الاستشاري مش موجود وقت صب الدور.. هل لي حق عليه؟؟

[معماري قطري]

صراحة توقفت عن المرور على هذا القسم من الامس لاسباب خاصه...بس لما شفت موضوعك ما قدرت الا اني ارد


اولا يعتمد على نوع الاتفاق اللي بينك و بين الاستشاري بالعقد اللي بينك و بينه وهل lطلوب منه و الا لا...

في امور كثيره لازم يشوفها الاستشاري بتخص الخرسانه نفسها و بتخص طريقة الصب و بتخص طريقة السقي curing بعد الصب

انا ما راح اتكلم عن طريقة استلام السقف لانه هذا مش موضوعنا و انت سألت سؤال محدد

بالنسبة للخرسانة نفسها

أكيد لازم يكون موجود على كل الصبيات الانشائيه ...يعني قواعد و اعمدة و اسقف .....الحين مين يضمن سلامة الخرسانه اللي صبها و مين يضمن انها انصبت بطريقه صحيحه و انه استخدم الهزازات لدمك الخرسانة في الصب وما صار تعشيش

يعني الاستشاري هو اللي بيشيك سيارات الخرسانه من حيث ميوعتها و تماسكها و هل هي ناشفه ام لا و كل ما كانت ناشفه بتسبب تعشيش اللي بنسميه segregation ...المقاول بيروح يحط عليها ماي او plastesizer و هذا الشي مرفوض تماما لانه غير باللخطه الخرسانية وكمية الماي المطلوبه بالخلطة الخرسانية و لازم تكون صحيحه بمجرد خروجها من المصنع

ايضا لما تتأخر الخرسانه بالموقع اكثر من ساعة-بناء على الكود القطري ...طبعا احنا بنخليها ساعتين من اجل المواصلات ....المفروض انها تنرمى بس المقاول لو الاستشاري مش موجود بيحط عليها ماي و بيكمل صب

ايضا الاستشاري لازم يقيس حرارة الخرسانه و يتأكد انها اقل من 32 درجة

ايضا يتأكد انه ما تنصب الخرسانه بين الساعة 10 صباحا الى 5 عصرا...يعني مش بدرجة الحرارة العالية ...ممكن نتهاون و نصبها العصر بس تكون الحرارة منخفضه و مب لاسقف و قواعد يعني مب لمساحات مفتوحه ...تكون لاعمدة و جسور ارضيه و حرارة الجو لو اقل من 35 بييكون افضل

slump & cubes بيشوف كيف تؤخذ بطريقه صحيحه و كل كم سيارة بيتم اخذها و بيحط ستيكرات عليها و المختبر بيكسرها بناء على الستيكرات المحطوطه و مبين فيها توقيعه المعتمد عند المختبر للتأكد انه ما تم استبدالها

هو اللي بيرفض السيارات اللي خلطتها غير مناسبة او طولت بالموقع او انحط فيها ماي


بالنسبة لطريقه الصب

لو الاضاءه غير كافيه بالليل او ما في هزازات كافيه او انها صغيره و ضعيفه او ما في عمال كافيه او اسلوب العمل غير صحيح و بدائي فكله بيكون تحت اشرافه و بيقدر يغير فيه و يطلب تعديله من المهندس المقاول

هو اللي بتأكد انه السقف او القواعد نظيفه فعلا قبل الصب و انه الخشب و الحديد تم رشه بالماي و انه ما في برك ماء بالقواعد و السقف قبل الصب

هو اللي بيتأكد انه ما صار عندك شيء اسمه cold joint يعني لما تصب السقف بجهة و تتركها و تروح لجهة ثانية فلازم ما يمر على الجهة الاولى اكثر من ساعة و الا بيصير cold joint فلازم تتأكد انه ما انترك مكان اكثر من ساعة

ايضا بيصير cold joint لما تتأخر سيارات الخرسانه عن بعض و يصير توقف متكرر خلال الصب

هو اللي بيتأكد و بيشوف انه المقاول بيعيد فحص استقامة الاعمده verticality بعد صبها مباشرة لانها من الصب و الهز و العمال ممكن تتأثر استقامتها

بالنسبة للسقي بعد الصب curing

هو اللي بيتأكد انه الخرسانه تمت تغطيتها مباشرة بالنايلون او الخيش بعد جفاف سطح الخرسانه من الماي اللي بتكون من خلطة الخرسانة علشان يضمن انه ما تتشقق

