجربه وبحبه
وبالفعل حبيته ،، وحبه اخوه الكبير ليانا في الإجازة لازم يصوت عليه خوووسيه تعال نلعب



واللعبة الثانية اللي خلانا نلعب وياه من هو صغير هي لعبة
green machine




لازم نتسابق ونلف على بعض ونتجاكر ،، بس ما احب التدعم واخاف على نفسي وخاصة ريلي ام الإصابة ،، فأعصب عليه ويزعل ،، ووقفت فترة وما قمت العب وياه وخاصة يوم قصت علي اختي وقالت لي ما تقدرين اتسوين مثله واتفرين الgرين مرة وحدة ،، توني باستعرض وتفتر علي اللعبة واطيح في نقعة الماي وتلتوي يدي واتعور ،، عاد نقعة الماي هذي لازم يسويها خوسيه علشان يستعرض فيها

ورد يقول لي خلاص تعالي نلعب مب داعمج ،، بالفعل يلعب وياي بكل أدب واحترام وان وخرت ودخلوا اخوانه يلعب وياهم ،، صوت ضحكه لين اخر الفريج لأنهم يتجاكرون ويتداعمون وينقلبون ،، وهو خفيف سريع في الحركة وفي التمويه واللفة ،، ويتخلص منهم ،،

واللعبة الثالثة اللي العب وياه صرت



وهو صغير كان يقعد في السلة وادور فيه في الحوش ونروح السوق ونتشرى اغراض
وانروح الدكان ،، وانروح بيت يده ،، كله تمثيل في تمثيل وهو فرحان ومبسوط ،،

فاللعب في حياة الطفل متعة كبيرة خاصة لو الوالدين كانوا حوله وقراب منه ،،
صدقوني راح تتركون في قلوبهم ذكريات حلوة وااايد ،، فما فيها شي لو عيالنا
كانوا قراب منا وكنا قراب منهم ،،

ملاحظة :


كتبت تجربتي في اللعب بشكل عام ومع عيالي بشكل خاص ،،
لأني ابي من كل أم وابوا يقرون هالموضوع يعطون عيالهم قدر أكبر
من الاهتمام ومشاركتهم حياتهم الطفولية بكل مافيها ،،

وربنا يخلي لكم عيالكم ويخلي لي عيالي ويردهم بالسلامة كلهم ،،