اخواني والله ضعت في منكم يؤيد البودره وفي منكم يذمها يعني الافضل الدفان الطبيعي الي يسمونه الغربال ولا رمل الحكومه
اخواني والله ضعت في منكم يؤيد البودره وفي منكم يذمها يعني الافضل الدفان الطبيعي الي يسمونه الغربال ولا رمل الحكومه
انا عن نفسي حطيت بودره وخليتهم يغرقونها بالماي ودكوها دك ..
إذا بغيت الراي الأكيد الدفان يا اخوي من أرخص مواد البناء في البيت ولا تستسهله، واللي فهمته منك الدفان تحت أرضية الحمامات وتحت بلاط الغرف ... هنيه نتكلم مباشرة لكن الدفان ككُل لرفع مستوى البيت فصحيح راي المهندس خلدون هو الصح لأنه بيكلف كثير.
بعدين بعد الدفان بفائض الحفر للاساسات ولرفع مستوى أرضية البيت المفروض تكون فيه صبية خرسانة وحوافها تكون من البورد القابل للإنضغاط وهو من مادة خشبية، وبعدها تتمدد بايبات الكهربه، وبعدها يجي الدفان اللي تقصده انت أتوقع، فالدفان الأولي كميته كبيرة وممكن يحتوي على حجارة ولازم يندك عدل وينصب عليه ماي، وشيء مهم البلدية قسم مكافحة القوارض كانوا يصبون دوا لمقاومة الأرضة بالمجان للمواطنين وهذا شيء مهم لازم تسويه، وبعدين أي فواصل تمدد لازم تكون مرشوشة بمادة مقاومة للأرضة، وانا أقصد الفواصل الخشبية اللي تنحط بين الحائط وصبية الخرسانة اللي يجي عليها البايبات مالت الكهرب والدفان الثاني قليل الكمية ذيه أما يكون رمل مغسول ولا خلطة اسمنتية برمل مغسول وعليها تتركب البلاطات هذا بالنسبة للغرف والمطابخ والصالات، وبالنسبة للحمامات نستخدم رمل مغسول حكومي ويفضل الخشن، وكمية حمولة نشال واحد بتكفي كم حمام، والقيمة 300 ريال على حسب علمي ما ادري كم الحين، وبتفتك من خساير الأرضة المحتملة والموجودة في أغلب دفان قطر، بالنسبة لدواء مكافحة الأرضة فيه نوع قوي في حدود 100 ريال للغالون موجود عند شركة الدرويش، وهذا تصب منه شوي على ال compressible board اللي يكون في حواف الصبية الخرسانة علشان يقاوم طلوع الأرضة لداخل البيت وانتشارها على خشب الأبواب المكلف واللي بتحتد بعد كم سنة تغيره، فدائماً الوقاية خير من العلاج.
بعدين مستغرب توهانك ذيه وسؤالك وانت تبني الله يعينك، وين استشاريك المفروض له راي ويتعب لأجلك الموضوع بسيط لازم عليه.