هو اللي بيضمن انه المايسون ما راح يحط ماي زيادة على سطح الخرسانه من اجل تنعيمها كوجه نهائي لانه هالشي غلط و ايضا بسبب شقوق بالخرسانه

يعني لو الاستشاري مش موجود فمين يضمن كل ما ذكر بالاعلى غير المقاول و ضميره

ما قصرت يا أخ خلدون ذكرت كل شيء وكنت غافل عن طريقة توقيع العينات بستكر وكسرها حتى نضمن ما تتغير، بس أختلف معاك في عقد الإستشاري بحيث انه لازم ينص على تواجده أثناء الصب ... وانت بعدين ذكرت كل واجبات المهندس المشرف فكيف بيقدر يؤدي واجباته بدون ما يكون متواجد؟

[khaldoon]

ما قصرت يا أخ خلدون ذكرت كل شيء وكنت غافل عن طريقة توقيع العينات بستكر وكسرها حتى نضمن ما تتغير، بس أختلف معاك في عقد الإستشاري بحيث انه لازم ينص على تواجده أثناء الصب ... وانت بعدين ذكرت كل واجبات المهندس المشرف فكيف بيقدر يؤدي واجباته بدون ما يكون متواجد؟

وياك يا اخوي و اشكرك على نشاطك الواضح في هذا القسم في الايام الاخيره و الله يكثر من امثالك يا رب

بخصوص كلامك فوق...معاك كل الحق انك ما تتفق معاي فيه ....بس ايش اقولك....اشوف اغلب ان لم يكن كل مكاتب الاشراف على الفلل تبلغهم انه في صبية فيمكن يجي و يمكن ما يجي و لو جاء بيحضر ربع ساعة او ساعة بشكل صوري و ما يتم من اول الصبيه لاخرها

يعني يا اخوي لما تعطي المكتب 1500 ريال بالشهر و الا حتى اقل (بعضهم ياخذ 1200 ريال) فتتوقع انه بيحضر كل صبية في بيتك و بيراقب الاشياء اللي ذكرناها فوق!!......المكاتب هذه تلاقيها عندها مهندس او اثنين....يمرون الصباح على المواقع اللي تابعه لهم من الصبح للظهر و بعدين يرجع المكتب و بالليل يرجع المكتب و سلامتك...وين تلاقي واحد تخصصه صبيات بس....يعني الصبيه للسقف يبيلها بالراحه 3 ساعات ...فراح دوام هالمهندس و لا عاد تابع المواقع الثانية او شغله بالمكتب ....

لو تلاقي بالمكتب مهندسين او مراقبين تخصصهم صبيات بس فبهالحالة اقولك انه بيشرفون صح....

دلني على مكتب واحد يشرف على فلل و يحضر الصبيات كلها و يسوي الكلام اللي قلناه فوق علشان نعتمده للجميع

في يوم كنت مقاول و بلغت الاشراف بعد موافقته الخطيه على صب القواعد اني بصب في الساعة الفلانية و ما حضر و بالصدفه جاء علي و انا ببداية الصب للقواعد المالك و سألني وين الاستشاري قلت له بلغته انه في صب و ما اقدر اوقف شي ...لو بيحضر اهلا و سهلا لو ما حضر مب مشكلتي....انا بلغته و سويت اللي علي

لقيت المالك بيتصل على مدير المكتب الاستشاري و بيجي المدير معصب و متنرفز و كأني مرتكب جريمة و يقولي وقف الصب حالا و الا اجيبلك الشرطه....قلت له ما اقدر اوقف الصب لانه بس تحضر شركات الخرسانة خلاص الموضوع منتهي و انا كل اللي سويته قانوني و بعلمكم ...السقف مستلمينه خطي و عندكم علم بموعد الصب قبل 24 ساعة تبي تجيب الشرطه حياك لاني لو وقفت الصب مين بيدفعلي حق الخرسانة اللي بالسيارات ومين مسؤول عنها

ولا سوا شي و راح اتصل على المهندس المشرف اللي عنده و حضر الصبيه و بس راح المالك و هو متطمن روح الاستشاري و الصب ما خلص

