شفتك بعد غيبه .. وحاولت أحاكيك
مهوب من قلبي ولا من جرأته !!
بغيت أقول / فلان وازريت احاكيك
وكني سمعت اسمي مع التفاتة
فزيت من نومي وأنا أقول لبيييك
وآثرك رويا .. في منامي وجاته
يا اللي شريت البعد .. ما غاب طاريك
حتى لو إن البعد .. سوا سواته
مهوب محزني .. على حاجةٍ فيك
إلا إن قلبي شايف ٍ بك غناته !!
كن الطيوف تقول وشحال غاليك
وآقول راح .. وما بقى إلا غلاته
لو إن ما جاني من الهم يأتيك
كان المصلي ما حفظ وش صلاته
مريت شارعكم .. وصادفني أخيك
واللي قطع كبدي حلاتك حلاته
بغيت الخبط من دعاياه وأدعيك
واسمك وقف بين اللسان ولهاته !!
البعد شيّب خافق ٍ ميت فيك !!
والى مشى خطوه عثر في عصاته
مشكلتي / إن قلبي يحبك ويغليك
ومشكلتك / انك شخص عايش حياته
كثر الجفا نار وحطبها تغليييك
خف الحطب لا تزيد نار الشماته
إن ما أحزنك جرح ٍ برجواه يدعيك
ما عاد تفرق عيشته من مماته
قلبي وعمري كلها بين أياديك
العمر فدوه لكن القلب هاته !!
وإن ما بغيت ترد قلبي ما أوصيك
أحسن عزاه .. إلى دريت بوفاته
|
رد مع اقتباس
المشاركة الأصلية كتبت بواسطة qatara
