السلام عليكم ورحمة الله وبركاتة
اليوم حبيت انقل لكم موقف حصل لي في شركة ستارلينك
قبل كم يوم صحيت من النوم والبلاك بري مايشتغل مع اني كنت استعملة قبل ما انام وكنت شابكة بالشاحن
استغربت من الموضوع وقلت اني بوديه ستارلينك لأنه على الضمان ولما رحت هناك ماشفت غير الفوضى وكل زبون يجي دوره يتهاوش معاهم وانا في البداية كنت اقول اشفيهم الزباين متحاملين على ستارلينك ولما جى دوري عطيتهم التليفون وقلت لهم الي صار وطلعت ف كلموني في نفس اليوم وقالوا لي تعال استلم جهازك لأنه مايشتغل ورحت لهم على اساس انه على الضمان وطبعا لما وصلت كان جدامي ثلاث اشخاص وهالمره ركزت على نوعية خلافات الزباين
الزبون الأول رفضوا انهم يعوضونه لأنهم يقولون ان تليفونه طايح في الماي
الزبون الثاني يبغون منه 150 ريال مع ان تليفونه على الضمان ومبين في سستمهم ولكن ليش ماجاب ورقة الضمان
الزبون الثالث : خامس مرة يجي بسبب انه ماخذ اي فون من خمس ايام والتليفون فيه عطل وهو يوميا يجيهم وكل يوم يقولون له احنا نقدر نصلحه ومانقدر نبدله لك
وطبعا انا كنت الزبون الرابع : وقالو لي ان تليفوني مايتصلح لأن الماذر بورد احترق قلت لهم خلاص باخذ تليفون مثله فقالو لي لا انت تليفون مش على الضمان لأن بوم فتحناه لقينا (آثار ماي) طبعا انا انصدمت من عذرهم وقلت لهم يمكن انتو مغلطين لأن هذا تليفوني الشخصي ومايفارقني ومتأكد انه بعيد كل البعد عن الماء قالو هذا الي عندنا ومانقدر نعوضك وطلبت اكلم المسؤول ويوم كلمني قال لي بالحرف الواحد احنا مانقدر نفيدك لأن التليفون فيه ماء وصدفة وانا اكلم مسؤولهم الا الزبون الي بعدي متهاوش معاهم على نفس المشكلة لأنهم قالو انه تليفونه فيه اثار ماي فسألت مديرهم وش سالفة الماي معاكم واذا كانت عندكم خطة لتقليل المصروفات المفروض ماتكون بالطريقة هذي واني ماراح اسكت عن حقي واني بشتكي في حماية المستهلك فقال لي بكل برود تقدر تحاول وبتخسر وقتك لأنهم ماراح يسوون لك شي.
وفعلا تم الإتصال بحماية المستهلك وتسجيل شكوى ومازلت انتظر الرد منهم
السؤال ياجماعة الخير هل في احد عانى من ستارلينك ؟ ومن طريقة تعاملهم ؟ بالذات هالكم يوم الي فاتو وش سالفة الماي معاهم ؟
وسامحوني على الإطالة