لذلك انا ما اعرف ايش الاتفاق اللي بين اي مالك و الاستشاري ماله يوم تلاقي الاستشاري يوم يجي الموقع و عشرة ما يجي ....و في ناس يمر الاستشاري على بيوتها 3 مرات بالشهر و المالك يعرف و ساكت ....قولي هذا على ايش بيشرف بالضبط

[khaldoon]

انا أختلف مع أي حد قال إنه عقد الإستشارة لا بد وينص على وجود الإستشاري، والمفروض كل الأُمور تتم بموافقة الإستشاري وأُمور كثيرة واجب الإستشاري يستشير فيها المالك ... وكإجراء مهني وبدون ما يذكر في العقد فواجب الإستشاري أن يكون متواجد ويشوف قبل مقاسات وموقع كل عمود وكل أساس ووضعية الحديد والشترنغ أو الخشب اللي بيمسك الخرسانة... ويشوف تربيط الحديد وقطع الإسمنت اللي بتسوي مسافة خرسانة تغطي الحديد، وأُمور كثيرة أُخرى، وبعدها يعطي الإذن بأخذ موعد للصب ويجي يشرف على عملية الصب حسب ما ذكرت سابقاً وذكروا أغلب الإخوان وما قصروا.

وذكرت في حالة وقع الأسوأ وهو الصب بدون تواجد الإستشاري، فهناك إجراء ذكرته، لكن يا إخوان شيصير لو العينات فشلت فشل كبير في أن تصل للقوة المطلوبة بعد 21 يوم؟ وشيصير لو عرفنا أن العينات توضع في مكان بدرجة حرارة مثالية وتبلل أغلب الوقت، وما هو مصبوب في الموقع لا يصل لدرجة الإدامة التي تحصل عليها العينة؟ وشيضمن لنا أن المقاول أو الإستشاري بيفحص العينة أكيد؟ وشلون نتأكد إن نتائج الفحص الحاصل عليها من عينة أُخذت من الموقع وليست من عينة مثالية أُخرى؟ وشالحل لو كانت النتائج سلبية بدرجة كبيرة هل يطلب الإستشاري هدم ما تم بناءُه؟

أتمنى من أحد الإخوان ينورنا بخصوص هذه التساؤلات لأني شخصياً مارست الإشراف قديماً ولا أذكر هذه الحيثيات، ومارست التصميم المعماري أكثر فترة عملي، وملم بأُمور التعاقد.

الطريقة المثالية للعمل هي وجود المختبر خلال عملية الصب لانه هو بنفسه يسوي المكعبات و ال slump و بيحط الاستيكرات عليها و بوقع عليها البيانات و بياخذها معاه و بيكون مسؤول تماما عنها و لكن هالشيء ما يحدث في مشاريع الفلل

لما المقاول يرسل المكعبات او اي نوع من انواع العينات للمختبر فالمختبر بيفحص العينات او المكعبات و بيحط النتائج بس ما بيضمن انه هذه العينات و نتائجها تخص الموقع المطلوب....لانه من يحضر العينات بيقدر يجيبها من اي مكان و يقول للمختبر انه مأخوذه من الموقع الفلاني و هو بيسجل مثل ما قال الشخص او الجهة اللي سلمت العينة للمختبر

بس لو طلبت من المختبر confirmation letter انه هذه العينة مأخذوه من الموقع الفلاني و حددت اسم الموقع فما راح يعطيك ومعاه حق طبعا

اما لو كان المختبر حاضر خلال الصب او خلال اخذ العينه فهو ملزم انه يعطيك هذه الرسالة و هنا انت اللي معاك حق

