انا دايما اقول الغالي سعره فيه ، انا جذي جاتني نصايح واااايد واسعار رخيصة بس في الاخير اتفقت مع شركة سمعتها زينة بالسوق والسعر غالي صحيح بس والله مرتاحين من عوار الراس قريب بنخلص ويبقى التشطيب الله يسهل علينا وعليكم يارب
اللهُمْ خِفّافاً لا لنْا ولا عَليّنا لا نؤُذيِ ولا نُؤذى، لا نَجّرح ولا نُجرح، لا نَهيّنْ ولا نُهانْ، اللهُمَ عَبُوراً خَفيّفَاً لا نُشّقيِ بأحدً ولا يُشّقى بنا أحد
سبقتيني أختي ضوى .
الغالي سعره فيه . شركات المقاولات معروفة و أبتعدوا عن الشركات التي تقاول كـ هواية مع الطفرة العقارية .
قال صلى الله عليه وسلم : « لئن أمشي في حاجة أخي حتى أقضيها، أحب إلي من أعتكف في مسجدي هذا شهرًا».
ان أصبت من الله ........ و ان اخطأت فمن نفسي و الشيطان
اللهُمْ خِفّافاً لا لنْا ولا عَليّنا لا نؤُذيِ ولا نُؤذى، لا نَجّرح ولا نُجرح، لا نَهيّنْ ولا نُهانْ، اللهُمَ عَبُوراً خَفيّفَاً لا نُشّقيِ بأحدً ولا يُشّقى بنا أحد
بعض المقاولين يا اخوي يغريك انه بيسوي لك الأفضل والأسرع والأرخص، قبل العقد يحط لك الشمس في يد والقمر في يد، والدجل ما له جنسيه والدجال يجيك بثوب وغترة وعقال ويجيك ببنطلون، لكن الشاطر يسئل ويتعب ويسوي تصميم متكامل وعقد ومواصفات وحساب كميات متكاملين بدون أي ثغرة، وبعدين يسعى ويدور على المقاول الكفؤ.
إسمح لي إخوي أقول لك تجربتي في بناء بيتي، انا صممت البيت تصميم معماري وكملت عليه إنشائي مع مكتب قوي ومتخصص وكملنا كل المخططات مع بعض وتدخلت في كل صغيرة وكبيرة مثلي مثل كل واحد بيبني، زدت على التصميم والمواصفات ونسخة العقد حساب الكميات وكله نظام هندسي تخصصي وباللغة الانجليزية، لأن المكتب ما فيه مهندس عربي وهذي لغة الهندسة أصلاً حتى في الحكومة، المهم أول ما بديت رحت حق ربعي اللي منهم واحد ذلني بس سمع اني بابني عنده وقال انا ما ابني الا حق نفسي بس لك بابني بشرط تكون فلوسك جاهزة، قلت تحت أمرك تنازل شوي وخذ نسخة المشروع مني وبعد فتره قال راجع المهندس يبي يستفسر منك عن أُمور، رحت للمهندس وأول ما دخلت الا المكان مظلم وكئيب ولا فيه حد وكان الوقت عصر تو الناس، خذت لفه على المكاتب الفاضية وشفت مكتب فيه واحد ملتحي بجلابيه يصلي ما بين العصر والمغرب، دخلت بهدوء وجلست انطر لين يخلص، وطبعاً ما بقى يخلص ويوم خلص سلم وتم يسبح ويطالع في إتجاه بعيد عني وانا انطره بس يعبرني عدل، قلت له انا فلان وجاي من طرف فلان وابي المهندس فلان قال أهلاً وتغير معاي طلع هو المدير، وبدأ يهاجم الاستشاري ويقول انته عمرك شفت نعله 30 سم، دا الاستشاري بيخبص معاك، قلت يالحبيب ما قال لك كفيلك اني مسوي كل شيء وفتحت له الرسومات أدور وين النعله اللي 30 سم، تدرون شحصلت؟ حصلت مواصفات النعلة خشب صلب 150في 20 ملم والعشرين ملم هي سمك النعله وهو ضربهم في بعض طلعوا 30 سم، قلت يا اخوي شوف انت غلطان ووضحت له، قال لا مش غلطان أنا شايفها في المواصفات وحساب الكميات، وأمسك حساب الكميات واطلع له بسرعه وهو مندهش شلون حافظ، المهم أثبتت له شاللي موجود وانه غلطان، وهو اصلا شيء تافه يقدر يحط البديل ويكتب سعر الوحده وعلى اساسه يكتب الاجمالي.
بعدها بديت أقرا له بالانجليزي المواصفات وهو رجع يطالع الباب ويبتسم وشبه يضحك، شوي ووقفت قلت شفيك مب معاي، قال تسدأ بالله؟ مش عارف اي كلمه من اللي بتؤلهم، قلت انت مهندس؟ قال أيوا بس دراستنا بالعربي، انا صبرت عليه وقلت زين سعر لي حساب الكميات وحط البدائل اللي تبيها وبنتناقش فيه بعدين، ورجعت له بعد فترة الا هو مسعر لي ورقه بس ولا بمهتم بالجداول اللي مسوينها يعني تسعير مبهم وبإجمالي تقريباً مليون ونص، وكفيله قال لي لو بيسعر لك حساب الكميات كامل بيوصل السعر 3 ملايين بالراحه، قلت خلاص انسوا الموضوع وابتعدت عنهم ورحت لشركات غير ولكل شركة صارت لي قصة، اللي مسعرين كثير غالي وهم بدائيين تحس الشركة بطولة الرجل الواحد، واللي قالوا لي ما نسعر حساب كميات وغيرهم قالوا لي دور الباب مب فاضيين لك.
قلت ليش أتم مع الصغار ليش ما اروح للمجربين والكبار، ومن تجربة شفت شركة متعاملين معاها في مشاريع حكومية ورحت لمديرها، الا ذاك المكان المرتب وسكرتاريا وشغل تخصصي عالي ومدراء مشاريع كل واحد بكرفته وجنه عماد حمدي ايام شبابه، دخلت على المدير وقلت له انا مصمم المشروع اللي تشتغلون فيه وأرجوك أنقذني لي حول سنه أدور مقاول زين .. قال شوف ما نبني فلل بس لأننا شغالين في مشروع قريب منك بنسعر لك، وتسعيره كان صدمه ما توقعتها غير عن الكل مليون مئة ألف بس، بعد ما شفت من الجهلة 3 ملايين إلى مليون ونص المليون، وما قصر المدير نزل لي 50 الف وبدا الشغل وكان متعاون في كل شيء وحسب العقد وبمتابعتي ومتابعة جميع التخصصات من الاستشاري، وبيتي ولله الحمد للحين 6 سنين ولا مشاكل تذكر الا البسيط من الأُمور.
سامحوني لازم أطول وإختصرت الكثير والله وسلامتكم