اخوي العزيز راعي الموضوع...مثل ما تشوف انا و اخونا العزيز معماري قطري نتكلم لغة واحده....الدفان للغرف و البيت من الرمل الطبيعي اللي تم تنخيله و الرمل المغسول للتبليط....عاد اكثر من هالكلام ما ينفع نقول و انت بكيفك تبي تركب بودره نصحناك و نصحت اكثر من مره بالابتعاد عنه و الامر متروك لكم
بخصوص ما ذكره اخونا العزيز معماري قطري عن النمل الابيض و الارضه...كلام 100%....تأكد من رش البيت من شركة متخصصه او من البلدية و بشهادة تبقى معاك....مهمه جدا مثلها مثل البنيان
النمل الابيض او الارضه لو لا قدر الله طلع في بيتك مستقبلا بيصير ياكل كل الاخشاب و الاوراق ....يعني ممكن يخليك تطفش من البيت لو ما قدرت تتخلص منه ....راح تضطر مستقبلا تسوي تكسير في بلاط و ارضيات البيت و الحوش في اماكن مختلفه و تسوي حقن من اجل القضاء على النمل الابيض ...متخيل نوعية هذه الخساير...متخيل انك راح تضطر تغير ارضيات البيت و يمكن في كميات و يمكن ما في
انصحك بعد ابتعد عن النعلات الخشب في البيت مستقبلا لانها اماكن تجميع للحشرات و بالاخص الصراصير
مشكور اخوي خلدون واخوي معماري والدفان الي انا اقصده الي هو تحت البلاط وبالنسبه للاخ معماري الي يسال عن الاستشاري خلاص انتهى دوره يوم خلص العظم والحين قاعد اشطب بنفسي والي فهمته من كلامكم انه احسن دفان للغرف والحمامات هو رمل الحكومه المغسول والله يعينا على تكلفته
في دفان يسموه على ما اعتقد باك فييل حصاه صغير جدا
ايش رايك فيه كدفان للارض وفوقه رمل المغسول تحت البلاط
اقدارنا مكتوبه ,,,,, فلنعش بهدوء ..
استعمل بودره نص سعر المغسول و اذا خايف من الارضه مع وجود المبيدات من البلدية على الاقل خل الرمل المغسول للدور الأرضي و ادفن الادوار العلوية بودرة.
و لا تشيل هم.
الله يبارك فيك ويسلمك ويوفقك في بنيانك
يا اخوي الإستشاري وجوده في هالمرحلة أهم من أي مرحلة قبل، وحتى لو إنت بترتب هالأُمور كلها بنفسك بتتعب، خصوصاً في الكهرباء وفي أُمور كثيرة... انا خبرتي في الكهرباء معقولة وحتى وقت دراستي خذت مواد كهرباء بس صدقني حطيت إستشاري وطلبت مهندسين مختصين كهرباء وميكانيكا ووفروا لي على درجة عاليه من الخبره، وهذا غير عن إن التصميم متكامل عندي وبمواصفات وحساب كميات، وفوق هذا جبت إثنين من قدماء مهندسين الكهربه يختبرون التمديدات ولوحات التحكم.
بعدين إنت شكل ما انا فاهم تشتغل بمواصفات مبسطة وممكن كل مقاول يترجمها على كيفه ويسوي أقل المطلوب، لكن إتفاقك عن طريق إستشاري وعن طريق إختيار الأفضل وعن طريق اتفاقية تربط المقاول بشغل محدد ومقبول، وبمتابعة الإستشاري بتتطمن على بيتك وبتضمن نتيجة جيدة، وصحيح الإستشاري بشر وممكن يخطيء لكن انت بروحك ولا انا بروحي وفي مجال غير مجالي أخطائي بتكون كارثية وباتعرض للغش من كل جانب، إلا إذا وفقني الله وتوفقت في ناس بيكتفون بربح معقول وبيسوون كل شيء بضمير وهذا مستحيل الحين، فالمقاول يتصيد الفرص ويحاول دوم يوفر على حسابك، وهو بروحه ينسى شاتفقتوا عليه كلامياً وحتى كتابة إلا إنك تقرا وتحط العقد دوم جدام عيونه.
إخوي الإستشاري عبارة عن محامي قانوني لك ويضمن لك تطبيق الإتفاق وبدونه انت ضايع حتى لو إنك ملم بكل حذافير ودواعيس الشغله، وصدقني كلام ما ينفع كله مراسلات وفاكسات وكلها قانونية إذا طلعت من الإستشاري ولا من أي كان ما لها قيمة.
استشاري عشان تركيب بلاط شعبي؟ ما اشوف الموضوع يستاهل على فيلا
يمكن لو كان الشغل في برج او مجمع كبير
الاستشاري مهم في مرحلة العظم و بيني و بينكم اكثرهم وجودهم و عدمهم واحد الا من رحم ربي
ادفن الصبيه و البيبات بودره و الحمامات رمل مغسول و توكل على الله