نواصل مع بعض الصور والشرح
وهذي صورة حق مدخل يكرم القاريء حمام المسبح، وهو مساحته محدوده للغاية بسبب وجود غرفة المعدات وراه، وزراعة ما حبيت أشيلها، وصفيت على مساحة صافية للشاور اللي سويت معاه بخار مدمج تقريباً 1.1 متر في 1.4 متر، ورفعته درجة مثل ما بيبين في الصور الجاية وركبت له باب يو بي في سي، وسقف فايبر كلف 5000 ريال مع ان اللي سواه قال انه واصل 3500 بس الشركة تاخذ كومشن مني، والشور تريي خذته 90 في 90.
لكن بسبب صغر الشاور كان البخار حار وقوي مع إنه متدرج لين 120 درجة لكن حدي إستحملت 60 درجة وبصعوبة وفي الغالب أشغله على 50 بس، وإحتديت أحط الخشبة اللي واضحة تحت والكاس البلاستك علشان ما يحرق البخار المباشر رجل حد.
وبالنسبة للكرسي سويته من قطعة بلاط وحده 90 في 45 مع إضافة قطعة جنبها 20 سم حتى أكمل ال 1.1 عرض، وصارت جلسة الكرسي مريحة خصوصاً إن قاعدته مايله للداخل بميلان ساق الواحد يعني يجلس ورجله محنية صوب الداخل وهو مرتاح، فخليت القاعدة بعرض 30 سم تحت وفوق مكان الجلوس يزيد شوي عن 45 سم، وسويت كسره بعمق 10 سم في الحايط حق عدة التنظيف والصابون.
وأترككم مع الصور
وهنا يبين واضح المدخل ومقابلته المغسلة وعلى اليمين الدبليوسي واليسار الشاور، وصراحه غامرت كثير في هالحمام فسويته على بلاط أرضية الحوش بدون اساسات، والحايط اللي فيه الباب إرتفاعه يوصل 5 متر لأن جزء كبير في الأرض مدفون وبدون أساساس كلش.
وهذي الصورة توضح داخل الشاور وتبين الكسرة أو الروشنه اللي في الحايط، واللي أتمنى كل واحد بيبني حمام جديد أو يعدل على موجود يسويها لأنها مريحة وسهلة الإستعمال.
والجاية صورة توضح نقطة دخول البخار واللي اضطريت أحط الدلو البلاستيك كحماية يدخل فيه البخار ويطلع فوق بدال ما يحرق رجل أي شخص.
وهذا سقف الشاور لازم يكون مقوس حتى ما يقطر البخار عشوائي، وينزل على الجوانب، والإنارة هذي هي نوعية الال اي دي LED وهذي فيه منها كبار بعد لداخل الحوض تكلف شوي أكثر بس إضاءَتها روعة وتعيش شكل ما سمعت 15 سنة، مثل إضاءَة السيارات الجديدة اللي تنور حتى في النهار.
وهنيه واضح مدخل بايب الماي اللي حق تعبئة المسبح، ويحتاج الواحد يغير هذا الماي كل سنتين مرة، والبايب مار تحت كرسي شاور البخار ورايح إلى مسافة 40 متر تقريباً لخارج السور جهة الشارع، ومغطى بغطاء خاص، وهنا غطيناه بكيس نايلون مربوط عن دخول المرعب بو 6 ريول اللي يخافون منه بنات العالم، وينشبك معاه هوز يدخل الماي للحوض بسهولة.
زاوية ثانية للمسبح
نفس الزاوية بس من فوق، والسقف فيه بلاستك مزدوج أزرق يعطي إحساس بوجود غيم وظلال خفيف، سعره 800 ريال لطول 5.8 متر في عرض مترين.
وهذي صورة توضح السقف ومروحة شفط من ثنتين لازم يشتغلون خصوصاً وقت الشتاء لإشتغال السخان وتكثف البخار على السقف لبرودة الحديد،
ونصيحة لأي واحد خاطره يسوي مسبح مغلق إنه يسوي حماية للحديد من الصدأ .. انا مفكر فيها بس عقدتني الأسعار.
وهذي مراية ومعاها اللي تبين بشكل ملتف 45 درجة اللي يسمونها قلاس بلوك أو الطابوق الزجاجي للي سئلوني عن هذا النوع، وهذي كانت زايده عندي من زمان واستخدمتها هنيه، ولو شفتوا بلاط تكرمون الحمام والشاور كله كان قديم مرمي جنب الزراعة واستخدمته، على ما اذكر تدمر معطيني اياه زيادة على كميات شريتها.