مكتب سكتش
أخوي انا كنت نفس مشكلتك وجلست اتخبط يمين ويسار عند كذا مهندس بين قطر والسعودية واطلعت على كذا تصميم وبدون مبالغه يمكن اكثر من 100 تصميم درستهم دراسة وسويت تصميمين ولا حسيت براحه نفسيه
في النهاية أخوي استخرت ربي وجبت ورقه وقلم وسجلت فيها احتياجاتي الحالية واحتياجاتي المستقبليه
ووفقني ربي لمهندس الله يجزيه عني كل خير وهو المهندس أشرف في مكتب سكتش واللي نصحني باكثر من نصيحة وغير لي بمخطط كنت مسويته عند مهندس في السعوديه والحمد لله باقي لي هالحين الواجهات واخلص
_____________
سكتش طالبين مني 2% من قيمة المبنى .. يعني لو كلفني البنيان مليون ونص ..راح ياخذون ثلاثين الف ..
_____________
سكتش خرايطهم غالية.. لكن شغلهم نظيف من حيث جودة التصميم وابتكار أفكار جديدة والمتابعة
والله يوفقك ويوفق الجميع
_____________
سكتش رحت له من سنه شغله تمام ولكن سعره غالي
_____________
اذا جيبك عامر وتبي شي عدل ومحترم ومرتب عندك مكتب اعتقد اسمه اسكتش في بن عمران مهندس وجدي او مجدي
_____________
سكيتش راح تدفع فيه اكثر من 20 الف ويوصل لل30 الف
لكن شغله ممتاز
غالي وممتاز
_____________
اخوي بخصوص سكيتش اسعار غاليه ولكن على الفاضي
خصوصا اذا واحد بيبني على بنك التنميه
اي تصميم بيكون عليه مبلغ اضافي
الواحد يسوي له بيت بحدود ال550 متر بنيان
كثر الاقواس او التصاميم فالنهايه بتنقلب على صاحب البيت لان ياخذ له مساحه كبيره
خصوصا الاقواس علاوة عن ارتفاع التكلفه
ف انا خذيت موقف اسوي بيت مربع واستغل المساحات فالاخير طلعت باربع غرف فالدور الاول مساحاتهم بين ال 4 ونص في 5 و 5 وفي 5 ونص
والماستر 5 في 10
والبنت هاوس سويته غرفه 5 في 6 بحمامها الله يكرمك
والدور الارضي سويت فيه غرفه سادسه 5 في 5 ونص
والصالات والمجلس مفتوحين بمسحاة تقريبا فوق ال110 متر
_____________
عندك مكتب سكتش للاستشارات الهندسيه شغلهم حلو ويعدلون في الخرايط
اذا فيها اخطاء والاشراف عندهم ماعليه كلام عندهم استشاري اسمه عاطف شديد مع المقاول ويفتش على كل شي ياخذون كل شهر 1500 ريال مكتبهم في بن عمران الدور الاول العماره الي جنب معصرة السنافر
_____________
توني بديت مع
Sketch
اللي في بن عمران
عطيته جميع احتياجاتي درسها وسوى لي رسم كروكي
أو ما شفت الرسمة استناست عليها
لأن عندي مشكلة، أرضي مساحتها 1200 (30 * 40) لكنها في زاوية فريج
تحيط بها البيوت من أربع جهات وفي الجهة الرابعة فتحة 10 أمتار لا أكثر ع الشارع
من ضمن احتياجاتي:
(1) المجلس (مجلس ومطعم ومغاسل وحمام وانتوا بكرامة) وغرفة السايق مع الحمام يكون لهم باب خارجي ومنفصل عن البيت.
(2) حوش البيت اللي بيلعبون فيه اليهال يكون بعيد عن كشف مدخل البيت وكذلك عن دخول وخروج السيارات.
(3) مساحات كبيرة للغرف مع متطلبات دقيقة تحتاج لتفاصيل.
(4) الحصول على الخصوصية في ظل محاوط البيوت من 4 جهات.
أي مصمم صعب يلاقي طريقة تجمع بين: (1) حل متطابق مع ستايل حياتنا احنا القطريين. (2) مواصفات البلدية. (3) طريقة ابداعية تجمع جميع هالمتطلبات.
لكني لقيتها في sketch وشكلي بستمر معاهم على الرغم من السعر العالي: 30 ألف لمساحة 1070 متر بنيان.
هاذي تجربتي اللي بديتها والله يوفقك ويوفقنا جميع
_____________
كذا واحد ما مدحه سكيتش
وغير ذلك يحط كميات كبيرة وضخمة من الحديد في الخريطة
وعلى ضوء ذلك بتزيد قيمة البناء بنسبة كبيرة
فيه مكاتب كثيرة أحسن منه
_____________
سكيتش عيبهم ان يحطون كمية حديد تقوم برج هذا الشي خلاني اتوهق مع المقاول بعد
التعديل لان زاد علي المبلغ 102000 ريال
مثل ما قال الاخ يحطون كميه حديد تبني برج وحديد 25 مم
الشكل الخارجي للفله من شبابيك عند التنفيذ سوف يختلف لعدم حساب اماكن البيمات
_____________
عندك سكتش في فريج بن عمران عندهم استشاري اسمه عاطف خبره في السعوديه وعنده ذمه
_____________مرحبا أخوي خلدون
يعطيك العافية على هالجهد الرائع.. اختصرت علينا الوقت والجهد ورتبت لنا
المواضيع والردود اللي بتسهل على الواحد اتخاذ القرار..
بالمناسبة... أنا صاحب هذا الرد عن Sketch
حبيت أقول إني ما استمريت معاهم. كان اللقاء معاهم حلو في أول زيارتين لكن بعد ذلك
صارت الأمور بايخة:
(1)
المفروض ياخذ احتياجاتي وعلى أساسها يفصّل البيت
لكنه سوى العكس، عمل الرسم الكروكي وحاول يركّب طلباتي غصب فيه
وبالتالي غرف صغرها وغرف كبرها وغرف أضافها بلاداعي وغرف ما سواها...إلخ
(2)
سوء المعاملة
إعطاء مواعيد والتخلف عنها، لدرجة إني آخذ موعد ويقول لي تعال بعد ساعة، ولما أضرب الخط وأجيه يقول لي أعتذر تعال لي مرة ثانية.. او يصرفني .. وحصل كذا مرة.
(3)
زيادة الأعمدة والأساسات بشكل ما له داعي.
(4)
عدم تجاوب رئيس القسم لشكواي، وعشان يراضيني قعد معاي بنفسه وقال بابدأ من حيث انتهى المهندس الاول، خذ احتياجاتي مرة ثانية وعطاني موعد، ولما جيته على الموعد طلع مسافر ولا فوض أحد ينوب عنه في تصميمي!!
(5)
المهندس الثالث استلم التصميم المبدئي وخذ احتياجاتي مرة أخيرة، اكتشفت إنه ما يعرف يتكتك وكله يعطي كلام حلو وبس وقال لي روح ادفع دفعة اولى.
خلاصة الموضوع طلعت من عندهم وشفت لي مصمم رفيجي سوالي ولله الحمد خريطة من أروع ما تكون، وهذا اني حصلت عليها الموافقة الأسبوع اللي فات.
والله الموفق
اخر تحديث لمكتب سكيتش