انتبهوا انه كل شركات الخرسانة بلا استثناء بيكون عندها فني بيسوي مكعبات بتخص الشركه و بتم فحصها بشركة الخرسانة سواء كان في مختبر او ما في مختبر علشان لو لا قدر الله صار خلاف و انه المختبر بيقول انه المكعبات رسبت فيكون عند شركة الخرسانة نتائجها الخاصه فيها لنفس الصبيه ....هذا دليل على انه كل شركات الخرسانة ما تثق الا بنتائجها.....و عندها اثباتاتها الخاصه فيها لانه لو رسبت الخرسانة فشركة الخرسانة هي المسؤوله من حيث التكاليف و الوقت و الغرامات و الاعطال امام المقاول عن كل الاعمال المترتبه عن تكسير السقف مثلا و اعادة انشاؤه مره اخرىو المقاول طبعا هو المسؤول امام المالك عن كل هذه الاعطال....يعني المالك ما راح يدفع للمقاول و راح يحمله قيمة الاعطال و الخسائر و المقاول ما راح يدفع لشركة الخرسانة و راح يحملها نتائج هذه الاعطال و كل التكاليف ...يعني تكاليف تكسير السقف و اعادة انشاؤه مره اخرى بالاضافه الى سعر الخرسانة الراسبه و الغرامات الناتجة عن التأخير لانه هالشي يحتاج تقريبا شهر الى شهرين عمل حسب قدرات المقاول و كل التكاليف بتتحملها شركة الخرسانة

طيب طالما انه مثل ما قلت لكم فوق انه شركة الخرسانه عندها الفني الخاص فيها و لا تثق الا بنفسها فليش المالك و الاستشاري و المقاول مرات كثيرة بيعتمدوا اعتماد كلي على شركة الخرسانة في اخذ المكعبات و ما بيجيبوا المختبر اللي هو الطرف الثالث

هل تعتقدوا انه شركة الخرسانة راح تقول انه مكعباتها رسبت و انها مستعدة تتحمل كامل التكاليف و الاعطال اللي ذكرتها فوق؟

هل شفتوا شركة خرسانة واحده اعلنت انه مكعباتها رسبت .... مع انه لو اخفت هالشي فما حدا عنده علم و لو اعلنت انها نجحت فما احد عنده اعتراض؟

هل في احد بيقول عن الزيت اللي ببيعه انه عكر و مش صافي؟

هذا ليس ذم و قدح في نزاهة شركات الخرسانة و لكنه واقع و اللي عنده اعتراض على الكلام و بيعرف حالات تنفي كلامي يتفضل يخبرنا

هذا دليل على تهاون كل الاطراف لو انها معتمدة على شركة الخرسانة فقط في اخذ المكعبات

طيب في حالة فشل المكعبات ايش بيصير

بكمل الكلام بعدين ان شاء الله

[ضوى]

ول صج دوخة راس ، الله يعينكم والله

[معماري قطري]

ما شاء الله على ردك أخ خلدون ما قصرت كفيت ووفيت ... شكل أي واحد يتابع بيتخرج مهندس من هنيه ... شوف انا عندي نظرية إذا المقاول محترم وشركات الخرسانة نتوقع أغلبها عندها ذمة عمل وعليها إشراف من جهات حكومية، ما أهتم لأن أصلاً الأحمال خفيفة والمبالغات في التصميم كبيرة ... يعني لو تبني فوق بيت عادي طابقين أو 3 زيادة تستحمل الاساسات والأعمدة.

والإستشاري اللي يرضى ب 1200 كمبلغ إشراف شهري ملزم انه يشرف صح، لكن نظامنا القضائي غير منصف وبطيء في البت في هذي القضايا، وما دام انت كمقاول سويت اللي عليك من إجراء فالملام المكتب الإستشاري، ومن رايي إذا المكتب سعر قليل وبدون عقد واضح نشرد عنه يمكن تسعيره ما يوفي بترول السيارة، وقاعدة لتسعير الإشراف قديمة معمول بها تنص على إن قيمة الإشراف تكون بين 3 إلى 5% من عقد البناء وتكون موزعة على مدة البناء المنصوص عليها في العقد، فمثلاً إذا البناء بيكلف مليون ريال تقريباً وتقديرياً، فالإشراف يكون بين 30الف إلى 50 الف موزعة على فترة البناء لو كانت سنة تطلع من 2500 إلى 4160 شهرياً، وأنا أبني مشروع حالياً بتكلفة مليون ونص المليون ريال، ومكلفني الإشراف 4000 ريال وحصلت هالعرض من مكتبين استشاريين، شقول لك متوسطين وصراحة المكتب ما طلع لمستوى التوقعات لكن المقاول قمة الإحترام ومسوي أكثر من اللي عليه.

صحيح فيه مكاتب تاخذ الإشراف ب 1% من تكلفة المشروع وتكسر السوق وتكسر ظهر العميل، ويكون شغلهم بس يبيعون كلام.

وسلامتك.