الجسور المخفية

[معماري قطري]

السلام عليكم مشكور اخوي عالرد وماقصرت انا ان شاء الله راح اركب مكيفات دكتات يعني احسن لي اسوي البييمات مخفية وبعدين ابغي اعرف هل البيم المخفي مكلف وبعد ابغي اعرف شنو احسن شركة حق الدكتات

شوف خذها قاعدة دايماً ... مصممين السترآكجر عندنا يبالغون وايد ووايد تقدر تقول عنهم يعتمدون طريقة وحده، لكن لو بغيت تسوي ديزاين انشائي محترم ويوفر لك ويكون قوي كفاية بانصحك بمكتبين عارفهم ومجربهم، ولا بعد مهندسين حتى، وعشان ما تصير الأُمور دعائية وانا ضد هالشيء بس نشر معلومات للمساعدة باعطيك أسماء المهندسين وأرقامهم على الخاص، مع عدم إغفال إن المكاتب الهندسية ما شاء الله في تطور وتكاثر والمهندسين كذلك، يعني ممكن حتى غيرهم يسوون تصميم عملي وإقتصادي لك.

يعني بعبارة ثانية فيه مكاتب مثلاً تسوي لك أبيام ساقطه متر وعشرين سنتيمتر تحت الأرضية ويحتدون يرفعون لك الدور وايد وتحصل نص الإرتفاع مشغول بالبيم وجزء بسيط بالدكت والباقي جبس، وتحصل البيت مرتفع من برا ومن داخل غير، والتكلفة انت بتدفعها وفي شيء غير مستخدم وله حلول ثانية، وفيه مكاتب تسوي بيتك غابة أعمدة والاساسات كل أساس يشتكي من الثاني ويصرخ وخروه عني من كثرها وكبرها، وانت بعد بتدفع ثمن مغامراتهم ومبالغاتهم، وصدقني حتى لو بتسوي مظلة للسيارة يسوون لك أساس يشيل بيت وكنها الأرض بتتحرك لتحت ولا مب متحمله الوزن ... انا عني سويت مظلة على البلاط مباشرةً بدون أساسات ببراغي فقط وشزينها واقفه للحين، عرض 10 متر وعمق 6 متر وعلى عمودين في المقدمة وورا مثبته ببراغي بعد على الحائط، وقلت للمقاول انا المسؤول انت سو اللي ابيه وبس، وقبلها بنيت حايط فاصل بإرتفاع 6 متر وعرض 3 متر على أرضية بلاط ومحصور بين حايط البيت الخارجي وزاوية البيت، بس تبي الصراحة خايف شوي مع ان صار له حول 6 شهور مبني.

وتحمل يسوي لك الإستشاري أبيام مخفية ويعوض إرتفاعها بأنه يخلي الارضية نفس الإرتفاع يعني يسوي لك الصبيه كلها بيم، وتطلع الصبية كلها بسمك 50 سم ولا 60 ولا حتى أكثر، ويقول في نفسه بعدين لا ذي ثقيله وايد نحط لها كم عمود وكل عمود يكون راهي عشان يقدر يشيلها، وبعدين يسوي لك أساسات عماره عشان تتحمل الوزن، وبعد إنت اللي بتدفع ... فاختيار استشاري انشائي فاهم هو الأوفر حتى لو كلف كاستشارة.

وأتمنى لك ولي وللجميع كل توفيق من العزيز الحكيم